《BONG報bóng選》

Tsi̍t-lúi Mûi-kùi-hue Ê Khé-sī

作者 Ko Ing-lâm

Ū tsi̍t-ūi sin-sū-hiann khì kàu tsi̍t-king hue-tiàm, i àn-sǹg beh kā hue-tiàm tīng tsi̍t-sok hue, sūn-sùa tshiánn hue-tiàm ê sin-lô kā hue sàng khì hōo i ê Ma-ma.

Tng i beh kiânn ji̍p-khì hue-tiàm ê sî, khùann-tio̍h tsi̍t-ê tsa-bóo gín-á tsē tī mn̂g-kha-kháu, tsi̍t-ê lâng àm-àm-á tī hia tshngh. Sin-sū-hiann kiânn úa kùe-khì, mn̄g hit ê tsa-bóo gín-á. “Me-me, lí nah ē tsi̍t-ê lâng tsē tī tsia teh háu leh?” Tsa-bóo gín-á ìn kóng, “Gúa siūnn beh bé tsi̍t-lúi mûi-kùi-hue sàng hōo gúa ê Ma-ma. M̄-kú, gúa bô-kàu tsînn.” Sin-sū-hiann thiann liáu tshiò-tshiò-á kóng. “Án-ni ooh! Bô iàu-kín. Lâi!” Tsiū khan tsit ê tsa-bóo gín-á ê tshiú tâng-tsê kiânn ji̍p-khì hue-tiàm.

Tīng hó beh sàng hōo a-bú ê hue-sok liáu-āu, koh-tsài līng-gūa bé tsi̍t-lúi mûi-kùi-hue hōo tsit ê kóo-tsui ê tsa-bóo gín-á. “Me-me, lí tùa tī toh? Gúa sái-tshia tsài lí tńg-khì, hó bô?” “Tsin ê? Bô phiàn gúa hoonnh?” “Tong-jiân mā-sī tsin ê!” “Bô, án-ni lah! Mâ-hûan lí sàng gúa khì gúa ê Ma-ma hia tsiū hó. M̄-kú, gúa ê Ma-ma tùa ê sóo-tsāi, lī tsia tsin hn̄g neh!” “Tsá nā tsai tsiū m̄ kā lí tsài ah!” Sin-sū-hiann kún-sńg-tshiò án-ni kóng.

Tsi̍t-tsūa lōo lò-lò-tn̂g, sin-sū-hiann hū-tsik sái-tshia, tsa-bóo gín-á jīn-tsin tshūa-lōo. Tshia tshut tshī-khu liáu-āu, peh tsiūnn uan-uan khiau-khiau ê suann-lōo, tsùe-āu lâi kàu tsi̍t-ê bōng-hn̂g. Tsa-bóo gín-á kā hit lúi mûi-kùi-hue khǹg tī tsi̍t-ê tú tâi bô jūa-kú ê sin-bōng thâu-tsîng. “Gúa ê Ma-ma tsāi-sinn ê sî, siōng ài mûi-kùi-hue ah!” Tsa-bóo gín-á ná hûe-ik ná kóng, hit ê thian-tsin ê bôo-iūnn, hōo lâng bô huat-tōo kā pàng hōo būe-kì-tit.

Ūi-tio̍h beh kā tú-á tsiah kùe-sin khì ê Ma-ma hiàn tsiūnn tsi̍t-lúi mûi-kùi-hue, tshian-lí-tiâu-tiâu, bô-ū pùann-kù ê ùan-giân, sim-lāi kan-tann ū kám-siā, siàu-liām, siūnn Ma-ma ê sim-tsîng. Sin-sū-hiann kā tsa-bóo gín-á sàng tńg-khì kàu tshù, sûi-sî khoo huan-thâu u̍at tò-tńg-khì hue-tiàm.

I khì tshú-siau tsìn-tsîng beh kiò lâng sàng hōo Ma-ma ê hue-sok, līng-gūa koh-tsài bé tsi̍t-tūa-pé tshinn koh súi ê hue. Sui-bóng ài sái 5 tiám-tsing ê tshia, mā beh tshin-tshiú kā hue sàng hōo i ê Ma-ma.

Sin-sū-hiann tùi tsit ê tsa-bóo gín-á tit-tio̍h hiáu-ngōo. Pîng-iú, lí ū jūa-kú bô kap Ma-ma kìnn-bīn ah? Pûe I tsia̍h tsi̍t-tǹg-á pn̄g, á-sī kap I khai-káng kóng kúi-kù-á ūe leh. Tsit-tsūn iáu ē-hù, siūnn tio̍h, ài kúann-kín khì tsò ooh! Gūan Siōng-tè sóo siúnn-sù ê pîng-an siông-siông kap lí, gúa, tāi-ke sann-kap tī teh, Ing-lâm tī tsia tsiok-hok lín.