《CTT出頭天園地》

I-sap 寓言 38

作者 TLH

38. Iā-pô

Tsiáu-lūi kap Siù-lūi ū tsi̍t-tiûnn tsiok tūa ê tshiong-tu̍t teh beh po̍k-huat. Nn̄g-pîng ê kun-tūi teh tsi̍p-ha̍p, tsún-pī beh sio-tsiàn ê sî, Iā-pô sam-sim lióng-ì m̄-tsai beh ka-ji̍p tó tsi̍t-pîng.

Tsi̍t-tīn Tsiáu-lūi pue-kàu i hioh ê tshiū-á-tíng, kā kóng, “Kap gúan tâng-tsê lâi-khì.” I ìn kóng, “ Gúa sī Siù-lūi.”

Kùe bô jūa-kú, tsi̍t-kúa Siù-lūi kiânn-kàu i hioh ê tshiū-á-kha, giâ-thâu kā kóng, “Kap gúan tâng-tsê lâi-khì.” M̄-kú i kóng, “Gúa sī Tsiáu-lūi.”

Hó-ka-tsài, āu--lâi nn̄g-pīng bô sio-tsiàn, tshiong-tu̍t tit-tio̍h hô-pîng kái-kuat. Tāi-ke lóng tsin huann-hí tsò-tīn teh khìng-tsiok. Iā-pô tsiū tsáu khì Tsiáu-lūi hia, siūnn beh tshap--tsi̍t--kha. M̄-kú, in bô huan-gîng i. I huan-thâu koh tsáu khì Siù-lūi hia, sùa hōo Siù-lūi phah, hiám-hiám-á hōo in u̍ah-u̍ah phah--sí.

Iā-pô tsáu-kàu tsin liông-pūe, bô-bīn thang kìnn-lâng, kóng, “ Gúa tsi̍t-má tsai-iánn lah! Siang-kha ta̍h siang-tsûn, siang-thâu bô tsi̍t-ngauh. Tann, gúa í-king bô pùann-ê pîng-iú lah!”