《大人囡á詩》

Pha̍k Ji̍t-thâu...曝日頭

作者 Li KhinhuaN

listen
Sì-ge̍h hā-sûn
四月下旬
Ji̍t-thâu tshiò, hó khì-un
日頭笑，好氣溫
Ng-á beh pòo thàn tsit-tsūn
秧仔 beh 播趁這陣
Kha liâu tshân-tsúi niû tsúi-un
腳潦田水量水溫
Thâu giâ tsi̍t-lia̍p tūa ji̍t-thâu
頭 giâ 一粒大日頭
Giâ kah sin-khu suah un-un
Giâ kah 身軀煞 un-un
Thǹg-pak-theh, kūann-tsúi tsi̍t-tsūn tsi̍t-tsūn
褪剝裼，汗水一陣過一陣
Tsûan-sin pha̍k kah oo-thûn oo-thûn
全身曝kah 烏thûn 烏thûn
Lâng kóng gúan-ê phûe-hu tà oo-hûn
人講阮 ê 皮膚罩烏雲
Sì-ge̍h hā-sûn
四月下旬
Ji̍t-thâu tshiò, hó khì-un
日頭笑，好氣溫
Ji̍t-kng-i̍k beh pha̍k thàn tsit-tsūn
日光浴 beh 曝趁這陣
Bikini sin-tsâi tsin tsiâu-ûn
Bikini 身材真 tsiâu 勻
Tsiànn-bīn ù sua-than ê sio-un
正面ù 沙灘 ê 燒溫
Pūe-bīn khip-siu ji̍t-kng ê ióng-hun
背面吸收日光 ê 養分
Thǹg-pak-theh, kūann-tsúi tsi̍t-tsūn kè tsi̍t-tsūn
褪剝裼，汗水一陣過一陣
Tsûan-sin pha̍k kah oo-thûn oo-thûn
全身曝kah 烏thûn 烏thûn
Lâng kóng gúan ê phûe-hu tit búan-hun.
人講阮 ê 皮膚得滿分
--2003/4/29 Harvard