《CTT出頭天園地》

I-sap 寓言 30

作者 TLH

30. Siáu-thiú-á kap Tsng-kha-lâng
Tsng-kha nāu-jia̍t ê sî, ū tsi̍t-ê siáu-thiú-á teh piáu-ián bôo-hong ta̍k-tsióng tōng-bu̍t ê kiò-siann, ta̍k-ê lóng khùann-kàu tshiò-ha-ha. Siōng lōo-búe, i koh o̍h ti-á ki-ki kiò, o̍h kàu tsiok sîng. Khùann nāu-jia̍t ê lâng long siūnn-kóng i sin-khu tiānn-tio̍h ū tshàng tsi̍t-tsiah ti-á.


M̄-kú, ū tsi̍t-ê gūa-tsng-lâng khiā tī pinn--á kóng, “He ná-sī ti-á ê kiò-siann! Tsi̍t-tiám-á tio̍h bô sîng. Bîn-á-tsài gúa tsiah hōo lín thiann khùann ti-á ê kiò-siann sī senn-tsò siánn-khúan.”

Keh-tńg-kang, hit-ê lâng tsiânn-si̍t peh-tsiūnn bú-tâi, thâu-khak lê-lê, o̍h ti-á ki-ki-kiò, kiò bô thîng koh tsin tshò-hīnn. Kuan-tsiòng thiann liáu tsin sit-bōng, lóng kā mē, koh kā tìm tsio̍h-thâu-á kiò i tiām--khì.


“Lín tsiah-ê giàn-thâu--ê!” i khui-tshùi tūa-siann jiáng, “ Lí tàu-té sī bat siánn!”. I ná jiáng ná kā tshàng tī hiû-á lāi ê ti-á-kiánn lia̍h--tshut--lâi, tshiú kā ti-hīnn-á khiú tiâu-tiâu. Gûan-lâi sī tsiànn-káng ê ti-á teh ki-ki-kiò.

Ké--ê thong-lâng o-ló, tsin--ê lâng sùa hiâm tshàu--tsho.