《CTT出頭天園地》

思念所消失ê台灣農村生活 3

作者 Tiunn Bí-lī 張美利

br>
Kóo-tsui ê Tsing-sinn
古　錐　的　精　牲


Tshài-hn̂g-pinn--á ū tshī-ti, Pak-tóo teh iau ihN--ihN--ihN.
菜　園　邊　仔有　飼　豬,　　腹　肚　在　餓　嚶　嚶　嚶.

A-bú kūann-phun kín-lâi tshī, Ti -á tsia̍h-kàu tsin huann-hí.
阿母　提　泔　緊　來　飼,　　豬　仔　吃　到　真　歡　喜.

Iô-búe piáu-sī tsiok múa-ì, Tsi̍t-tsiah tsi̍t-tsiah pûi-ihN-ihN.
搖　尾　表　示　足　滿　意,　　一　隻　一　隻　肥　嚶　嚶.

Ke-á ah-á múa-tiânn sī, Sió-tī hū-tsik kā in tshī.
雞　仔　鴨仔　滿　庭　是,　　小　弟　負　責　給　伊　飼.

Ki-ki ko̍k-ko̍k ûi sin-pinn, M̄-bat kui-kí gâu sann-tsinn.
吱　吱　咯　咯　圍　身　邊,　　不　識　規　矩　賢　相　爭.

Ke-kak tsia̍h-pá khui-siann thî, Ah-bó tshūa-kiánn khì hî-tî.
公　雞　吃　飽　開　聲　啼,　　鴨　母　娶　子　去　魚　池.

Niau-á siōng ài tshńg hî-tshì, Àm-sî jīn-tsin lia̍h niáu-tshí.
貓　仔　上　愛　舔　魚　刺,　　暗　時　認　真　掠　老　鼠.

Káu-á tsīn-tiong tsò kíng-pī, Tshù-tsîng tshù-āu teh sûn-sī.
狗　仔　盡　忠　做　警　備,　　厝　前　厝　後　在　巡　視.

Tāi-ke bô-îng tsò tāi-tsì, Tsiáu-tsiah tshiū-tíng gîm kua-si.
大　家　無　閒　做　代　誌,　　鳥　隻　樹　頂　吟　歌　詩.