《台灣另類牧師.醫師─謝緯》

| | | 轉寄

3-03 決心報考日本醫專

做醫生是謝緯 ê 願望, tī 醫治病人 ê 同時, mā ē-thang 傳道理,四界去宣揚福音。 Tsit 款醫病方式 ê 自由傳道, koh-khah 是伊自頭到尾所期待 ê。但是, tī 伊 tsìn 前,無一個台灣人是 lia̍h 「醫療宣教」做一生職志 ê , mā 就是講 tsit 種做法並「無例可循」,致使青年謝緯一直處於 tiû-tû (猶豫)、困惑、無助,以及 m̄ 知如何是好 ê 中間。 M̄- koh , tī 神學校研讀神學二年了後,謝緯無 hō͘ 厝裡 ê 人知影 ê 狀況下,開始「偷偷 á」動手準備考醫學院 ê 課程。

伊 tī 1936 年 4 月 20 日 ê 日記上按呢寫,講: 「Tùi tsit 學期開始,需要準備畢業了後 ê 升學考試 lah ,目標是醫學院。但 tsit-ê tāi-tsì 除了 tī tsia ê 朋友以外, lóng未 (boē) hō͘ 人知影。過去我有二擺(高校考試)痛苦失敗 ê 經驗, tsit-pái 絕對 bē-tàng koh 重覆失敗,想 beh 好好 á 打拚用功, iáu-beh 將家己用功 ê 份量,每工 kā 記錄落來。忠實 kā 記落來 ê 話,可能就 bē pîn-toāⁿ lah!」

事實上,謝緯心中 mā 為 tio̍h 神學校畢業了後 tio̍h 先做傳道師,或是 (he̍k-sī) 到日本讀醫學校 teh peh-pak 。1936 年 5 月初 2 到初 9,中國佈道家宋尚節 (1901-1944) 博士 tī 台南神學校操場,搭竹棚仔作為會場,舉行「奮興佈道大會」,聚集了大約 5千人。正當心頭拿 (lia̍h) boē 定, khiā-tī 十字路口徘徊、操煩 ê 謝緯, mā tī 人群中央 (tiong-ng)。聽了宋尚節博士 ê 一 koá 話了後,伊 hit 粒困惑 ê 心, tsiah 得 tio̍h tháu 放。 Tī 明白上帝 ê 旨意了後,伊 koh-khah 堅定家己 ê 方向。





● 宋尚節博士1936年來台舉行佈道大會。








伊 tī 日記頂面按呢寫: 「我想宋尚節博士 ê 話,已經 hō͘ 我確定家己 ê 生活方針 lah。當我因為是 m̄ 是 thang 進入醫學院 á 陷入苦悶 ê 時,聽了宋博士 ê 一 koá 話,原本內心 ê 自責竟然奇妙消失。 M̄-nā 按呢 nā-tiaⁿ ,就 tī hit 瞬間 (sùn-kan) ,我已經堅信我所做 ê 決定是正確 ê 。就 ná 準宋博士所講 ê ,或做傳道師,或做醫生, lóng 是為上帝 teh 工作。因為 tsit 句話,我 ê 內心有非常清楚 ê 感動。同時, ùi tsit 時了後,我立志無因為名譽心(虛榮心) iô-tsuah , tùi 按呢 beh 受純然 ê 聖化,做上帝 ê 器具來活動。若 ē-tàng 堅強向 tsit ê 目標邁進,我 ê 名譽心就會消除。上帝 ah! 我將家己獻 hō͘ 祢,做祢 ê 器具,請祢歡喜接納。

Tī 宋尚節 ê「奮興佈道大會」了後,神學校 mā 組一 ê 佈道團,前往附近去佈道, 5 月 15 日這一工,是謝緯第一 pái tī 街頭佈道,地點是 tī 現今新豐鎮公所前 ê 廣場。神學校畢業 ê 前一年, 1937 年 4 月 25 日 ê 日記上 koh 看 tio̍h 謝緯內心 ê 爭戰: 「我迷路 la̍h 。一年了後我 ài 怎樣行?去日本內地就讀? á 是照別人 ê 推薦,冒險渡洋(去美國)?去日本是照家己 ê 計畫,渡洋有真大 ê 吸引力……Aih,beh 選擇 to̍h 一邊 tsiah 好?有人講渡洋 mā 是另外一種選擇,不過 soà 破壞了我 ê 計畫……tio̍h 怎樣處理卡好?」