《林茂生博士論文》

| | | 轉寄

《日本統治下台灣ê學校教育》—其發展以及有關文化ê歷史分析kah探討



Tī欣喜中參雜tio̍h hō͘人phut-phut-tiô ê圓滿情緒,我提筆為先父林茂生博士ê博士論文寫序。Tsit篇論文是tī 1929年完成,先父mā因為án-ne來獲(he̍k)得哥倫比亞大學ê博士學位。Tī論文完成七十一年後ê tsit時tsit刻,終於ē-tàng出版面世,hō͘ 我koh khah感受tio̍h深刻ê欣慰之情。

會延tshiân hiah-ni̍h久,tio̍h歸因tī台灣經過將近一世紀久ê殖民統治,連連被日本(1895到1945年)kah中國國民黨兩個外來政權所佔領統治。Tsit篇論文tī日本統治時期無法度出版ê原因,是因為它對殖民地政府ê教育政策提出嚴正ê批評。林茂生博士本來認為1945年日本戰敗了後,伊ē-tàng達成本冊得tio̍h出版ê心願,mā tī伊1947年死tī蔣介石所領導ê中國國民黨手中了後,有「曇花一現」。

發生tī 1947年2月28 ê「二二八事件」,tī經過長時間ê查禁了後,今á日已經是眾人lóng知,並且已經記載tī史料中。「二二八事件」發生了後,真tsē台灣ê知識菁英lóng續接「失蹤」,á是被殺害,林茂生博士to̍h是其中之一。事實上,tī現在台灣人一般所提起ê「二二八事件」發生了後,國民黨ê軍隊kah情治單位為tio̍h beh鞏固權力,方便掌控kui個台灣,開始進行剷除(sán -tî)任何可能ê反對勢力;為tio̍h án-ne,至少有三萬個台灣人民無辜遭遇tio̍h殺害。Tsit-ê恐怖時期開啟一黨獨裁ê統治,並且藉tio̍h三十八年久ê戒嚴法來厲行專制,直到1987年tsiah廢除戒嚴法。林茂生博士ê論文tī台灣歷史ê烏暗時期無法度得tio̍h出版,一直到1987年台灣民主政治發芽了後,tsiah終其尾tī伊心愛ê家鄉重見曙光(sú-kng)。

我認為,tsit篇論文用各種方式,beh tī群眾認知kah討論上做出重要ê貢獻。我想beh特別借tsit-ê理由,提出兩項真有價值ê所在。第一,tsit篇論文對台灣學校教育ê形成kah沿革,提出重要ê歷史解釋kah說明。Tī tsit-ê超過半世紀ê期間,台灣人頭一pái體驗tio̍h現代化ê力量。

第二,tsit篇論文teh強調文化認同tī任何教育層面,特別是tī發展kah落實學校教育體系所強調ê價值觀上,有不可取代ê重要性。若對家己ê文化缺乏認知kah參與感,就無可能產生自信,thang進一步tī kah-ná春風ê支持群體中來培養自我獨立思考ê能力;這to̍h是真正ê教育所必備(pit-pī)ê要素。總是,日本政府tī台灣所施行ê殖民地教育政策卻長期否認tsit點。國民黨統治下ê教育政策,照常延續過去一貫壓制台灣文化ê做法,一直到無gōa久以前lóng是án-ne。台灣未來ê教育一定tio̍h手牽手,行向台灣文化ê更新kah復興之途,這mā是林茂生博士tī伊ê論文中一再強調ê,並且是終其一生奮鬥ê原動力。阮誠懇希望伊ê論文ē-tàng激勵教育工作者,以及hiah-ê一向致力tī tsit項重要任務,希望漸漸kā台灣推向國際社會ê有志之士。我想,he mā會是林茂生博士siōng強烈ê渴望。

Tī tsia,我一定tio̍h對我唯一ê小妹,mā常常是阮老父歡樂ê來源ê徐林詠梅女士,表達我心內siōng深ê感謝。因為她ê文學恩賜、毅力kah投入,tsiah ē-tàng完成tsit本論文ê華語譯本;阮lóng真感謝她ê付出。最後,儘管阮過去承受真tsē ê悲劇、失落kah不幸,m̄-koh,我iáu是願意thí開希望ê翼(si̍t),迎向未來。所以,tī tsia我beh用丹麥哲學家齊克果(Sőren Kierkegaard)ê銘言來kah大家分享:「暴君一死,暴政必亡;殉道者雖亡,伊ê影響力卻beh啟動。」(The tyrant dies and his rule ends, the martyr dies and his work begins。)

(作者是林茂生愛鄉文化基金會創辦人)