《草地囝仔做牧師》

| | | 轉寄

基督徒ê容貌

使徒行傳六章8~15節

Tī教會歷史上有一句名言「殉道者ê血是教會ê籽」(The blood of the martyrs is the seed of the tsurts),的確tī歷代教會中,確實有真tsē聖徒(殉教者)ê血tī其中,尤其是初代教會史或者是一個地方初代宣教史,比如百年前台灣kap中國大陸ê宣教師lóng受tio̍h非常大ê迫害,甚至有真tsē人殉教,但是耶穌基督ê教會suah無因為迫害受tio̍h影響,顛倒koh-khah忠誠事主,tsit種事實,初代教會tàng看kah真清楚。初代教會hit種無組織,無規模ê團體,面對極強盛、有組織ê羅馬帝國ê極力迫害,若照一般情形,必定是瓦解、消滅,但是事實並m̄是án-ne,這是teh說明教會本質ê問題,教會m̄-nā是人ê教會,伊是屬於主ê團體,耶穌基督是伊ê頭,是全能者所有ê教會。若無當時只有hiah-ê無學問ê普通人(大部分是討海人)——耶穌ê十幾名學生所組成ê團體,是beh án-na去面對猶太教kap羅馬政府ê強壓手段?

當然tuì使徒行傳一~二章,咱ē-tàng了解,tī hit種軟弱、驚惶kap無力感中,聖靈充滿是教會成長kap有能力面對迫害ê主因。彼得ê一生,當耶穌hō͘掠ê時,tī人群中連續三次m̄認耶穌,但是當伊hō͘聖靈充滿了後,伊suah勇敢khiā-tī官員面前見證耶穌是救主!

這to̍h是教會teh強調信徒必須受聖靈充滿ê原因,因基督徒若受聖靈充滿ê時,就會完全改變,以前mā可能是驚惶,但是聖靈充滿了後,tī任何境況中lóng會有勇敢ê表現,以前是無力感,tsit-má是勇敢勇壯,以前m̄認主,tsit-má suah以基督徒為榮、做誇口,這to̍h是聖靈tī信徒身上ê能力,初代教會因為有聖靈充滿,雖然處tī極端ê危難中,iáu堅立tī信仰。

今á日咱教會,mā需要聖靈臨在每一個信徒身上,因為hō͘聖靈充滿 ê人,必定ē-tàng結聖靈ê果子,伊to̍h是感動人接受主kap帶動教會成長ê主因,因為聖靈會啟示引tshuā人了解耶穌基督奧妙ê真理,一個人若完全了解主基督ê真理,tī伊ê人生生活中就會活出屬於基督所有ê一切事實,tsit種有屬於基督ê生活ê見證to̍h是信仰ê結果,mā是歷代教會siōng ē-tàng榮耀主ê基督徒ê生活。Tī聖經中,耶穌基督時常要求屬於伊ê人ài kā伊結連來結果子,to̍h是指信徒tsit種有見證ê信仰生活。Tsit種有見證ê信仰生活,無論是活tī世上或者是因為基督ê緣故殉道,仝款lóng有積極作用,使徒行傳六章記載,當時教會興旺,信徒增加,koh再看使徒行傳二章,當時教會ê發展,m̄是漸進ê,是成長真緊,因為bat有一次三千人受洗ê紀錄(使徒行傳二章41節),tsit種增長是教會m̄ bat有ê現象,因為tsit種急速成長,致使tsiah-ê學生無法度處理教會事物,因此另外koh再選七名執事來協助分擔使徒ê事奉,六章1~3節,記載執事ê形成掠準條件:好名聲、hō͘聖靈充滿而且智慧充足ê人,kap保羅tī提摩太前書kap提多書講執事ê條件仝款。司提反是一位有完美人格kap熱情ê信仰者,雖然是平信徒,suah有良好ê信仰表現。

一、 平信徒司提反
照聖經記載,司提反是頭一個基督教ê殉教者,關於伊ê記載無tsē,但是thang tuì tsiah-ê經文中看tio̍h,伊實在是一位偉大ê信仰者,值得基督徒去學習。使徒行傳六章中紹介伊是一位具備良好品德kap真誠ê信仰者,「伊有好名聲」。Tī群體中,一個人beh得tio̍h其他人ê肯定m̄是一件簡單ê tāi-tsì,身為牧師,對tsit方面感受特別深!

Tuì使徒行傳二章尾段,咱thang了解初代教會興旺ê情形,非常完美ê教會生活表現在in ê信心中,雖然án-ne,á是有一kuá不滿kap怨言,tī六章,咱看tio̍h,教會增長真緊ê情形mā帶來問題,這是地上ê教會ê正常情形,因此基督徒ài了解,咱ê教會生活難免會有一kuá缺失,因為教會to̍h是tuì一陣有罪ê人所集合成ê團體,自然會有問題。當時司提反tuì初代教會選出擔任執事,ē-tàng分擔教會事工,減少信徒之間ê不滿kap怨言,tī當時教會中,伊是有好名聲ê人,聖經二二八首「品行端莊模樣正,會內會外好名聲」,可見tsit位平信徒ê司提反實在值得咱學習。「hō͘聖靈充滿,智慧充足ê人」,是當時選執事ê標準之一,品德是tī行為部分,tī教會ê事奉中,只有品德是無夠--ê,必須ài有屬靈ê恩賜,mā to̍h是聖經所講有聖靈充滿,因為伊tsiah ē-tàng辨別屬靈ê範圍,但是若只有聖靈充滿,無充足ê智慧,tiāⁿ-tiāⁿ會變成有熱心suah無智識ê人,tsit種情形tī教會生活中,tiāⁿ-tiāⁿ會發生,確實有一kuá基督徒非常熱心,但是無智識,信仰kap智識是現代基督徒必須ài加強ê信仰訓練。

基督徒一定ài有phông-phài ê屬靈內容,同時必須兼具良好ê品德kap敏銳ê判斷力,mā就是beh成做有智慧ê人生,這to̍h是主耶穌要求信徒ài「靈巧ná蛇,馴良ná粉鳥」ê人生。

「了解聖經ê真理」mā是司提反ê特色,當伊hông掠去公會前,向當時ê宗教領袖見證福音,使徒行傳七章,咱看出伊tī真理上非常熟手,tī短短一章內,司提反完整說明猶太人ê信仰史,指引hiah-ê人應該回歸神ê真理,m̄是親像in ê祖先,用無知kap罪惡來敵擋神所差遣ê使者,七章51~53節,司提反對in ê指責是非常嚴厲--ê。

「忠貞tī主」mā是司提反信仰生活美德之一,伊hông選做七位執事之一,即時投入teh事奉主ê事工,因為伊良好ê條件(Tī屬靈kap品德方面lóng有美好ê見證),好親像聖經所記「司提反滿得恩惠能力,tī間行了大奇事kap神蹟」(使徒行傳六章8節),因此,伊ê khang-khè m̄-nā限tī一般教會事務,進一步koh直接投入第一線ê傳道事工,tī猶太人中見證耶穌基督,伊ê作為刺激tio̍h當時傳統猶太教領袖,掠伊到公會,tī án-ne景況中,司提反iáu堅守主道,忠貞tī主所託付ê使命。

二、 容貌ná親像天使ê司提反
「Tī公會內底坐ê人,lóng真專心teh看伊,看伊ê面貌,kah-ná天使ê面貌」(六章15節)。

面貌是人一切感情統合ê外在表現。人ê一舉一動,或者所有ê感情lóng會表現tī面部,心情愉快,一定面帶喜樂笑容,傷心ê人就無法度表現喜樂ê笑容,人生社會ê實況,特別tī厝內,人所遭遇ê tāi-tsì,tiāⁿ-tiāⁿ會完全表露tī每一個人ê面頂kuân(Gín-á例外),鬼面kap天使面是兩個極端ê對比,事實上,tsit兩種面咱lóng m̄-bat看見,但是suah ē-tàng了解tsit兩個ê意義kap無仝,當咱想像天使ê容貌,必定是非常美麗koh可愛,tī人間社會真無簡單有án-ne完美ê肖像。有一個故事講:一位滿面春風,真gâu講話koh詼諧ê sing-lí人,專門teh賣護面霜,因為伊ê外表、詼諧kap喙水水,四界受歡迎,sing-lí真好,但是無guā久,伊ê bó͘過身,長子koh hō͘大水沖走來失蹤,tshuē了一、二個月tshuē buē-tio̍h,tsit-ê sing-lí人變kah真消極,內心非常悲傷,但是為tio̍h生活,只好koh去賣面霜,但是因為伊面憂憂,suah致使sing-lí直直落,無人相借問。Ná會án-ne?當然是生活景況影響道內心kap容貌!

天使ê容貌如何?有笑容,美麗可愛,滿面春風,光明燦爛,這是天使面容ê特色,tī天使容貌中,可見到其中集是上所有美德,比如加拉太書五章22~23節,聖靈ê果子:仁愛、喜樂、和平、忍耐、恩慈、善良、信實、溫柔、節制,lóng ē-tàng tī天使ê容貌中見tio̍h。

講到鬼面?橫逆、殘忍、驚人、黯淡,是伊ê特色,加拉太書五章19~21節,hiah-ê由人ê情慾所產生出來ê惡形,to̍h是鬼面ê特寫。台灣民間宗教或者畫冊所描寫ê鬼,伊ê角、目、鼻、嘴lóng是兇殘ê模樣,hō͘人ê印象是pháiⁿ沖沖、驚人,kap天使完全無仝,這是兩個對立ê描寫,用完全無仝ê容貌呈現tī人ê面前。天使ê容貌hō͘人ê印象是善良、溫純、和平、安詳、光明kap快樂,鬼ê容貌hō͘人ê印象是恐怖、絕望、憂鬱、不安、橫逆、悲傷,咱ē-tàng下結論:人生所期待ê生活內容是ē-tàng展現kā天使ê面貌仝款ê人生內涵。

至少基督徒ài具備ná司提反ê面貌,這是替耶穌基督作見證siōng好ê工具,因為一般人對基督徒,siōng直接ê接觸to̍h是信徒平時kā人往來ê態度,其中面貌tio̍h是siōng主要ê關鍵,一個ta̍k工目頭結結ê信徒,人kám ē-tàng tuì伊身上發現耶穌基督?這是無可能--ê。

司提反ê面貌,無論tī任何時刻,lóng表現出天使ê面貌,著算tī極端危機中,聖經suah形容伊容貌像天使!這實在是難能可貴ê信仰表現,當時伊ê狀況是tī悲慘ê危機中,但是使徒行傳六章15節,伊khiā-tī公會受審ê時,七章54~56節,群眾對伊咬牙切齒ê時,kap七章59~60節hō͘暴民用石頭kā伊phah死tsìn前,伊iáu大聲求主mài將tsit-ê罪歸hō͘ in,kap主耶穌tī十架頂ê祈求仝款!Tsiah-ê舉動,to̍h是因為司提反平時有美好ê信仰kap親像天使ê容貌ê累積ê結果。Tuì tsia咱thang知影,一位真實ê基督徒,無論伊ê景況如何,lóng仝款絕對忠誠tī主基督,特別是處tī極端危難中,對主ê忠誠koh-khah難能可貴!

三、 基督徒ê容貌——你用啥物容貌hō͘人看?
或是講,一般人看tio̍h你ê容貌是啥物?頭前講過,面貌是一個人kui-ê人格所表現出來ê事實,台灣ê相命仙,至少會觀察tio̍h人部分ê生活內容,hit-kuá遭遇不幸ê人去tshuē相命仙,相命仙會tuì伊ê五官來斷定伊心中ê煩惱,這to̍h是為啥物有人信相命仙ê原因。因為大多數ê人lóng會將心事表現tī面容頂kuân,人有喜事精神爽,滿面春風是伊ê特色。Tú-tio̍h不如意,表現tī容貌上to̍h是目頭結結,因此咱大約thang tuì人ê表情來了解伊ê人生狀況!

用tsit-ê原理來思考今á日身為基督徒ê容貌,一個有基督ê聖靈所充滿ê信徒,伊ê容貌特色就會表現有屬於基督ê氣質。Tsit種hō͘人看出是屬於基督ê信徒,to̍h是初代教會安提阿hiah-ê基督徒ê生活特質,hō͘人一看to̍h ē-tàng斷定是屬於基督ê人!

和尚kap修女因為伊ê特殊穿插,自然真簡單tio̍h會hō͘人認出身分,基督徒雖然無特別ê識別證,但是至少咱ài tī現實生活中,hō͘人簡單知影咱是屬於基督ê人,tsit種識別證,並無特別ê記號,掛十字架ê金練雖然真流行,但是無一定lóng是基督徒,siōng重要ê是基督所講「結出屬於主ê好果子」。好樹結好果子,用tse來證明咱是屬於基督ê人。當然咱ê信仰是因信稱義ê信仰,但是一位tī社會上hō͘人印象真bái ê基督徒,人會批評伊是信惡教ê人,若是一位tī社會上hō͘人良好、完美印象ê基督徒,相信hiah-ê未信者,必定對基督教有好感。

Tuì tsiah-ê事實,咱thang了解,今á日ê基督徒揹tio̍h對福音決定性ê影響,因為耶穌基督ê福音ài hō͘ in hiah-ê人好感或者惡感lóng tī in所看看tio̍h ê基督徒ê容貌所有ê。當然,容貌kap生活境況有關係,但是koh-khah重要ê是每一個人內心ê感受,mā to̍h是伊心中ê一切,人ê人格、人ê性格,人生ê人際關係,tsiah-ê lóng會表現tī人ê面貌頂kuân。若想tio̍h án-ne狀況,基督徒ài提高警覺,充實咱ê人生kap屬靈ê增長,tsiah ē-tàng發揮有ná天使一般ê面容tī人生現實中!Ài二方面ê配合tsiah ē-tàng hō͘ in基督徒koh-khah完美ê人生!

結論:耶穌基督交代所有ê信徒ài替福音作見證,所以:(A) 基督徒是福音ê籽。(B) 基督徒ê存在是成做榮神益人ê存在。(C) 保持美好ê面貌來見證信仰。