《阿鳳姨ê五度ê空間》

紅毛塗pang

作者 A-hong-î...漢羅翻寫Ahing

Jîn-hîng-tō phoo âng-môo-thôo-pang.
人行道鋪紅毛塗pang。
Ta̍k tè kuai-kuai tó-pênn-pênn, tsin hó kiânn.
Ta̍k塊乖乖倒平平，真好行。
Kan-na tsi̍t tè ngia̍uh-ngia̍uh-tāng,
Kan-na一塊ngia̍uh-ngia̍uh動，
Hó-thinn ta̍h-tio̍h khi̍h-kho̍k-khiàu,
好天踏tio̍h khi̍h-kho̍k-khiàu，
Lo̍h-hōo-thinn ta̍h-tio̍h tsúi koh ē tsūann lâng.
落雨天踏tio̍h水koh會tsūann人。
Tūa-lâng-gín-á tùi i lóng tsin giám.
大人gín-á對伊lóng真giám。
Tūa-lâng khùann-tio̍h i, tiō kín siám.
大人看tio̍h伊，tio̍h緊閃。
Gín-á khùann-tioh i, tiō ka tsàm,
Gín-á看tioh伊，tio̍h ka tsàm，
Tsàm-kà tshùi-iâm-iâm,
Tsàm-kah碎iâm-iâm，
Bē koh tùa hia ngia̍uh-ngia̍uh-tāng.
Bē koh tùa hia ngia̍uh-ngia̍uh動。