《CTT出頭天園地》

I-sap 寓言 33

作者 TLH

33. Tsng-kha Niáu-tshí kap Too-tshī Niáu-tshí

Ū tsi̍t-tsiah too-tshī niáu-tshí khì tshūe i tùa tī tsng-kha ê tshin-tsiânn. Tsng-kha niáu-tshí láu-si̍t koh tiâu-ti̍t, i tsin ài tsit-ê too-tshī tshin-tsiânn, jia̍t-tsîng kā khúan-thāi. I àn-nāi too-tshī niáu-tshí tsia̍h bín-tāu, la̍h-bah, tshì-suh kap sio̍k-pháng.

Tsit-ê too-tshī niáu-tshí iōng tsiam phīnn-á kā tsiah-ê tsng-kha tsia̍h-mi̍h phīnn-phīnn leh, kóng, “Gúa si̍t-tsāi bē-tàng liáu-kái, lí ná ē-tàng jím-siū tsiah-ni̍h pháinn-tsia̍h ê tsia̍h-mi̍h. M̄-kú, tse sī it-tīng--ê, tī tsit-tsióng tsng-kha sóo-tsāi, lí bē-tàng ǹg-bāng ū sím-mi̍h khah-hó ê mi̍h-kiānn thang tsia̍h.”

“KaN5lah! Kap gúa tsò-tīn lâi-khì too-tshī, gúa beh hōo lí khùann māi leh, án-tsúann tsiah-sī tsiànn-káng ê sing-u̍ah. Lí nā tī too-tshī tùa--tsi̍t--lé--pài ah, lí tsiū ē kám-kak kóng, kî-kùai, í-tsîng ná-ē tī tsng-kha tùa ē tiâu?”

Thinn beh àm ê sî, tsit 2 tsiah niáu-tshí tsiū lâi kàu too-tshī. Too-tshī niáu-tshí tsin ū lé-sòo, kóng, “King-kùe tsiah-tn̂g ê lōo-tôo, lí it-tīng siūnn beh tsia̍h tsi̍t-kúa tiám-sim lah.” Kóng suah, tsiū tshūa tsng-kha niáu-tshí ji̍p-khì tsi̍t-king tsin-tūa king ê tsàu-kha. Tī hia, in khùann-tio̍h tsin-tsē tshenn-tshau--ê, tsiū tūa-tshùi tūa-tshùi khai-sí tsia̍h ke-nn̄g-ko, tshài-iàn kap kî-tha ê hó-tsia̍h mi̍h-á.

Bô tiunn bô tî, in thiann-tio̍h kî-kùai ê kiò-siann, tsng-kha niáu-tshí tsin kín-tiunn, mn̄g kóng, “He sī sím-mi̍h siann?” Too-tshī niáu-tshí kā ìn kóng, “He sī tshù-lāi ê káu-á teh kiò nā-tiānn.” “Sím-mi̍h!?” Tsng-kha niáu-tshí tūa-siann huah--tshut--lâi. “Gúa tsiah bô-ài tī tsia̍h àm-tńg ê sî thiann-tio̍h tsit-khúan im-ga̍k!” Tsit-ê sî-tsūn, mn̂g hiông-hiông khui--khui, 2 tsiah káu-á tshiong--ji̍p--lâi. In tsiū kúann-kín suan looh. Tsng-kha niáu-tshí kóng, “Gúa beh lâi tńg lah!” Too-tshī niáu-tshí kóng, “ Ná-ē tsiah-kín tsiū beh tsáu?” “ Gúa kam-gūan tńg-khì tsng-kha ún-sim-á tsia̍h tāu-á kap la̍h-bah, mā bô siūnn beh tiàm too-tshī thê-sim tiàu-tánn tsia̍h ke-nn̄g-ko, lim bih-luh!”