《CTT出頭天園地》

I-sap 寓言 26

作者 TLH

26. Bē Gû-ling ê Tsa-bóo Gín-á

Patty sī bē gû-ling ê tsâ-bóo-gín-á, i thâu-khak tíng giâ tsi̍t-tháng gû-ling beh khì tshī-á. I ná kiânn ná àn-sǹg bē gû-ling ê tsînn beh án-tsúann iōng.

“Gúa beh kā Brown bé kúa ke-á,” i kóng, “in ē ta̍k-kang senn ke-nn̄g; gúa beh kā nn̄g bē hōo Parson in bóo. Bē ke-nn̄g ê tsînn, gúa beh the̍h-lâi bé tsi̍t-su sin sann kap tsi̍t-tíng súi bō-á. Gúa nā tsng hōo sui-súi khì tshī-tiûnn, hiah-ê siàu-liân-ke tsu̍at-tùi lóng ē sio-tsenn beh lâi tshūe gúa khai-káng! Polly Shaw tiānn-tio̍h ē khùann-kàu ba̍k-khang tshiah. He sī in-tau ê tāi-tsì, gúa tsiah bô teh kiann--i. Gúa tsiū kā khùann--tsi̍t--ē, thâu-khak u̍at tùi pinn--á khì.”

I ná kóng ná u̍at-thâu, tháng-á sùa lak--lo̍h--khì, gû-ling tshia-tó liáu-liáu.

I tsí-hó tńg-khì tshù, kā a-bú kóng gû-ling tshia-tó ê in-tuann.

“Ah, gōng gín-á,” a-bú ná kā an-ùi, ná kā thiah-bîng, “Ke-á-kiánn iáu-būe pū--tshut--lâi tsìn-tsîng, bē-tàng àn-sǹg--tit.”