《CTT出頭天園地》

I-sap 寓言 50

作者 TLH

50. Thòo-á Kap ku

Ū tsi̍t-pái, thòo-á pûn ke-kui kóng, i tsáu ê sok-tōo pí pa̍t-lâng lóng khah kín, bô lâng ē pí--tit. I kóng, “Gúa nā piànn-miā tsáu, tsîng kàu-tann m̄-bat su--kùe! Gúa thìng-hó kā sóo-ū ê tōng-bu̍t thiau-tsiàn.” Ku tsin líng-tsīng kā ìn kóng, “Nā án-ne, gúa tsiap-siūnn lí ê thiau-tsiàn.’’

Thòo-á kóng, “Tshiò sí lâng! Liân lí iā kánn beh hâm gúa pó-sài! Gúa tsu̍at-tùi kui-lōo lóng tsáu iânn--lí.“

Ku kóng, “Tī lí liáu-būe su tsìn-tsîng, tsò lí tsīn-liōng tshàu-phùi, bô iàu-kín.”

In sûi tsiū khai-sí pí-sài.

Thòo-á tsi̍t-ē-á tsiū tsáu kàu bô khùann-kì iánn. M̄-kú tsin-kín tsiū thîng--lo̍h--lâi, u̍at-thâu tshiò ku tsiânn-si̍t m̄-tsai thinn ū jūa-kûan, tē ū jūa-kāu. Tshiò suah, tsiū tó tī tsháu-á-poo hioh-khùn, put-ti put-kak sùa khùn--khì.

Ku tsi̍t-pōo tsi̍t-pōo bān-bān-á pê, lóng bô thîng. Thòo-á khùn-tshénn ê-sî, khùann-tio̍h ku í-king teh beh pê kàu búe-tsām. Tsit-sî, i koh-khah án-tsúann piànn sènn-miā tsáu mā bô huat-tōo kā ku jiok--tio̍h lah.

Tsò tāi-tsì iáu-sī ài kha ta̍h si̍t-tē, jīn-tsin phah-piànn tsiah ē sîng-kong.