《哈佛台語筆記》

| | | 轉寄

講演旅行第一站:鳳凰城

本底我是真愛飛來飛去ê人,足愛去機場,到機場我會 feel at home,機場有厝裡ê感覺,輕鬆、自由ê感覺。911事件以後,這個感覺煞無去。

波士頓ê Logan 機場是彼工恐怖分子劫機ê所在。Tsit-má檢查特別嚴,要求旅客愛提早三點鐘到。11:45 ê飛機,我透早uì厝裡出發,心內有一款怪怪ê滋味。坐地下鐵轉二線會到。紅線轉青線轉藍線。今仔日ê紅線自動系統歹去,愛用人工處理,所以每一站攏停真久。M̄知是慣勢啊,抑是修養好,車內ê人表情並無甚物變化,無甚物人結目頭,無人ngāu-ngāu念,有時會有一、二個仔人無beh koh等,恬恬出去。

到機場已經tshun無夠二點鐘。規個機場冷清清,無幾個旅客。穿迷彩戰服ê海陸仔負責安全檢查,警察全副武裝se̍h來se̍h去。海陸仔看我ê哈佛ID,問我是教甚物,我講教台語。Kui身軀檢查,雙手thián 開那teh飛ê姿勢,據在in用儀器、用手徹底檢查。心內m̄是真爽快,有過去台灣戒嚴時期無爽快ê回憶浮起來腦海。

Kui台飛行機坐無3分1。聽講進前幾禮拜koh khah慘,捌有一台載一個旅客ê紀錄。FBI抵koh警告這個週末有可能會koh有親像911 ê大攻擊。逐個旅客攏真sîng恐怖分子,感覺飛行機小可teh轉彎,飛行機lòng入去世貿大樓爆炸ê鏡頭不時出現。

Tī雙子城轉機,這回tio̍h坐有九成。準時到位,坐6點半鐘ê飛行機,uì厝裡算起總共12點鐘。時差3點鐘,溫差beh kah 50度。機長宣布鳳凰城beh到啊,我探頭kā看覓,有一寡山,禿禿,鬆鬆,ká-ná是幾堆沙堆。機場出口升降機兩旁是真正ê沙漠山ê地層切面,規個kā搬來tshāi,大自然就是上界suí ê雕刻作品。

鳳凰城ê名,聽講是因為有一個英國作家來tsia ê時,欣賞伊落日ê suí,講那像一隻鳳凰。我想嘛有可能是因為伊ê溫度真高bē輸一隻火鳳凰。

M̄捌來過遮,叫是真sabisi ê沙漠,其實是真現代化ê都市。鳳凰城有50萬人口,Arizon州立大學有四萬學生。Arizona是這幾年來人口成長上大ê州,因為伊無寒天,無天災,生活費khah 低,真濟人攏來tsia退休。Intel、Motorola等高科技ê大公司koh tī遮設廠,帶動伊ê成長。參台灣關係密切ê高華德參議員是這州ê議員,所以長期以來台灣ê採購團攏來遮買棉花、電纜。雖然是沙漠,伊有uì科羅拉多河用圳接水來,雖然規年透天無甚物雨水,伊猶有tshun 水通賣hō͘隔壁ê Nevada州。植物以棕櫚科、仙人掌科為主,街路雙旁及安全島嘛有路樹,愛時常沃水,不過攏矮矮啊,無真青翠。

Arizona 州立大學有一個台灣同學會、一個台灣研習社。 台灣同學會就是以前ê中國同學會,參大部份ê大學仝款,若m̄是家己改名,就是hō͘學校要求改名。以前beh kā中國同學會改做台灣同學會是無可能--ê,tsit-má攏偷偷仔家己改過來。台灣研習社是真正有台灣意識ê學生組成ê社團,以辦活動為主,因為真認真推動台灣文化,今年得著李雅彥紀念獎。現任社長是李寵珍,爸爸是新住民,媽媽是福佬人。伊來kā我接機,安排參幾位學生做夥食暗頓。In ê指導老師是謝若蘭教授,13冬前我大一英文ê學生,猶會記得我上課攏講英語,要求使用英英詞典,連我捌叫伊起來解說叨一字單字都會記得。伊是讀Justice,研究集體人權--ê。

拜六ê埔三點演講,題目是『台灣文學ê悲情及壯志---兼談殖民語言政策ê影響』。In用我tsah來ê『海翁宣言』海報佈置會場,貼kah滿四界,我這首詩ê海報確實設計了有夠氣派。

演講煞,接落去參加在地FAPA (台灣人公共事務協會) ê年會,會長陳嘉彬醫師,是一個齒科醫生,移民來tsia 13冬,伊是親目tsiu看鳳凰城大漢ê人,因為伊抵來ê時kan-nā 8萬人。 總會會長吳明基教授親身uì Dallas 來報告會務。FAPA 以前ê工作重點tī促進台灣ê民主、人權,現在主要是台灣ê安全。FAPA 當teh推sak ê工課,最近因為911事件,kui-ê停--落-來,美國國會現主時除了反恐怖議題以外攏無心處理。明年,FAPA beh轉去台灣開年會,李登輝、陳水扁、呂秀蓮、張俊雄攏有答應beh來致辭。FAPA有teh替台灣做代誌,大家心內攏清楚。FAPA有beh學習以色列人ê國會遊說團體AIPAC ê做法,除了華府辦公室以外,tī重要ê都市設區域辦公室。AIPAC總會有150個專職人員,各區域攏有十外個人上班。Tī美國ê 猶太人大概有五十萬人,其中kui十萬人攏是百萬富翁,咱台灣人bē當參in比,不過in運作ê模式值得咱學習。

禮拜透早轉來,鳳凰城ê旅客真濟,有可能真濟人來看野球,昨昏彼場比賽,比Arizona ê歷史koh khah悠久ê紐約洋基隊去hō͘ 抵成立三冬ê Arizon隊拍敗。Kui-ê鳳凰城有歡喜ê熱情,親像展翼ê鳳凰,tī空中飛來飛去。鳳凰城ê台灣人嘛是siáu野球siáu kah連食飯攏teh講球經,開會ê時koh暗靜派人出去看電視轉播。這個機場m̄是海陸仔teh檢查,m̄-koh嘛是無凊采。提早二點鐘來,koh排kah lò-lò長,隊龍áu二、三摺,連鞋仔嘛愛褪--起-來,in tshiau身軀進前攏會禮貌的(tik) kā你講:『kā你tshiau身軀敢會使?』,一個人tshiau,koh有一個人tī邊仔kā伊監督。

坐tī窗仔邊,沿路看土腳ê景緻,雲海過去,彎彎曲曲ê溪流,反光親像鉛抵溶--去,倒落去容器ê時,熱度真kuân hit款ê閃亮。土地除了有整齊ê四角形、長篙形、梯形以外,有真濟ká-ná用圓規畫ê圓形,我無清楚he是m̄是農業用途ê土地規畫,非常sîng以幾何圖案為主體畫出來ê現代畫。我足認真欣賞,希望beh kā機場hō͘人tshiau身軀所引起ê戒嚴ê感覺,kā飛機lòng入去世貿大樓爆炸ê鏡頭攏kā放hō͘ bē記--得。

2001-11-05

(Tsit篇本底是《哈佛台語筆記》輯一 Joornal•筆記-哈佛校園聽著台語ê鐘聲ê第五篇)