《台灣鳥á歌詩》

台灣鳥á唸歌詩詩集

作者 詩作kap註解: 蕭平治 攝影: 薛光雄


台灣鳥á唸歌詩，粗聲iù-jī真趣味，大隻細隻lóng kah意，互相欣賞kài歡喜；

台灣鳥á自由飛，飛kûan飛kē頭lê-lê,咱ê土地雖然狹，物產豐富生產濟。

台灣鳥á phu̍h-phu̍h飛，台灣確實好土地，有山有海真實在，Ilha Formosa真美麗。

台灣鳥á leh講話，美麗寶島自由地，咱若認真來扑拼，民主自由是咱ê。

台灣鳥á飛kûan-kûan,欣賞美麗咱台灣，交通科技建設濟，經濟奇蹟m̄是假。

台灣鳥á飛kē-kē,鼻tio̍h清芳烏龍茶，猶有果子kap番麥，好食物件塞倒街。

台灣鳥á種類濟，有ê一生tiàm台灣，有ê會轉去本基地，有緣歡喜tùa做夥。

台灣鳥á百百款，一心一意愛台灣，家己做主世傳世，無愛外人kā咱管。

台灣鳥á真自由，樂觀奮鬥無憂愁，看人目色扑結khiû,欲有尊嚴家己求。

台灣鳥á真自在，東西南北lóng飛來，Formosa好所在，食穿tùa行真phang-phài。

台灣鳥á飛振動，享受自由真輕鬆，前途光明無別項，勤儉kut-la̍t有希望。

台灣鳥á自由飛，台灣祖國是咱ê,家己決定咱一切，別人bē使加講話。

台灣鳥á愛台灣，充滿自信重人權，互相尊重你我咱，尊守法律頭一層。

台灣鳥á自由飛，台灣祖國真美麗，Formosa好所在，土地山海lóng咱ê。

台灣鳥á自由飛，飛懸飛低那講話，咱ê所在雖然狹，phah拚kut-la̍t勝一切。

台灣鳥á飛振動，認真phah拚無了工，台灣khiā起有信心，未來一定有希望。

台灣鳥á聲音súi ,節奏輕快ná吟詩，原民、客話、Hō-ló, 多語文化tak嘴舌。