《CTT出頭天園地》

I-sap 寓言 28

作者 TLH

28. Bé-á kap Lî-á

Bé-á kap Lî-á tâng-tsê tùe tsú-lâng tshut-mn̂g. Bé-á tshīng-tshah tsin súi, iân-lōo kiânn iân-lōo thiàu-lāng, sim-tsîng tsin khin-sang. Lî-á phāinn tāng-mi̍h tsin tsia̍h-la̍t, iân-lōo kiânn, iân-lōo phīnn-phēnn tshúan, sim-tsîng tsin ut-tsut.

Lî-á thóo tsi̍t-ê tūa-khùi, án-ne kā Bé-á kóng, “Gúa nā-sī lí tsiū hó lah! Kui-kang tsia̍h-pá-pá, îng-sian-sian, koh thang tshīng kàu súi-tang-tang.”

Tē-jī-kang, ū tsi̍t-tiûnn tūa tsiàn-ia̍h. Siōng búe-pái tshut-tsiàn ê sî, Bé-á tio̍h tāng-siong, tó tī lōo-pinn, teh-beh sí lah. Lî-á kiânn tùi hia kùe, khùann-tio̍h Bé-á kan-ta tsun tsi̍t-tiám-á khùi-si-á, kám-kak i tsin khó-liân.

“Gúa tshò lah,” Lî-á kóng, “Iáu-sī pîng-hûan khah an-tsûan!”