《CTT出頭天園地》

I-sap 寓言 5

作者 TLH

5. Siàu-liân Tsha̍t-thau kap I ê Lāu-bú

　　Ū tsi̍t-ê siàu-liân-lâng in-ūi tsò tsha̍t hông lia̍h--khì, huat-kuann kā phùann-tsūe tio̍h tsē-kann. Tī beh kuainn-ji̍p kann-ga̍k tsìn-tsîng, i iau-kiû kìnn i ê lāu-bú tsi̍t-bīn.

　In bú-á-kiánn kìnn-bīn ê sî, i tùi lāu-bú kóng, “Gúa siūnn beh kā lí kóng sè-siann ūe.” I ê lāu-bú tsiū kiânn úa--khì. In lāu-bú tsi̍t ànn-thâu, i sûi tùi lāu-bú ê hīnn-á kā kā--lo̍h--khì. Pinn--á ê lâng khùann-tsi̍t-ē lóng tshuah-tsi̍t-tiô, mē i sī tsúann-iūnn tsò tsiah-ni̍h tshoo-lóo bô jîn-sìng ê tāi-tsì.

　I ìn-kóng, “Tse sī i ê pò-ìng! Gúa sè-hàn thâu-tsi̍t-pái kā lâng thau-the̍h mi̍h-kiānn tńg-khì tshù--ni̍h ê sî, i m̄-nā bô tsik-pī--gúa, tshú-hu̍at--gúa, húan-tò-tńg tshiò-tshiò-á kā gúa kóng, bô lâng ē huat-hiān lah! Tsiū-sī in-ūi i, gúa kin-á-ji̍t tsiah ē piàn án-ne!”

　Ū tsi̍t-ê Bo̍k-su kóng, “Hū-jîn-lâng ah, lín kiánn kóng--ê bô m̄-tio̍h! Siōng-tè kóng, ‘Kàu-ióng gín-á tio̍h īng ha̍p-gî ê huat, án-ne kàu-lāu iā bē uai-tshu̍ah.’ ”