《BONG報bong2選》

| | | 轉寄

烏貓kap 水雞

Tī 熱人ê 暗暝,蓮花池邊á 有幾十隻水雞teh「ua̍h!ua̍h!ua̍h!」,tò-pîng hit 隻叫kah tng siak-phah,nah會hiông-hiông 停落來?Ō͘-o͘h,原來是一隻睏bē 去ê 烏貓uì 邊á 行過。

烏貓:「Miau~miau~,今á 日日時nah會熱tsit 體ê leh?Tio̍h-ài 趁暗時á 出來行行lau-lau leh,若無,我tsit 隻體材瘦thio ê 烏貓liam-mi就變肥貓lo͘h。

Tsit 個時tsūn,tú-á 好有一陣涼風吹來,kā 蓮花葉siàn kah phih-phih pha̍h-pha̍h、搖來搖去。

水雞á:「Ah,我苦a,nah會án-ne?M̄ 知有hō͘ 烏貓看著無?緊kā 頭àⁿ khah低leh……」

「Ha~ha~ha~,涼lah,涼lah,風ah,繼續吹、繼續吹,m̄-thang 停。」烏貓ná 享受涼風,ná teh tshuē bih tī 蓮花池邊á ê 水雞。

「正pîng 有四隻,tò-pîng 73隻,上uá 近我ê hit 隻上無膽,驚kah phī-phī-tshuah,頭á koh lê-lê,好!今á 日就tshuē伊做伴,hi~hi~hi~」烏貓心內teh 偷笑。

就án-ne,胡鬧kā 頭前腳kap 頭kiu tńg來,後腳翹kah kuân-kuân-kuân,圓滾滾ê 尾溜ká-ná 釣魚ê 浮筒,hàiⁿ tsi̍t-ē、tiuh tsi̍t-ē,hàiⁿ tsi̍t-ē koh tiuh tsi̍t-ē,伊歡喜ê 心情看尾溜就知。

「He~he~,看我一號ê khut 勢!水雞ah,好膽mài 走!」

水雞á:「我苦a,我苦苦苦lo͘h,tsit 聲苦bē 了a。烏貓大ê,你kā 我放開lah,kā 我放開lah……」

「好ā,kah 你to 開嘴ko͘-tsiâⁿ a,好,放你走。」烏貓雖bóng 嘴nih 講beh 放水雞走,m̄-koh 身軀suah ná 徙ná 去,kā 水雞beh tńg 蓮花池á ê 路擋起來。

「Tsit 隻烏貓講一套做一套,講beh 放我走,koh kā 路擋leh,tsit-má 水路bē-tàng suan,kan-taⁿ tshun 草á 路niâ。好!無kap伊拚tsi̍t-ē,suah lia̍h做我好欺負。」水雞á 心內án-ne 想。

烏貓:「Hi~hi~,gâu 跳o͘,uah,跳tsi̍t-ē尺外遠,好sńg、好sńg,m̄-thang 停、m̄-thang 停落來。」

無論水雞án-tsuáⁿ 跳,烏貓總是tuè tī伊後壁。過無juā 久,水雞就跳kah phì-phè 喘a。

水雞:「Hè~hè~hè~,tsiok 喘ê、tsiok 喘ê,tsit 隻烏貓無tāi 無tsì lia̍h 我kún-sńg 笑,伊是sńg kah 真心適,我是兩支後腳跳kah kiōng-beh thih 腿去,用跳ê 我nah 跳會贏伊?若無想一個á 好辦法,liam-mi-á thih 腿就變做tshun 骨頭ê 白骨腿lo͘h。」

Tsit 個時tsūn,tú-á 好koh 有一tsūn風tuì 蓮花池邊á 吹過,m̄-koh kap tú-tsiah 無仝ê,是所有ê 水雞lóng 驚kah m̄ 敢出聲,kan-taⁿ tshun 烏貓jiok 水雞,kā 草á phah kah phī-pha̍k 叫ê 聲。

水雞á:「有a,無聲ê 暗暝…無聲ê 暗暝,我有救a!」

烏貓:「你講煞buē?無聲ê 暗暝,he~he~,你走無路a。」

原來,水雞想著íng 過細漢經過雨傘節ê siū ê 時,ma-ma lóng會特別交代伊bē-sái 出聲;tsit-má伊想著一個好辦法:趕緊跳tuì 雨傘節ê siū hia 去。

水雞:「Kua̍h…kua̍h…kua̍h…」勇敢ê 水雞拚性命叫,koh 愈叫愈大聲,想beh kā 雨傘節siâⁿ出來。

「Toh一隻m̄ 驚死ê 水雞敢來guán 門腳口tshiàng 聲?今á 日tsi̍t-kuá 水雞m̄ 知án-tsuáⁿ lóng m̄ 出聲,害我提早歇睏,腹肚tsiah tng teh iau niâ,隨有點心走來。」本底就iau kah 大腸告小腸ê 雨傘節,siu̍h tsi̍t-ē,uì 蛇孔sô出來,nah 知面頭前m̄ 是水雞,是烏貓。

烏貓:「臭水雞,你koh會曉用tsit 招!雨傘節,我無teh 驚你,看一號khut 勢!」

烏貓kui 身軀毛lóng tshàng起來,雨傘節本tsiâⁿ 想講有料thang sut,想bē 到m̄-tāⁿ 食bē 著,koh ài 拚老命,愈想愈m̄ 值,頭ua̍t leh sô tńg 去蛇孔。

勇敢koh 冷靜ê 水雞就tī 烏貓kap 雨傘節對相ê 時,跳入去蓮花池á。

水雞á:「Kua̍h…kua̍h…kua̍h…,人講好khang ài 報人知,歹khang mài sio 害,想bē 到tī 緊急ê 時tsūn,歹khang ê mā ē-tàng 救人命,hi~hi~。」