《CTT出頭天園地》

I-sap 寓言 8

作者 TLH

8. Ìnn-á kap Tsiáu-á

　Tse huat-sing tī tsi̍t-ê tsng-kha sóo-tsāi. Ū tsi̍t-ê lâng tī tshân--ni̍h tsò-sit, teh iā tūa-mûa ê tsíng-tsí. Ū tsi̍t-tsiah ìnn-á kap tsin tsē tsiáu-á, tī tshân--ni̍h thiàu-lâi thiàu-khì tshūe mi̍h tsia̍h. Ìnn-á kóng, “Ài tsù-ì hit-ê lâng.” Kî-tha ê tsiáu-á mn̄g, “Ūi sím-mi̍h? I teh tshòng sím-mi̍h leh?” Ìnn-á kóng, “I teh iā tūa-mûa ê tsíng-tsí. Tāi-ke ài tsim-tsiok kā sóo-ū ê tsíng-tsí lóng khioh khí-lâi tsia̍h hōo tshing-khì; nā bô lín ē hiō-húe.” Kî-tha ê tsiáu-á kin-pún to bô teh kā thiann.

　Kùe bô jūa-kú, tūa-mûa tsíng-tsí tī thôo--ni̍h puh-ínn, tshiū-tsai bān-bān-á tūa-tsâng sîng-si̍k lah. Hōo lâng kā the̍h-lâi pīnn tsò mûa-soh, tshiah tsò bāng-á. Tsin-tsē tsiáu-á lóng hōo tsia-ê bāng-á bāng--tio̍h.

　Ìnn-á kóng, “Gúa kiám m̄-sī láu-tsá tsiū kóng--kùe?” Sī beh khah kut-la̍t leh, kā tsûan-pōo ê tsíng-tsí siau-bia̍t; á-sī beh khǹg leh hōo puh-ínn, sîng-tióng,tūa-tsâng, lâi hāi-sí ka-kī?