《台灣諺語鹹酸甜》

爸.一頭，母.三擔。（獻hōo偉大ê母親）

作者 Lahjih

自從hit工父母創造我生命，十月懷胎，lóng tùa-tī阿母ê子宮內，病囝真厲害，腹肚tsiah大kâi，心情鬱卒，偷偷流目屎；阿爸kan-nā會曉歡喜我beh來，恬恬期待。ûann-á一聲來到世界，阿母thiám-kah嘴á裂鰓鰓，為tio̍h幼tsiN2e5紅嬰，一目nih都m̄敢離身邊，beh睏ànn-tī keh-lang-kha,食奶惜tiàm胸前，tshūa尿、溢奶，放屎、洗浴，hōo阿母真無閒；阿爸tshāi-tiàm阿母身邊聽命令，心情清清。一歲兩歲手裡抱，三歲四歲土腳sô，iah-beh洗衫，iah-beh煮食，iah-beh顧tsit-ê金囝，阿母m̄-bat講一句「厭」，拖磨mā好，快樂mā好，為tio̍h金囝，阿母lóng真心適；阿爸kā我抱tshit-thô，lóng tī心情好。五歲六歲beh讀冊，學校那leh行灶腳，驚我tùe人be7tioh8，逐日陪leh讀冊，驚我bē大，送飯包koh陪我食，ùi入學到出業，學校有i tsiânn tsē腳跡；阿爸關心--ē是「習題有寫抑無寫？」十一二歲beh tńg大，生理、心理lóng要緊，tsa-poo會變聲，愛相扑，莽莽撞撞tio̍h-ài教，tsa-bóo囡á ê ta̍p-tih tio̍h-ài thūa，知影M.C是啥？tīm補、營養，裝súi、買奶裌á，tio̍h阿母tsiah知影；阿爸ê任務，付出錢銀，以外--ê可以免聽。升學競爭，阿母上犧牲，早起款飯包，送出門，一分一秒等，期待平安入門，為tio̍h考大學，讀到一半暝，阿母仝款等到三更，拴茶湯、泡牛奶，驚我寒，隨時kā我添衫；阿爸為tio̍h一家會生活，已經入眠準備明á載koh拚。ùi細漢kā阮tshiânn，tshiânn kah大漢beh嫁娶，阿母iáu原bē放心，不sám時都leh kā我問，你有快樂無！恁翁á某tio̍h-ài和好！知影阿母m̄是leh lô-so,因為阮mā已經是人ê父母；tsit-tsūn ê阿爸，阿母好，i就好，好好好！bē lô-so。「爸.一頭，母.三擔」，講去無tîng-tânn，生囝、飼囝、tshiânn囝，lóng是靠父母，阿爸是山，hōo阮倚靠，阿母ê疼，阿母ê惜，ânn阮大漢，是心靈ê水泉，偉大ê母親，永遠是阮阿娘。

【註解】：1.爸.一頭，母.三擔：一擔分兩頭，三擔是一頭ê六倍。2.thiám-kah嘴á裂鰓鰓：雖然生囝艱苦，但是心內歡喜。3.幼tsínn：幼嫩。4.ànn-tī keh-lang-kha：[在胳肢窩下呵護]。5.溢奶：ik-ling。6.洗浴：sé-i̍k。7.tshai7-tiàm：[站在]。8.iah-beh：[又要，也要]。9.厭：ià，討厭，厭倦。10.心適：sim-sik,趣味。11.那leh行灶腳：[像出入廚房那樣，時常。]12.tùe人be7tioh8：[跟不上別人]。13.tńg大：進入青春期。14.ta̍p-tih：lô-so代誌。15.tio̍h-ài thūa：需要學習。16.tīm補：煮補品。17.裝súi：[打扮]。18.M.C：月經（menstrualcycle）。19.奶裌á：ling-kah-á，[乳罩]。20.添衫：thinn-sann。21.tshiaN5：養育栽培。22.不sám時：隨時，常常。23.無tîng-tânn：無m7tioh8。24.ânn：[呵護]。25.出業：似為日語「卒業」之轉；畢業也。