《草地囝仔做牧師》

| | || 轉寄

淨化ê動力

約翰一書四章7~21節

基督教ê三大真理,信、望、愛。有人用保羅、彼得kap約翰來做代表。保羅tī伊ê信仰中siōng強調ê to̍h是因信稱義ê真理,羅馬書kap加拉太書是siōng偉大ê作品。彼得tī伊ê phue信中對當時hiah-ê受苦ê基督徒用希望ê信仰來安慰in,相信這是siōng切實ê真理。

Hông稱做疼ê使徒約翰tī伊ê phue信中充滿ê是基督教siōng完全ê疼,咱看伊ê論調,完全流露出疼ê真諦。今á日咱所讀ê tsit段聖經,教示基督徒生活ê真實內容,是tī完全相愛ê生活,雖然保羅tī哥林多前書十三章mā講tio̍h疼ê真理,但是約翰tī-tsia kā基督徒講一定ài有相愛ê生活,因為伊是基督徒性命ê根源。咱知影基督徒是hō͘上帝ê恩典所恩膏ê人,mā to̍h是受上帝疼痛ê人。因為祂疼咱,所以祂要求咱必須相愛,因為愛是上帝ê屬性,tī創世記記載:上帝用祂ê形像創造人。一般人認為to̍h是指人有上帝ê屬性——愛,mā to̍h是講,上帝創造ê人是愛ê形象。

有學者對約翰福音三章耶穌叫尼哥底母ài「重生」hit件tāi-tsì,解釋做tuì疼ê新生。確實約翰tī-tsia kā咱講神kap人之間ê連結點是tī疼。

上帝是疼,伊kap世人ê疼無仝,世人ê疼是現實--ê、有條件--ê、無單純ê、片斷ê,被愛ê條件若有變化,疼就會動搖。但是上帝ê愛是純真正疼,特別是對tī無愛上帝ê世人,祂iáu用純真、絕對ê疼,施hō͘ tī咱tsiah-ê配buē起得tio̍h祂疼ê人身上。這to̍h是上帝ê疼kap人ê疼無仝ê所在。

雖然咱是有罪、反背、kā祂對敵,但是祂iáu用祂ê疼,將祂ê孤kiáⁿ耶穌基督賜hō͘咱,贖咱ê罪,這to̍h是約翰福音tī-tsia強調咱必須相疼ê原因。

因為若無相愛,就無屬於上帝ê性命,mā就m̄是基督徒。所以相愛ê生活就等於基督徒ê人生。基督徒ê重要課題就是ài親近上帝,持守上帝恩典ê信仰,tsit種對上帝ê信仰m̄是tuì研究ê方法或者人生ê智慧tsiah來ê,是teh有疼心kap實行疼ê生活。一個人若beh認bat上帝,伊必須先了解疼ê道理,因此咱ē-tàng講認bat上帝ê資格tī疼ê人生。因為只要tī人間社會中,完全實行疼ê生活,個人ē-tàng用愛相待,就無人生ê問題、糾紛ê發生。近年來報紙差不多ta̍k工lóng有佛教界慈濟集團證嚴法師ê文章,咱若詳細kā看,就會了解,伊一直teh強調完全無私、付出ê疼,為何全台灣有120 guā萬ê人加入tsit-ê團體,奉獻出in ê心力,無為tio̍h私利,來替社會事工付出?

證嚴提出ài hō͘台灣社會有理想,需要tuà-tī台灣ê人多多付出無私、無求回報ê疼心。Ta̍k pái看tio̍h伊ê文章,心肝內lóng會想講:當咱做一個深深體會上帝疼ê基督徒,kám會不如tsiah-ê佛教徒?In肯犧牲、控制家己來響應證嚴法師ê呼召,基督徒實在ài多多反省,因為疼是基督徒ê特徵,基督教ê記號to̍h是疼,因為主耶穌ê生涯,thang用完全ê疼來說明,祂ê降生是疼,祂kui-ê生涯是疼,尤其tī傳道生活中,祂表現出完全ê疼,特別是祂所行ê神蹟,有人講,基督ê神蹟是祂完全ê疼ê結果,因為疼ē-tàng解決任何tāi-tsì,任何事物tī完全ê疼tsìn前lóng會表現出馴良。聽講中世紀聖法蘭西斯常向毒蛇、猛獸證道,以賽亞書十一章先知描寫彌賽亞治理ê理想國是無紛爭、攻擊而且充滿tio̍h疼kap和平,siōng pháiⁿ ê動物lóng溫純tuà tàu陣,兒童thang kap毒蛇猛獸做伙(十一章1~10節)。

Tsit種理想ê統治(國度)是建立tī用疼為基礎ê社會,今á日台灣ê社會景況混亂而且複雜,外人批評做無適合人tuà ê所在,為何án-ne?因為活tī台灣ê二千萬人,ta̍k-ê人自私、心中無疼心(若有mā只是嘴講--講),爭權奪利是台灣社會ê特色,一個欠缺疼ê社會,一定因為減少調和淨化ê因素來混亂。

家庭、尪仔bó͘生活若無愛,tsit-ê家庭一定成做問題家庭,因為tī「siōng需要疼ê所在欠愛」,這是今á日社會siōng嚴重ê問題。上帝創造人類,將in安tī伊甸樂園,mā to̍h是有完全ê疼充滿ê所在,tī tsia-ê人ē-tàng自由自在kap上帝溝通,tsit種有完全ê疼充滿,koh ē-tàng自由自在kap上帝來往ê所在to̍h是天國。傳說彼得ê母親,行為無juā理想,死了後落地獄,彼tio̍h向上帝求,上帝雖然心內了解,iáu令天使落去救彼得ê母親,其他ê人看見彼得ê母親hông救起--來,紛紛走—去kā伊ê腳掠tiâu,總共有十二ê人,伊看tio̍h,就開始出力kā tsiah-ê人踢掉,結果一個一個hō͘伊踢tńg去地獄,彼得tī天堂一直叫母親bē-tàng án-ne做,最後天使看tio̍h彼得母親tsit款情形,心酸放手,彼得母親koh落入去地獄,上帝行uá kā彼得講:你了解bo̍h?自私ê人是無法度入天國--ê。因為天國是充滿tio̍h完全ê疼ê所在!基督徒ê人生方向to̍h是面對天國--ê!

因此咱必須tī人生中有充分ê疼,tsiah ē-tàng完成成做天國國民ê事實。主耶穌tī主禱文中有一句「願你ê旨意行tī地上,ná親像行tī天頂」,這是基督徒生活ê內容,咱一定ài uì tsit-ê目標phah拚,tī地上建立天國一般ê生活。

一、 基督徒生活ê現實場所:社會
基督徒ài了解一件事實,咱m̄是離開現實,是生活tī現實中,因此基督徒ê人生mā會受tio̍h真tsē社會問題所影響。譬如家庭問題,kiáⁿ兒ê教育、khang-khè環境,人生ê遭遇,身軀ê病痛或者是人生真tsē逆境,tsiah-ê tī人間社會中所會發生ê狀況,基督徒lóng可能體驗tio̍h。因此tī咱ê信仰生活中,基督徒ài建立tsit種共識,若無當你tú-tio̍h問題ê時,你ê信仰就會動搖或者產生危機。

主耶穌教示咱是世上ê kan-ta講是地上ê鹽,是說明基督徒ê現實信仰是tī社會。

所以一般ê人ê社會經驗,基督徒mā是必經--ê,因為咱ê存在,是為tio̍h社會tsiah存在,這是近代教會特別強調ê基督教真理。

基督教m̄是用基督耶穌ê真理做籬笆特別kā伊圍起來ê一個團體,伊是設立tī社會生活中,因此必須kap社會有所接觸,ài關心社會ê問題,譬如病院ê經營以及啟智中心lóng是咱ê社會關懷之一。

因為咱是生活tī現實ê社會中,現實ê社會hō͘罪所控制,因此咱看見真tsē烏暗kap紛亂,尤其是tsit kui年來台灣政治ê爭權奪利,比如第八任ê總統選舉國民黨就分主流kap非主流派,社會ê烏暗混亂,交通、建築、空氣、水質、食品、文化等等ê混亂現象lóng teh降低咱ê生活品質,因此台灣hō͘人評定是tsiok無適合人khiā起ê環境。基督徒家己知影生活tī tsit種環境中,咱ê使命就koh-khah重大,ài如何tī án-ne社會中發揮咱ê信仰,來見證基督耶穌ê福音,同時hō͘咱ê社會成做koh-khah理想、完美ê社會,這是基督徒ê使命。

因為咱ài將天國ê事實實現tī人間,因此咱必須播真tsē ē-tàng實現天國ê疼ê籽tī人間。

假使基督徒ê是會生活kap一般人仝款,咱就無可能完成使命,因此家己保持基督徒ê特殊ê氣質,hō͘人了解咱to̍h是基督徒,發出基督徒應該有ê清芳tī人間!

二、 淨化ê動力(疼kap事奉生活ê見證)
咱已經了解,基督徒生活ê場所,to̍h是人生現實ê社會,咱mā知影,目前咱ê社會實在是非常混亂kap驚人,但是基督徒buē-sái無管,咱tī生活中,必須ài成做光kap鹽來淨化社會,雖然咱ê力量無一定大,但是只要咱堅持咱ê信仰原則,就ē-tàng發揮效用。有人比喻臭腥ê社會是濁水,做淨化ê基督徒是清水,清水tsē濁水少,就真緊有淨化ê作用,但是目前台灣ê狀況suah是濁水tsē,清水少,因此需要時間kap耐力,只要把握時間去做,有一日必定ē-tàng hō͘ tsiah-ê濁水khah清淨,至少ē-tàng漸漸變清。

Tsit種信仰ê原則to̍h是基督耶穌所講ê光ê光輝以及鹽ê鹽味,只要基督徒無變質,咱就會看見tsit種淨化作用ê顯現。

基督徒若beh了解,咱ê使命to̍h是teh實行淨化作用。Tī濁水中,m̄是增加濁水,是清水,至少伊ê濃度會改變!若是濁水加濁水ê時,就仝款是濁水啊。這to̍h是基督徒ê生存原則。Tsit種屬於清水ê信仰生活是啥物?或者是講基督徒ê啥物行動ē-tàng淨化人心?當然是只有基督耶穌ê福音,咱tsiah-ê基督徒to̍h是有基督耶穌福音tī身上ê人,咱tio̍h用啥物來向人紹介基督耶穌ê福音?相信siōng有功效ê to̍h是基督徒相愛ê生活,因為伊是基督徒信仰ê根基,主耶穌向學生講「Lín若有互相相愛ê心,眾人因此就認出lín是我ê門徒了」。疼ê生活to̍h是基督徒ê標幟。

因為基督徒若無相愛就無屬於基督耶穌ê靈命tī其中,所以相愛ê生活是基督徒信仰ê根本問題,伊mā是siōng ē-tàng證明基督徒ê信仰ê真理。

伊是基督教信仰所激出ê清芳,接受伊ê人或者社會lóng ē-tàng無限量ê開花結果,tī教會生活中,有一kuá hō͘人認為tsiok惡質ê人,因為基督耶穌ê疼tsiah完全改變!因為hō͘人完全ê疼所感化。

基督耶穌ê疼比任何物質lóng有力量,只要tī社會中傳播tsit種疼ê籽,伊就會淨化人間社會,因為有疼ê所在就有上帝!有上帝同在to̍h是天國,tī天國ê生活無人間ê悲劇kap混亂、紛爭,所充滿ê是和平喜樂,平安kap疼ê付出!

同時tī tsit種疼ê生活中,必定有無求代價ê付出,mā to̍h是無私ê事奉,tsit種生活方式若tī咱ê社會中充分實行,這kám-m̄是天國ê生活mah?Tī-tsia人kap人中所看見ê to̍h是對自然無假仙ê生活,是真純真正ê人生。為何人間社會問題hiah-ni̍h tsē?總講一句是無愛心。

耶穌為何ài門徒學習孩童?祂講上帝國是屬於有孩童心思ê人,無欺騙、無假仙、是絕對ê純真!現代ê社會欠缺tsit種心態,tsiah致使病態ê社會。

三、 落實ê信仰生活(教會存在ê意義kap價值)
基督徒ê信仰生活,必須以疼做出發點來表現出信仰ê事奉,因為伊是信仰ê見證,基督徒若beh告白家己ê信仰ê時,伊必定tio̍h用心經營疼ê生活kap信仰ê事奉。

因為一個人若發出真誠ê心懷去為別人做一件tāi-tsì,m̄管hit件tāi-tsì ê內容如何,一定會收tio̍h好ê效果。

Tī教會ê傳道史上,教會ê成長,是基督徒付出心力ê自然結果,天下無白食ê食物,存有佳哉ê心態,m̄是基督徒信仰生活ê正確態度。現代企業若略略仔有競爭性,負責ê人若無相當警覺,所有ê員工若無向心力,to̍h是hông篩掉。信仰生活ê原則kap tse仝款,基督徒一定ài以戰戰兢兢ê心態來經營咱ê信仰,將咱ê信仰確立tī穩固ê磐石頂,然後tsiah有能力去面對一切信仰ê挑戰。

基督徒必須自省:你ê人生ē-tàng提供人啥物?Mā to̍h是因為你ê存在,人án怎kā你評定?上帝創造咱ná親像天使,m̄是造成咱像惡魔,可惜人tiāⁿ-tiāⁿ用惡魔ê姿態經營伊ê人生,這to̍h是上帝痛心ê原因。基督徒ê人生,必須活出比如天使一般ê生活狀況tī人間。

雖然基督徒mā是軟弱無完全ê器具,但是一定ài uì一個目標,比如基督所講「Lín ài完全,像lín ê天父完全仝款」(馬太福音五章48節)。為tio̍h beh達成tsit-ê目標,基督徒一定ài用基督耶穌屬靈ê力量,來建立屬於咱ê信仰ê內容,hō͘咱ê信仰,實實在在kap咱ê人生發生密切ê關係,是經由咱ê完全了解清楚了後,所表現出來ê信仰內容,tsit種有內容ê信仰,to̍h是所講ê落實。生活無論任何境況lóng無法度左右、影響信仰者kap基督ê關係,自然會結出真tsē信仰ê花果!

Tsit種信仰ê花果是榮耀上帝ê材料,是建立教會ê根基,同時mā是淨化社會ê動力!這to̍h是落實ê信仰生活ê偉大ê效力!

只要咱tsiah-ê基督徒ta̍k-ê lóng ē-tàng建立án-ne ê信仰,tī任何方面lóng無koh驚惶。

結論:koh再認bat約翰所推介ê疼ê事實,用tse來建立咱ê人生,來影響社會,這是教會存在ê價值。伊ê存在m̄是只為tio̍h基督徒,mā是為所有ê人!