《CTT出頭天園地》

I-sap 寓言 9

作者 TLH

9. Sì-kha-á Thó beh Ài Tsi̍t ê Kun-ông
　Ū tsi̍t-tīn sì-kha-á tùa tī tsi̍t-ê tsin sik-ha̍p in tùa ê sip-tē. In sì-kè thiàu, ôo-pe̍h sńg. M̄-kúan sī kā pa̍t-lâng phùn tâm--khì, á-sī hōo pa̍t-lâng thún--tio̍h, lóng bô lâng ē tshūe mâ-hûan.Ji̍t-tsí kùe-liáu tsin sóng-khùai, bô-hûan bô-ló.

　M̄-kú, in kám-kak án-ne bô kàu lí-sióng, ǹg-bāng ū tsi̍t-ê kun-ông kap tsi̍t-thò sik-ha̍p in ê kui-hūan, tsiū kā Thinn-sîn iau-kiû, “Úi-tāi ê Sîn ah, tshiánn sàng tsi̍t-ê kun-ông lâi thóng-tī--gúan, hōo gúan tāi-ke ū kui-kí.”

　Thinn-sîn thiann-tio̍h in ê iau-kiû sùa khí ài-tshiò, tsiū tàn tsi̍t tūa khoo gûan-bo̍k lo̍h-khì in ê sip-tē. Tshiū-khoo lak lo̍h-khì sip-tē ê sî, huat-tshut tsin tūa ê tsúi-siann. Tsia-ê sì-kha-á tsi̍t khai-sí kám-kak tsin kiann-hiânn, koh tsin hòonn-kî, tsûan-pōo lóng tsông-khì tsúi-pinn beh khùann in ê Kun-ông tàu-té sī senn-tsò siánn-khúan.

　Tāi-ke ûi tī hia tán tsi̍t-tūann sî-kan khùann “I” lóng bô tōng-tsīng. Ū tsi̍t-nn̄g-tsiah khah ióng-kám--ê tsiū mōo-hiám úa-kīn “I”, sīm-tsì tūa-tánn tshun-tshiú khì kā bong, “I” iû-gûan bô tín-tāng. Tsia-ê sì-kha-á ing-hiông kui-khì khí-lí “I” ê tíng-bīn thiàu-làng-suh. Kî-tha ê sì-kha-á lóng tùe in án-ne tsò.

　Kúe tsi̍t-tūann sî-ji̍t, tsia ê sì-kha-á ta̍k-kang bô-îng sûi-lâng ê tāi-tsì, kin-pún bô khì tsù-ì tio̍h in hit ê Kun-ông, liân kóng-khí mā bô! In kám-kak tse m̄-sī in su-iàu ê, sóo-í in koh kā Thinn-sîn iau-kiû in ê gūan-bāng, “Gúan beh ài ê sī tsi̍t-ê tsiànn-káng ê kun-ông, ē-tàng hōo gúan siú kui-kí ê kun-ông.”

　Tsit-pái Thinn-sîn tsin siū-khì, tsiū sàng tsi̍t-tsiah tūa-tsiah Lā-pue tsò in ê kun-ông. Lā-pue tsik-sî kā sì-kha-á lóng thiah-tsia̍h lo̍h-pak. Tsit-tsūn, sì-kha-á siūnn beh húan-húe mā í-king bē hù lah!

　Gūan-bāng sī bān-tn̄g tshim-khenn, íng-úan bô búan-tsiok ê sî-ji̍t. Hûan-sū tio̍h-ài pí-kàu--kùe tsiah tsai hó-bái. Tsū-jiân ê kui-hūan tsóng pí jîn-ûi, giâm-keh koh tsân-khok ê kui-hūan khah hó.