《CTT出頭天園地》

I-sap 寓言 41

作者 TLH

41. Lôo-lē kap Sai

Ū tsi̍t-ê lôo-lē kiò A-Bûn, tùi i ê tsú-lâng hia thau-tsáu--tshut--lâi, bih tī tshiū-nâ-lāi. I khùann-tio̍h tsi̍t-tsiah Sai tó-tī thôo-kha hainn-hainn-tshan. I tshuah tsi̍t-tiô, u̍at-thâu tsiū tsáu. M̄-kú, Sai bô kā jiok. I kám-kak tsin kî-kùai, tsiū se̍h húan-thâu, kiânn úa khì Sai ê sin-khu-pinn kā khùann. Sai khùann i kiânn úa--lâi, tsiū kā lâu-hueh lâu-tih koh tsíng-uainn-uainn ê kha-tê-á tshun-tshut-lâi hōo i khùann. Gûan-lâi Sai ê kha-tê-á hōo tsi̍t-ki tūa-ki tshì tsha̍k--tio̍h. A-Bûn tsiū kā hit-ki tshì pu̍eh--khí--lâi, koh kā khang-tshùi pau hōo hó-sè.

Sai sûi ē-tàng khiā--khí--lâi, koh tshin-tshiūnn káu-á kāng-khúan tsīnn A-Bûn ê tshiú. Āu--lâi, Sai tsiū tshūa A-Bûn khì i ê siū. Ta̍k-kang lóng khì tshūe bah lâi hōo A-Bûn tsia̍h. A-Bûn tsiū tsiām-sî kap Sai tùa tsò-húe, bô siū-tio̍h iau-gō.

Kùe bô jūa-kú, A-Bûn kap Sai lóng hōo lâng lia̍h--khì. A-Bûn hōo-lâng phùann-hîng, kuainn ji̍p-khì láng-á-lāi. Sai mā hōo lâng kuainn tī līng-gūa tsi̍t-ê láng-á lāi. Tsi̍t-ji̍t, Hông-tè kap huat-kuann lâi beh khùann Sai kap lâng piànn senn-sí. A-Bûn hōo lâng tshūa lâi kàu tsi̍t-ê înn-hîng ê pí-sài-tiûnn. Tsit-sî í-king iau kúi-nā kang ê Sai mā hōo lâng tùi láng-á lāi pàng--tshut--lâi. Sai tsi̍t-khùann-tio̍h lâng-iánn, tsiū khai-sí tūa-siann âu-kiò, sûi tsông kùe-khì beh kā tsia̍h. Sai tsông úa-kīn A-Bûn ê sî, sûi jīn-tshut sī i ê hó pîng-iú. I tsiū thîng lo̍h-lâi tùi A-Bûn iô búe-liu, tsīnn A-Bûn ê tshiú, tshin-tshiūnn káu-á kāng-khúan.

Hông-tè khùann-tio̍h tsit-khúan tsîng-kíng, kám-kak tsin ì-gūa, tsiū kā A-Bûn kiò-kùe-lâi mn̄g. A-Bûn kā i ê kòo-sū tsū-thâu kàu-búe kóng hōo Hông-tè thiann. Hông-tè thiann-liáu tsin kám-tōng, tsiū sià-bián A-Bûn ê tsūe, sù i tsū-iû. Mā kā Sai pàng tńg-khì tshiū-nâ.Ē-hiáu kám-un ê lîng-hûn tsiah-sī ko-kùi--ê, ta̍t-ti̍t tsun-tiōng--ê.