《台灣另類牧師.醫師─謝緯》

| | | 轉寄

自序:「是舊,猶久永新」話『謝緯』




● 謝緯 ê 小弟謝綸長老/藥劑師(1919-)。
( Hip tī 2011 年 1 月 17 日 南投市 謝寓 )




1959年「八七水災」ê 時,我 toà-tī 南投鎮平和國小附近 ê 「下庄 á」, khiā 家「塗埆厝」(thô͘-kat-tshù)去 hō͘ 大水沖倒,家伙全部流去。教會 ê 禮拜堂暫時變做收容所。阮 tī-hia 住幾工了後,謝緯 ê 小弟謝綸(1919-)長老 tō 主動來向我 ê 阿公講,in ē-tàng 將 in tī 南投國校邊三塊厝仔 (saⁿ-tè-tshù-á)「園仔」( hn̂g-á )內底 ê 「馬廄」hō͘ 阮全家「無限期」khiā 起。 阮就搬過去住。直到1971 年 8 月,我到彰化讀高中, tsiah 搬離開馬廄。 Tī 這12年久期間,謝家除了無拿厝稅以外,謝綸長老夫婦 koh 時常送阮物資,幫助阮度過生活難關。





● 細漢 bat 住過 12 年 ê 「馬廄」。
( Hip tī 1979 年 8 月 14日 )



細漢 ê 時,我 tī 南投教會參加主日學、兒童獻聲隊、青年團契(TKC)、拜三祈禱會、拜五家庭禮拜、拜六聖歌隊、夏季學校、野外家庭禮拜等活動。每工放學了後,就走去教會 phah 乒乓,暗時 koh 去 hia 寫功課,差不多以教會為家。有時 tsūn , kap 教會 ê 小朋友到「大同醫院」,不是去看病,是大家同齊去 tshoē 謝家ê gín-á 作夥 sńg 。大同 ê gín-á ,大部分比我 khah 大漢, in 並無因為我 ê 出身寒微就有什麽看輕 ê 意思。 Tī 大同病院, khah 大部分 ê 時間看 tio̍h 謝緯夫人楊瓊英(1921-)醫師 teh 看診,真少 tú-tio̍h 謝緯醫師。

Mā 是 teh 讀小學 ê 時,一 ê 冬天 ê 半暝,我感冒發燒,阿公隨時趕緊走去大同病院 tshi̍h 電鈴 hoh kiù lâng ,彼時已經過了看診ê時間。伊向開門 ê 人說明來意了後,過幾分鐘,謝緯醫師隨時 mua 一領大衣,手捾 kha-báng kap 聽診器出門。雖然北風陣陣吹 tio̍h 冷冷清清 ê 街路,伊猶原精神飽足, tī 冷風中坐三輪車親自來厝裡「往診」。 Tī 伊為我問診完 koh 注射了後, tō 邀請阿公、阿嬤同齊祈禱,懇求上帝憐憫 tsit ê 幼嫩 ê 身軀, hō͘ 伊 thang 得 tio̍h 醫治,早日康復。了後,謝緯醫師請阿公 kap 伊同齊坐三輪車到診所 the̍h 藥仔。阿公 tńg 來厝了後,真感激對阿嬤 kap 我講,「阿緯仙」無 kā 咱 the̍h 半 sián 錢。

另外,有一擺 tī 學校邊 ê 店仔買物件食中晝。過了無幾分鐘,腹肚忽然真痛,我面色反白, tī 土腳滾 liàn 。同學看 tio̍h tsit款情形,隨時前來關心。 In 問我 bueh 去 tó 位看醫生,我就直接講:「大同」!雖然是中晝時,大同病院 iáu 有門診患者,楊瓊英醫師放落 tú teh 做 ê 工,隨時來處理我 tsit位「急診」 ê 小朋友。診斷結果,是急性腸仔炎。注射、食藥仔了後, tī 診療床歇睏一下,我 koh tńg 去上課。醫藥費,猶原是免 lah。倒 tī診療床 ê 時,我無看 tio̍h 謝緯醫師, kan-ta 看 tio̍h 楊瓊英醫師繼續看診,謝綸藥師 tī 藥局內面無閒 teh 配藥仔。我心內 teh 想,謝緯醫師走去 toh 位 leh ?

Khǹg tī 心內已經很久 ê 往事,是點點滴滴存在 ê 問題, mā 是我 kap 謝緯牧師/醫師親身接觸 ê 經驗。同時, tī 小小 ê 心靈上,產生了好奇 kap 疑問:

為什麼伊是牧師, mā 是醫生?既然是牧師,伊怎(thái)會無 kap 其他牧師仝款, tī 一間固定 ê 教會內底講道?伊是醫生, thái 會日時頭 á tī 大同病院內面真少看 tio̍h 伊親像別ê開業醫 hit khoán 為病人看病, hoán-tńg khah tsia̍p 看 tio̍h 牧師娘楊瓊英醫師 teh 看診?


1970 年 6 月 17 日下晡,謝緯 tī 南投縣名間鄉不幸車禍身亡 ê 壞消息,傳 tńg lâi 南投小 só͘-tsāi。為 tio̍h 辦理治喪事宜,我 mā tī 教會幫忙寫訃音,寄 hō͘ 一千 goā 間教會以及相關單位。6月22日出殯 hit 工,先 tī 南投教會舉行告別式,續落來 soá 去墓園。 Tùi 禮拜堂內、外 e-e 陣陣 ê 各地來賓,以及送葬行列所經過 ê 兩旁街路,我所看 tio̍h ê 是 hiah-ni̍h tsē ê 民眾,目屎 tsho̍p-tsho̍p 滴 teh 來 kā 伊送別。親身在告別禮拜 kap 送葬行列 ê 聖歌隊 ê 中間,我感受 tio̍h tsit 種情景,比「做醮」 ê 場面 iáu koh kah 大。心中禁 bē-tiâu gông-ngia̍h :為何一個人 ê 過往,會有 tsiah-nih tsē ê人,無論是熟識 á 是bô 熟識 ê ,來為伊流目屎,毋甘伊來離開世間?

2010 年 tú-á 是謝緯歸天40週年,將我 ê 碩士論文《謝緯 kap 台灣醫療宣教》改寫做《台灣另類牧師●醫師─謝緯》,出書來紀念伊。若 ài kā 本冊列為謝緯傳記,資料猶有 khah 不足;講它是回憶錄, mā 難登大雅之堂,我 kā 它稱做「故事」。故事中 ê 主角,有充滿傳奇 ê 一生,伊感性 ê 另外一面,tsit-sut-á to 無掩蓋 (khàm) 來透露出真性情。 Tī 寫作 ê 過程中,謝緯 ná 親像就 tī 我 ê 身邊,伊同時 kap 我 tī 星空下對話;夢中,伊 tùi 我微微 á 笑。

5月初,謝緯牧師娘楊瓊英醫師回台, hō͘ 我有機會 kap 榮幸將文稿 the̍h 到南投,請伊過目指正。伊猶原親像 khah-tsá hiah-nih 親切,且(koh)精神真好、身軀勇壯。言談 ê 中間,散發出慈母溫柔和藹、疼惜晚輩 ê 一面。這, hō͘ 我想起當年,伊身兼太太、母親、媳婦、牧師娘、醫生娘、醫師等無仝角色, tī 大家族中,相夫教子,行醫濟世,來幫助先生完成心願 ê 種種。伊是一位堅強而且智慧 ê 女性。阮同齊回顧幾十年前 ê 老相片,費神細思相片中 ê 人 kap 代誌。記憶,跟 tùi 已經變黃 ê 相紙, tńg 去到以前;回憶, tī 不知不覺中,說明 tio̍h 「是舊,猶久永新」(Sī kū, iáu-kú éng sin) ê故事。

● 楊瓊英牧師娘/醫師(1921-)。( Hip tī 2011 年 5 月 10日 南投市 中心診所 )

Tsit 本冊會 thang 順利出版,感謝上帝 ê 保守。同時,藉 tioh tsit pái ê 機會,向真 tsē「無名英雄」表示我 ê 謝意:
楊瓊英牧師娘、汪清醫師 kap 伊 ê 夫人慧華姐、李慶耀長老、林榮章長老 kap 謝賜悰兄等,提供珍貴 ê 相片 kap 文獻。 Iáu 有,謝綸長老、謝光亮醫師、吳慕聖副院長、盧俊泰醫師、闕盟昌長老、黃敏生醫師、林榮章長老、陳耀東長老、阮宗興長老、趙文崇醫師、吳瑤瑛老師、劉麗玲老師、郭文隆長老、張金城牧師、郭寬城牧師、陳靜芝藥師、野間 晃 ( Akira Noma ) 副教授 kap 我 ê 牽手雅萍、tsa-bó͘-kiáⁿ 聖音等,對 tī 本書提供寶貴意見,並參與校對工作, mā 時常hō͘ in 鼓勵 kap 鞭策;真 tsē 未赴提起 tioh ê 親朋好友, tī 背後恬恬 á teh 祝福。若無, kan-ta 靠頭腦複雜、心思單純 ê 我,是無法度完成任何 khāng-khoè ê 。

另外,楊瓊英醫師、莊萬壽老師、鄭仰恩老師 kap 林榮章長老 tī 真無閒 ê 中間, koh 特別撥時間為 tsit 本書寫序;鄭瑞明老師、趙文崇醫師、闕盟昌總經理 kap 徐光宇總經理等恩師至友,樂意推薦本冊,一併致上謝忱。也真盼望各位先輩繼續指正。

最後,特別感謝前衛/草根出版社林文欽社長,無一點仔躊躇(tiû-tû)就歡喜替我出版這本書,編輯團隊辛苦編排、製版、付印, hō͘ tsit 本書 oē-thang 順利誕生,獻 hō͘ 各位讀者。


陳金興

Tī 2010年5月28日 脫稿
Tī 2011年6月10日 修改
彰化 白沙坑