《《原鄉．夜合》 客語詩集》

 | | | 轉寄

時間ke網床 Sṳ̀ kiân ke mióng tshòng

作者 曾貴海 白話字：邱淑華 2008.02.17

時間牽著長長ke幼絲
Sṳ̀ kiân khiân tén tshòng tshòng ke yu sî
編織軟爽ke網床
Piên tsṳt ngiôn sóng ke mióng tshòng
虫仔撞入來
Tshùng é tshong ngi̍p lòi
人心像搖籃晃來晃去
Ngìn sîm tshiong yèu làn kòng lòi kòng hi

日頭跋過山崗河壩田舍都市大海
Ngit thèu pak ko sân kông hò pa thièn sa tû sṳ thai hói
朝晨暗晡跈上跈下
Tsêu sṳ̀n am pû thèn sông thèn hâ
這邊有人出門上工
Yá phién yû ngìn tshut mùn song kûng
那邊有人睡目發夢
Ke phién yû ngìn soi mu̍k pot mung

冷風吹過，燒暖又來
Lâng fûng tshôi ko, sêu nôn yu lòi
花開葉落四季輪
Fâ khôi ya̍p lo̍k si kui lìn
細妹仔照著四季ke大鏡仔
Se moi é tseu tén si kui ke thai kiang é
一心想要打扮到比花靚
Yit sîm sióng oi tá pan to pí fâ tsiâng

拜新丁又送葬
Pai sîn tên yu sung tsong
過節又王爺生
Ko tsiet yu vòng yà sâng
計算生命ke長短
Ki son sên miang ke tshòng tón
一分一秒一點鐘一日一年
Yit fûn yit méu yit tiám tsûng yit ngit yit ngiàn
算到世界沒愛你
Son to sṳ kiai mò oi ǹg

其實沒麼介按做時間
Khì sṳt mò mak ke ôn tô sṳ̀ kiân
只有光暗ke影仔
Tsú yû kông am ke yáng é
沒麼介按做四季
Mò mak ke ôn tô si kui
只有色彩千變萬化ke妝扮
Tsṳ́ yû set tshái tshiên pien van fa ke tsông pan
纏著＜我＞算日節
Tshàn tén ngài son ngit tsiet
沒時間ke世界
Mò sṳ̀ kiân ke sṳ kiai
係麼介世界
He mak ke sṳ kiai
沒四季ke人間
Mò si kui ke ngìn kiân
係麼介人間
He mak ke ngìn kiân
只有恬恬ke土地知得
Tsṳ́ yû tiâm tiâm ke thú thi tî tet