《哈佛台語筆記》

 | | | 轉寄

美國國旗iāⁿ-iāⁿ飛

作者 李勤岸 2007.05.13

Uì台語教會轉來，路--裡有時會有一陣焦樹葉仔走--過，真sîng sô真緊ê沙毛蟹，hiông-hiông看--著，攏會有beh去踏擋ê衝動，驚kā in kauh--著，kā in kauh--死。

沿路ê樹仔攏光禿禿--啊，規排光禿禿ê樹仔，khiā tī 寒風中，嘛有伊ê悽涼ê suí。經過小鎮，插規排ê國旗，足豔麗足tshiaⁿ-iāⁿ ê國旗，插tī彼排稀微、蕭條ê樹仔中間，感覺真唐突。

阮公寓頭前ê電火柱，一向有插一支國旗。這個阿靈鎮，這條 Massatsusetts大道，當初時獨立戰爭抵開始就是戰場，tuà遮ê人有插國旗ê傳統，會當瞭解。911事件以後，本底安靜安靜ê國旗忽然間活動--起-來。靠路邊ê窗仔有人tshāi二支國旗拍叉仔。有ê kā 窗仔當做khang-páng，展出各色各樣ê星星條條。公車司機後壁ê 公佈欄本底攏是貼廣告，忽然間攏貼飄揚中ê國旗。地下鐵出口彼個公車站邊仔ê石版頂有人用石頭仔刻一支強beh飛起來ê國旗。連路邊樹林--裡嘛有國旗掛tī足高ê樹頂。差不多逐台轎車ê天線攏有掛國旗。小卡車後壁空空，載一支特大號ê國旗，嘛有載二支--ê，駛真緊，風sǹg-sǹg叫，旗仔phiat-phiat叫，我心內攏一直連想著紅衛兵夯giâ大紅旗beh四界去鬥爭ê情景。哈佛大學校園路邊規排電火柱攏縛一對抑是二對ê小國旗；大門口彼條街頂kuân用線牽--過-去，坦橫ê大面國旗tī路中，tī空中，iāⁿ-iāⁿ飛。有人甚至iah出南北戰爭彼陣ê國旗，十三粒星圍做一個同心圓，可能按呢khah會當表達團結戰鬥ê意志。有ê旗猶teh哀傷，降半旗，大部份ê旗已經全面昇直，四界飛來飛去，耀武揚威。

報紙播講tī New York真濟阿拉伯人hō͘人jiok leh拍，嘛有印度人hō͘人拍，因為頭殼頂un-na縛布仔掠做是阿拉伯人。阿拉伯人tī這個時陣上好mài出來，beh出來，上好頭巾改用美國國旗做，上好身軀koh用國旗包--leh。

聽講隔壁彼間大學學生上課ê時真激動，拍算beh休學去做兵。

有人 tī網路傳講幾點幾分，天抵暗落去ê時，大家攏the̍h一支蠟條，同時點hō͘ to̍h，beh uì太空衛星hip--落來，規個美國攏點蠟條，會是蠟條光照kah明明明ê一幅美國國旗。

我看真濟人ê衫，胸前攏有結一個國旗做ê細細ê pat-tsih。

Tī 景氣真bái ê這個時陣，大小不一、各形各狀ê 國旗攏teh搶貨、teh 欠貨、teh補貨。

賣國旗ê人趁著大錢。聽講有真濟台灣ê生理人嘛有貿--著。

目睭tsiu前不時浮出小卡車載二支大旗hiông-hiông駛過大路；耳邊不時有風搧著國旗phiat phiat叫ê聲音。

每工拍開電視新聞，攏是一幅佔滿規銀幕ê 國旗，條紋海湧一般，tī奮進ê配樂中溢來溢去。然後，報導美軍tī阿富汗轟炸ê戰況。那像每一幅國旗攏化做一粒一粒炸彈，去teh轟炸中東一個散赤、人民平均性命無夠40歲，全國70-pha ê人殘廢，叫做『恐怖分子』ê國家。

2001/11/12

（Tsit篇本底是《哈佛台語筆記》輯一 Joornal•筆記－哈佛校園聽著台語ê鐘聲ê第6篇）