《CTT出頭天園地》

I-sap 寓言 18

作者 TLH

18. Ni-bú kap Iá-lông

“Tiām--khì,” tsi̍t-ê Ni-bú kā tsē tī i ê kha-thâu-u ê gín-á án-ne kóng. “Lí nā koh háu, gúa tsiū kā lí tàn hōo iá-lông tsia̍h!”

Tsin tú-hó, ū tsi̍t-tsiah iá-lông tùi thang-á-kha kiânn--kùe. I thiann-tio̍h tsiah-ê ūe, tsiū bih tiàm hia tán. “Gúa kin-á-ji̍t ê ūn-khì tsin hó!” I án-ne siūnn, “Bô-jūa-kú hit-ê gín-á it-tīng ē koh khàu, án-ne gúa tsiū ū gín-á bah thang tsiah lah! Gúa í-king tsin kú bô tsia̍h-tio̍h tsiah-ni̍h hó-liāu--ê lah!” I tsiū tiām-tiām tī hia tán, koh-tán, ti̍t-ti̍t-tán, kho̍k-kho̍k-á tán. Tán kàu gín-á koh khai-sí khàu, iá-lông tsiū úa-lâi thang-á-kháu, lia̍h Ni-bú kim-kim khùann, búe-liu it-ti̍t iô. Siūnn-bē-kàu Ni-bú sùa kā thang-á-mn̂g kuinn--khí--lâi, tsáu khì thó kiù-ping. Tshù-lāi ê káu-á lóng tsông-tshut-lâi kong-kik iá-lông.

“Ooh!” iá-lông ná tsáu ná kóng, “Jîn-lūi ê ūe sī bē-tit-thang siong-sìn--ê.”