《CTT出頭天園地》

I-sap 寓言 4

作者 TLH

4. Tshī Iûnn-á ê Gín-á

　Ū tsi̍t-ê tshī-iûnn ê gín-á kā i ê iûnn-á kúann kàu suann-kha ê tshiū-nâ khì tsia̍h tsháu. I kui-ji̍t lóng bô phūann, tsiū siūnn-khang siūnn-phāng beh tsè-tsō tshì-khik. I tsáu-ji̍p tsng-lāi, tūa siann huah kóng, “Ū iá-lông ooh, ū iá-lông ooh!” Tsng-lāi ê lâng thiann--tio̍h, sûi tsông--tshut--lâi; ū--ê tsin kín tsiū tsáu kàu i hia. Tsit-ê gín-á kám-kak án-ne si̍t-tsāi ū-kàu sim-sik. Kùe bô kúi-ji̍t, i tsiū koh tshì tsi̍t-pái. Tsng-lāi ê lâng iáu-sī kāng-khúan tsáu-tsut-lâi beh kā i tàu-sann-kāng. Tāi-ke huat-hiān tsit-ê gín-á iū-koh teh kóng pe̍h-tsha̍t, lóng tsin siū-khì.

　Kùe bô kúi-ji̍t, tshiū-nâ lāi tsiânn-si̍t tshut-hiān tsi̍t-tsiah tūa iá-lông. Tsit-ê gín-á khai-sí kín-tiunn, hûan-ló i ê iûnn-á. Tsit-pái i tong-jiân pí í-tsîng koh khah tūa siann huah, “Iá-lông lâi lah, iá-lông lâi lah!” M̄ -kú, hia-ê í-king hōo i phiàn kùe 2 pái ê lâng, siūnn kóng tsit-ê gín-á iū-koh teh tshòng-tī--lâng lah! Bô pùann-ê lâng beh tshap--i. Sóo-í, iá-lông tsiū kā iûnn-á tsia̍h liáu-liáu, tsia̍h kàu pá-thong-thong.

　Tng tsit-ê gín-á teh ùan-thàn bô lâng tàu-sann-kāng ê sî, tsng--ni̍h ê tióng-pùe kā kóng, “Tsún-kóng lí tsi̍t-ê pián-sian-á tsit-pái sóo kóng--ê khak-si̍t sī tsin--ê, mā bô lâng ē siong-sìn lah!”