《CTT出頭天園地》

I-sap 寓言 45

作者 TLH

45. Tshò-tshâ ê kap Tsûa

Tsi̍t-ê kûann-thinn sî-á, ū tsi̍t-ê tshò-tshâ ê lâng tú tsò-sit tsò-liáu, beh tńg-khì tshù --ni̍h. Tī pùann-lōo khùann-tio̍h suat-tui--ni̍h ū tsi̍t-hāng oo-oo ê mi̍h-kiānn. I kiânn úa-khì siông-sè kā khùann, gûan-lâi sī tsi̍t-búe tsûa, tī suat-tui--ni̍h tàng kàu kiông beh sí lah! I kúann-kín kā lia̍h khí-lâi khǹg tī hing-tsîng hōo i un-lúan, koh kā mooh tńg-khì tshù.

Tsi̍t ta̍h ji̍p-mn̂g tsiū kā tsûa khǹg tī hang-lôo ê thâu-tsîng, kā hannh-sio. I ê gín-á lóng lâi ûi tī pinn--á khùann. Tsûa bān-bān-á koh u̍ah--khí--lâi. Tsi̍t-ê gín-á ànn lo̍h-khì tshun-tshiú kā bong, tsûa sùa giâ-thâu iōng i ê tsiam-gê beh kā kā. Tshò-tshâ--ê tio̍h tsi̍t-kiann, sûi gia̍h póo-thâu kā tsûa tok-tsò nn̄g-ku̍eh!

“Ah!” Tshò-tshâ--ê kóng, “Khó-òonn ê thik-sinn! Tsiânn-si̍t m̄-tsai-iánn thang kám-un!”

Tùi tshò-tshâ--ê lâi kóng, tsi̍n-tsiànn sī hó-sim hōo lûi tsim. I hó-sim kiù tsûa, gín-á sùa hiám hōo tsûa kā--sí. Tùi tsûa lâi kóng, tùi tshing-tshénn ê sî, hiông-hiông khùann-tio̍h tshinn-hūn lâng, ūi-tio̍h beh pó-hōo ka-kī, tong-jiân ē oo-pe̍h kā lâng.