《CTT出頭天園地》

I-sap 寓言 43

作者 TLH

43. Kang-lâng kap Iā-ing

Ju̍ah-thinn ê àm-mî, ū tsi̍t-ê kang-lâng tó-tī tshiū-á-kha teh thiann iā-ing tshiùnn-kua, siau-môo sî-kan. Iā-ing bí-biāu ê kua-siann hōo i thiann-kàu hīnn-á phak-phak. Keh-tńg-kang, i tsiū siat tsi̍t-ê hām-tsénn kā iā-ing lia̍h--khí--lâi.

I tūa-siann kā iā-ing kóng, “Tann lí hōo gúa lia̍h--tio̍h lah! Lí ài ta̍k-kang tshiùnn hó-thiann ê kua hōo gúa thiann.” Iā-ing ìn kóng, “Gúan iā-ing tī tsiáu-láng-á lāi tshiùnn bē-tshut hó-thiann ê kua.”

“Nā án-ne, gúa beh kā lí thiah-tsia̍h lo̍h-pak. Gúa bat thiann lâng kóng iā-ing hang tsò tsiáu-á-pa khì-bī tsin-tsán.”

“Pài-thok leh lah, tshiánn lí pàng gúa tsáu, m̄-thang thâi--gúa. Lí nā pàng gúa tsáu, gúa tsiū kóng sann-hāng pí gúa ê sènn-miā koh-khah kè-ta̍t ê pì-bi̍t.”

Tsit-ê kang-lâng thiann-liáu, tsiū kā iā-ing pang--tshut--lâi. Iā-ing sûi pue-tsiūnn kûan-kûan ê tshiū-á-tíng, kā kóng, “ Tshiánn lí tsim-tsiok thiann. Tē-it, tsu̍at-tùi m̄-thang siong-sìn sit-khì tsū-iû ê lâng kóng ê ūe. Tē-jī, sin-khóo tit-tio̍h ê mi̍h-kiānn ài hó-hó-á pó-sioh. Tē-sann, mi̍h-kiānn nā phah bô--khì, m̄-thang siong-sim.”

Kóng-suah, iā-ing tsiū pue tsáu lah.