《CTT出頭天園地》

I-sap 寓言 16

作者 TLH

16. Lông kap Ho̍h

Tsi̍t-tsiah lông teh hiáng-siū i ê la̍h-mi̍h. Bô tiunn-tî, tsi̍t-ki kut-thâu khê tī nâ-âu-kńg--ni̍h, thun bē lo̍h--khì, mā kha̍k bē tshut--lâi. I kám-kak nâ-âu tsin thiànn, tsin thòng-khóo. Tī hia tsông-lâi tsông-khì, ná tsông ná ai. I sì-kùe khì thó kiù-ping. I kóng nā ū lâng ē-tit-thang kā hit-ki kut-thâu the̍h--tshut--lâi, m̄-kúan sím-mi̍h tiâu-kiānn, i lóng gūan-ì tap-ìng.

Tsi̍t-tsiah ho̍h kóng beh tshì khùann māi. I kiò lông tó--lo̍h--khì, kā tshùi khui hōo tūa-tūa-ê. Ho̍h kā tn̂g-tn̂g ê tsiam-tshùi-kóng kap ām-kún tshun-ji̍p-khì lông ê nâ-âu-kńg--ni̍h, kā hit ki kut-thâu ngeh--tshut--lâi. Ho̍h tùi lông kóng, “Kiám ū-iánn kóng gúa beh ài-ti̍h sím-mi̍h mi̍h-kiānn lóng ē-sái--tit?”

Lông gê-á giàng-giàng, iōng im-tîm ê siann kóng, “Lí ài ti-tsiok ah lah! Lí kā lí ê thâu khǹg ji̍p-khì lông ê tshùi lāi, ē-tàng pîng-an kiu--tshut--lâi, án-ni kiám bô kàu hó-ūn? Tsit-khúan pò-tap kiám bô-kàu gia̍h?”

Ah-pà ê lâng sī bô khó-lîng ē kám-un--ê.