《CTT出頭天園地》

I-sap 寓言 34

作者 TLH

34. Hôo-lî kap Oo-a

Ū tsi̍t-pái, tsi̍t-tsiah hôo-lî khùann-tio̍h tsi̍t-tsiah oo-a hioh-tī tshiū-ki, tshùi kā tsi̍t-tè tshì-suh. I tsiânn huann-hì, siūnn kòng, ”Tse hó tshin-tshiūnn sī ūi gúa tsún-pī--ê.”

I kiânn-kàu tshiū-á kha, huah kóng, ”Gâu-tsá, oo-a sió-tsiá. Lí kin-á-ji̍t khùann--khí--lâi tsin súi. Lí ê moo sī hiah-ni̍h-á oo-kim, ba̍k-tsiu sī hiah-ni̍h-á kng. Gúa siūnn, lí ê siann it-tīng kap lí ê gūa-piáu kāng-khúan, pí kî-tha ê tsiáu-á koh-khah hó-thiann. Tshiùnn tsi̍t-tiâu kua hōo gúa thiann khùann māi leh, gúa tsiū ē-tit-thang khíng-tīng lí tsiū-sī tsiáu-lūi ê kua-hiō.”

Hit-tsiah oo-a tsiū kā i ê thâu giâ kûan-kûan, khai-sí tūa-siann a-a-kiò. M̄-kú, tī i khui-tshùi hit tang-tsūn, hit-tè tshì-suh sùa lo̍k-lo̍h thôo-kha, hōo hôo-lî kā khì looh. Hôo-lî kóng, ”án-ne tsiū tio̍h lah, tse tsiū-si gúa beh ti̍h--ê. Kì-jiân lí sàng gúa tsi̍t-tè tshì-suh, gúa mā sàng lí tsi̍t-kù ūe. M̄-thang siong-sìn oo-pe̍h kā lí po, oo-pe̍h kā lí pa-kiat ê lâng.”