《當上帝開嘴講台語》

 | | | 轉寄

4.4 信息傳達風格ê比較-5

作者 梁淑慧 2008.05.11

四、「神聖典雅」kap「淺白通俗」ê取捨。

《聖經》是透過人類ê語言來傳達「上帝ê信息」。神聖典雅ê語言會tàng hō͘讀者感受tio̍h莊嚴權威ê氣氛，khah容易啟發宗教情操；淺白自然ê語言會tàng幫助信徒充分掌握信息，身體力行。每一個信仰群體抑是個人對《聖經》譯本ê要求lóng有無仝ê重點，這mā是必須ài有無仝ê譯本hō͘讀者選擇ê原因。

Tī一般人ê印象中總認為：既然稱做「經」，to̍h應該具備優雅ê文藻kap古雅深奧ê術語，所以khah淺白ê譯本無一定khah受歡迎。Nida（1988）就bat指出：淺白好了解ê聖經譯本可能bē hō͘人接受，有bē少人khah kah意in並無完全看有ê譯本。譬如《詹姆斯欽訂本》（KJV）內底hit種古雅、晦澀ê用詞kap語法形式，若親像hō͘ in koh-khah會tàng感受tio̍h上帝ê權威。

若án-ne，咱tńg去《聖經》原文來看，新約作者寫ê希臘文kám mā是神聖典雅ê文體呢？首先，就新約作者ê身分來看，作者群中真少是學院派出身ê學者，反tńg是有收稅ê，mā有漁夫，in所熟sāi ê語言正是市井流行ê日常普通用語。Koh來，tī西元十八、九世紀時有真tsē考古ê新發現，尤其十九世紀末德國學者戴斯曼（Adolf Deissmann）發現《聖經》ê希臘文並m̄是「聖靈ê希臘文」（註86），是非常平凡ê普通希臘文，是西元前300年至西元後330年亞歷山大統治時期所推行ê普通話（註87）。所以新約是當時人人lóng看有ê書，新約ê希臘文並m̄是專屬於《聖經》--ê，是十分淺白通俗ê白話文。

1971年《現代中文譯本》當teh翻譯ê時，以Nida為首ê一群專家bat擬定一篇〈國語新約翻譯指導原則〉，房志榮神父將其中一部分發表tī《神學論集26》（1976）。Tī「原文kap譯文之間ê關係」一節所提出ê原則如下：

1.動態ê（實質ê）相等khah贏形式ê相投合。
2.脈絡意義ê連貫一致khah贏語詞文句ê一致。
3.口語形式khah贏書寫ê形式。
4.中學程度（抑是十八至廿五歲）ê人所用ê話khah贏比in koh-khah老抑是koh-khah少年ê人所用ê話。
5.今仔日khah普遍ê國語khah贏地區性ê、各教派ê、抑是khah傳統式ê國語。
6.譯文必須hō͘基督徒kap非基督徒平平看有。

以上tsiah-ê原則to̍h是「功能對等」理論ê實踐，若將文中ê「國語」改做「台語」就thang算是「紅皮聖經」kap《現代台語譯本》所遵循ê翻譯原則。唯一ê無仝是tī對象ê設定上，「紅皮聖經」是以「連未受過教育ê人lóng會tàng聽有ê口語」來翻譯（註88），所以「紅皮聖經」是三個譯本中siōng淺白通俗--ê。

自從《巴克禮譯本》出版（新約1916年、舊約1933年）到taⁿ，一直lóng是教會中唯一使用ê台語譯本，tī欠缺比較ê情況下，文體風格ê問題mā無存在--ah。經常tī教會活動ê信徒，teh kap教會外人士交談ê時往往會tī無意間加入一寡《巴克禮譯本》ê用語，是一般人khah少聽tio̍h抑是khah少用tio̍h--ê，所以tiāⁿ-tiāⁿ有人感覺教會信徒所講ê台語「用詞優雅」。M̄-koh對目前教會teh推動福音來講，教外人士閱讀《聖經》ê困難，常常是基督教用語kap現代人日常用語中間ê分歧。如今新ê台語譯本to̍h beh出現ah，習慣《巴克禮譯本》ê信徒kám是會tàng接受《聖經》用khah通俗ê語言來寫？一般非信徒ê讀者kám會因此來增加？Tsiah-ê lóng是譯本風格所帶出ê問題，mā值得日後深入研究。

註86：早年歐洲各大學ê希臘文課程所教授ê差不多lóng是「古典希臘文」，研究古希臘哲人ê作品到有淡薄仔根基了後才修讀新約。學者發覺新約中ê希臘文kap「古典希臘文」有真tsē無kāng款ê所在，m̄-koh koh m̄知應該如何來解釋，所以in認為：新約中ê希臘文是透過聖靈ê啟示才產生ê另外一種希臘文，所以kā伊稱做「聖靈ê希臘文」。

註87：本段考古ê史實詳見周聯華（1980）《新約概論》頁3-5。

註88：Tsit個訊息由當年參與「紅皮聖經」翻譯工作ê駱維仁博士所提供。