《BONG報bong2選》

| | | 轉寄

土地公kap土地婆ê故事

今á日是土地公ê生日,小朋友,我相信恁一定有看過土地公。每一冬土地公過生日這工,大家lóng會去土地公廟拜拜。小朋友上愛去土地公廟前ê空地thit-thô 。所以咱會tàng講土地公雖然是小神,m̄-koh i suah kap咱上親,上得著大家ê疼thàng。

差不多所有ê土地公ê神像lóng 是大kho͘大kho͘ ê老阿公,有長長ê白嘴鬚,臉紅kì-kì,有笑bi-bi ê笑容,看起來使人感覺tsiok親切ê,tsiok想beh入去kā伊拜拜。

M̄-koh因為土地公是每一個所在保庇大家ê神明,所以各地ê土地公lóng有無仝款ê故事,tsit-má我就kā恁講其中ê一個民間傳奇故事。

古早時tsūn,有一個收帳官,叫做張福德,他非常愛護老百姓,若有人納錢納bē出--來,他就會h³伊欠,若是真正無法度納錢,伊就會the̍h錢出來替伊納,若是看tio̍h老百姓有困難,伊lóng會想tsiok tsē辦法去幫贊。每一工,伊lóng sì-kè teh替老百姓ê tāi-tsì leh無閒。

尾--á,張福德死了後,新ê收帳官tsiok pháiⁿ--ê,時常逼老百姓納錢,koh kā大家苦毒,大家lóng感覺tsiok痛苦,有人tòng-bē-tiâu,就講:「若是張老爺koh 有tī--leh,m̄知影有juā好。」大家tsiok感恩過去張老爺照顧、疼惜老百姓ê日子,所以大家lóng想beh替伊起一間廟hō͘老百姓會tàng時常受到伊ê保庇kap照顧。In就tī 田園中tshuē一個風景tsiok suí ê好所在,替張福德kap伊ê夫人起一間細細ê廟,尊稱伊「福德正神」,這就是土地公廟ê由來。

老百姓時常去「土地公廟」拜拜,求土地公保庇大家平安大賺錢,當in看著土地公ê神像時,就親像看著張福德在生ê時替老百姓服務ê情形仝款。
M̄-koh恁kám知影,是án-tsuáⁿ taⁿ-á有土地公,無土地婆?原來土地公ta̍k工lóng笑bi-bi,tsiok好笑神,土地婆tsiok自私--ê,ta̍k工lóng tshiah-pê-pê。

有一工,一個穿破衫ê散赤人來土地公廟拜拜,伊講:「是án-tsuáⁿ我lóng bē好額,beh食一頓飯mā食bē飽,求恁賜hō͘我一寡金銀財寶。」

土地公看伊tsiok可憐--ê,想beh hō͘伊一寡金銀財寶,m̄-koh土地婆suah開嘴講:「Bē-sái,若每一個散赤人lóng求咱hō͘伊金銀財寶,án-ni咱ê財產lóng分了了,到時tsūn,咱查某囝嫁翁就會連扛轎á lóng請不起,bē-sái,bē-sái!」
土地婆tshiah-pê-pê無愛hō͘土地公賜金銀財寶hō͘散赤人,土地公無法度只好對散赤人講:「你tńg--去,只要你認真phah拚做khang-khuè,我就會tī暗中保庇你得著財富,你免煩惱。」

Koh有一pái,有一對翁á某來拜拜,求土地公hō͘ in福氣,會tàng一世人lóng得著榮華富貴。」

土地婆馬上講:「Bē-sái,若每一個人lóng來求咱hō͘ in福氣,án-ni咱家己就lóng無tshun--落-來ê福氣á,bē-sái,bē-sái!」

土地婆tshiah-pê-pê,無愛對每一個人好,土地公無法度只好對hit對翁á某講:「恁tńg--去,只要恁誠心做善事,我就會tī暗中保庇恁得著應該得--著ê福氣。」從今以後,大家lóng知影土地公ê仁慈kap土地婆ê自私,所以lóng去土地公廟拜拜,拜土地公,無人beh拜土地婆。

小朋友,妳若是有看著風景tsiok suí ê田園有土地公廟,會記--leh,停落來拜拜,求伊保庇hō͘你gâu讀書,無的確,小小ê土地公會開嘴kā你講:「只要你認真讀書,我就會tī暗中保庇你變成上有路用ê人」。