《受恩蒙福的一生》

| | | 轉寄

刺中花

雅哥二:1-2

四十年前tī新屋教會ê時bat演出一個聖誕劇:刺中花。大概ê內容teh講一位教會女青年信貞,有信仰而且koh生做真suí,性情溫存,是一位標準ê理想tsâ-bó͘ gín-á,因此佮意伊ê人bē少,tsâ-bó͘ gín-á因為堅持信仰,所以伊期望理想ê伴侶是教會青年,但是伊ê母親ê信心馬虎,有一日媒人來提親,男方名風流,是地方上好額人ê孤kiáⁿ,人品無好,人tio̍h親像伊ê名仝款,但是伊ê老母並無考慮信仰,kan-ta siáu貪對方ê厚禮kap聘金tsiah答應了tsit-tsan婚事,媒人問伊ê母親:Kám講m̄免kap lín tsa-bó͘-kiáⁿ參詳,伊ê老母共伊應講:m̄免,我thang作主,媒人koh問:Kám講m̄免kap您ê牧師參詳?母親答講「Kap hiah-ê無開化ê人參詳tāi-tsì是buē成功--ê!」

Tsâ-bó͘ gín-á tńg到厝了後知影tsit-ê tāi-tsì,向伊ê母親舉出kap無信者結合ê利害關係,恐驚信仰mā會受影響,母親講:「Tsiah-ê lóng m̄免擔心,男方已經同意信仰自由,ē-tàng參加禮拜,tsit種條件toh位去tshuē?」Tsa-bó͘-kiáⁿ舉出實例,哀求伊ê老母,mài hō͘伊進入活地獄,母親受氣共伊責備講,「我敢生妳,就m̄驚你反抗」,tsa-bó͘-kiáⁿ去哭hō͘牧師聽,牧師來苦勸伊ê老母無應該kan-ta貪圖物價,母親竟然回答牧師講,「牧師傳福音要緊,mài干涉人ê家內事,tsa-bó͘-kiáⁿ是我ê,你iáu擔心我bueh將伊嫁hō͘ siáng?」牧師無奈,只好uat頭勉勵tsâ-bó͘ gín-á講「Mā可能有主ê美意」。

結婚了後,因為伊ê翁婿m̄做khang-khuè koh有真tsē歹習慣,家勢衰敗,負真tsē債務,債主上門討siàu,翁婿iáu活tī酒色中,ta-ke ê責備,翁婿ê起跤動手,面對真tsē債主,koh ài擔起全家責任,án-ne ê生活實在非常痛苦,佳哉tsit時,伊ê屘tsa-bó͘-kiáⁿ已經是國小仔一年仔,母á-kiáⁿ相依為命。翁婿放蕩ê生活並無改變,厝內已經無ē-sái當ê物件,只tshun tsa-bó͘-kiáⁿ學校ê制服,mā hō͘先生強取去當舖當掉。當舖頭家ê bó͘是一個不守婦道,kan-ta知影享受,m̄盡本分,個性敗害,時常用摔物件發洩情緒ê tsa-bó͘,翁婿非常無奈,當「風流」提伊tsa-bó͘-kiáⁿ 學校ê制服來當鋪ê時,頭家誠懇ê kā伊苦勸,mài tī福中m̄知影惜福,hit種賢慧ê bó͘ m̄知影珍惜,反倒tńg來共伊虐待,你想看māi,伊嫁入去lín-tau受盡折磨,m̄-bat講出怨言,mā kā厝內整理kah真整齊,án-ne賢慧ê女子beh去toh位tshuē?Koh勉勵伊奮發向善,重新開始過去律師ê khang-khè,風流良心發現,mā完全覺醒,但是後悔過去ê hit種人生狀況,伊實在無面去見bó͘-kiáⁿ。

婚後十年ê一個暗時,母á-kiáⁿ照常做完家庭禮拜,tsa-bó͘-kiáⁿ去睏,信貞家己the替翁婿ê改正迫切ê祈禱,翁婿tsit時已經完全聽見伊e5boo2 ê祈禱,回想店頭家ê忠言,想tio̍h過去十年來辜負信貞母á-kiáⁿ siuⁿ-tsē,當伊聽見牽手án-ne迫切誠懇ê祈禱,伊ê內心無法度koh忍受,走去跪tī in bó͘ ê面前,痛悔求赦免,kā伊ê bó͘攬牢放聲大哭。

當然結局是翁婿悔改歸正,家庭恢復幸福美滿,tsit-ê有淡薄á ē-tàng感動人ê話劇,伊teh說明tsit位女主角,雖然tī極端ê困境中忍受tio̍h普通人真pháiⁿ忍受ê人生境況,但是伊lóng無怨天尤人,伊依從主耶穌ê教導,甘心揹十架跟隨祂ê腳步,伊ê存在,tú親像雅歌二:1-2所描寫ê是一蕊非常美麗ê刺中花,無hō͘惡劣ê環境所勝,顛倒戰勝伊達tio̍h尊貴、純潔ê人生狀況,這to̍h是刺中花!

聖經雅歌是指siōng出色、優jú ê詩歌,中文譯做雅歌,充分表現伊ê原意,主題是講男女間ê情愛,所以會hông騙入聖經ê正典,一般hông認為是比喻或者是解釋以色列kap上帝ê關係,新約是基督kap教會ê關係,用tsit-ê心態去看雅歌ê時,tsiah ē-tàng體會內中ê真義。

(一) 刺中鼓子花(本質ê完美)
鼓子花(或者花)通常是hiah-ê人所喜愛ê物件,每一個人lóng愛伊ê美麗凊芳。Tī今á日ê生活中,伊kap咱有真密切ê關係,室內若有花,氣氛就無仝,主日ê敬拜,任何教會mā一定有伊。表達愛情、關懷、慰問ê時,lóng用花來表達人內心ê誠意kap真情。因此花tī hiah-ê人ê生活中相當重要,因為伊是天生美麗,人見人愛。主耶穌用山頂野生ê鼓子花kap當時極尊貴ê所羅門王ê衫做對比來解釋,hit位極榮華ê所羅門王所穿ê尊貴ê衫mā buē比山野中ê鼓子花ê suí,可見花ê美麗是無thang可比--ê,所以花無論tī任何場合中lóng顯出伊ê可愛嬌麗ê特質。

聖經ê作者tī-tsiah用「我ê佳偶tī kiáⁿ兒中,kah-ná鼓子花tī草刺內」,咱ē-tàng了解作者tī-tsia所強調ê,伊ê所疼ê對象ê生存境況非常惡劣,好親像hit叢刺中花ê外在環境,雖然有非常險惡ê挑戰,但是lóng buē因為伊ê境況ê惡劣(變化)來改變伊ê本質,是用草刺中ê鼓子花來形容所疼ê對象。

若用比喻思考ê時,可比舊約ê教會到新約ê教會,伊存在ê環境,mā可能有真tsē不利,痛苦ê現實包圍四周,但是教會ê存在的確buē因為現實境況ê變化來變質,這to̍h是tī信仰ê過程中,主向信仰者所要求ê信仰ê性格,tsit種kah-ná刺中花ê信仰to̍h是基督教信仰ê價值,tī過去ê教會史上表現出tsit種尊貴ê信仰本質者,mā有真tsē。基督徒ê信仰,to̍h是揹十架ê信仰歷程。

主耶穌向學生講「若有人beh tuè我,就當囥下自己,揹起伊ê十字架來跟tuè我」(馬太十六:24)Tī-tsia咱ē-tàng看出基督教信仰ê siōng kuân境界。保羅mā向提摩太講「只要立志tī基督耶穌內敬虔度日--ê,lóng tio̍h被逼」(提摩太後書三:12)。Tsiah-ê事實lóng teh說明基督教信仰ê實質內容。

誠然,一蕊美麗可愛ê花teh充滿草刺ê所在,ài如何去發揮伊偉大ê特質,這是一件相當困難ê實情,因為tī án-ne惡劣ê環境中,伊必須ài有相當ê警覺kap謹慎,若無一定會hō͘ 四周ê環境所鑿tio̍h!這to̍h是基督徒信仰生活ê寫照,基督徒tī現實ê生活環境,伊必須ài有相當ê覺醒kap謹慎,若無會鑿tio̍h 來產生tsiok驚人ê 孔嘴,因為主耶穌已經真明白ê kā咱講,基督徒ê信仰生活是入狹門kap行狹路ê過程,雖然咱ê人生中四界lóng有開闊ê門kap路,但是伊lóng m̄是屬於基督徒所有!

Tsit種信仰ê本質,to̍h是刺中花所表現出來siōng完美,高尚ê本質。因此咱ē-tàng講tī刺中ê鼓子花,本質上是非常完美ê存在,雖然伊生存ê 四周圍有非常tsē ê草刺!

(二) 草刺中ê鼓子花是純潔ê本性
刺中ê鼓子花,buē因為是生存tī草刺中,就變做野草,雖然伊生tī草刺中,但是伊猶原是純白ê鼓子花,buē因為環境ê緣故來變質,這to̍h是刺中花siōng可貴ê所在。

好親像頂面所講ê hit位善良ê教會女子,嫁入去惡劣、困苦艱難ê家庭中,但是iáu ē-tàng堅持信仰ê價值koh作美好ê見證!

作者tī-tsia雖然用溫情ê寫法,但是suah用屬靈ê角度來看tsit件tāi-tsì,咱ē-sái體會作者ê用心是tī絕對ê信仰kap忠堅ê愛情。只有具備tsit種性格,一位信仰者tsiah ē-tàng持守信仰上ê純真kap對信仰ê主絕對無二心ê忠貞。

Tī一般人心中,通常對信仰ê對象ê敬拜tiāⁿ-tiāⁿ是用平常ê心態去應付,仝款是禮拜,仝款是宗教,無啥物差別。真tsē人對基督教ê獨一性神觀無了解(尤其是處tī多神教ê台灣社會),對舊約中耶和華上帝ê排他性mā真pháiⁿ認同。

M̄-koh tī信仰ê世界,信仰ê主要求信仰者必須具備絕對忠貞ê信仰生活,雙腳踏雙船ê不忠ê行為tī社會上是hō͘人所厭棄--ê,好親像舊約時代,先知以利亞向當時ê以色列人所講--ê,in必須ài tī耶和華或者巴力ê中間選定一位,這to̍h是神學家所強調ê信仰ê性格,tī信仰ê世界無允准二樣心,心懷二意並m̄是好ê信仰心態。

Tī信仰世界,定定有tsit種因為環境來影響tio̍h信仰ê本質ê事例,有一kuá基督徒kap人去觀光參觀古廟ê時,別人teh拜拜,基督徒mā tuè人拜。有一kuá基督徒tī惡劣ê環境中,m̄-nā buē-tàng見證福音,反倒tńg kap人行共路,tsiah做出犯法或者違背信仰良心ê tāi-tsì,真tsē基督徒墮落以及失敗ê主因,通常是tī buē-tàng堅持伊ê信仰獨有ê特殊純潔ê本質。信仰者tī社會上應該是beh去影響人,去感化人,但是tiāⁿ-tiāⁿ有一kuá基督徒tī真道上顛倒hō͘人同化。

刺中ê鼓子花tī伊ê惡劣ê境況中iáu ē-tàng保持純潔ê特質,to̍h是伊可貴ê所在,伊kā咱講tsiah-ê基督徒一件非常重要ê真理,tī草刺中是m̄是iáu ē-tàng保持潔白ê本質?這是信仰kap現實ê生活中ê一件真有挑戰性ê問題。Buē hông 污染tio̍h。

創世記十三章以後,記亞伯蘭kap羅得ê情形,咱就會了解信仰必須ài有純潔ê本質:當時ê羅得袂堪--ê所多瑪城真tsē惡劣ê狀況。本來伊ê使命是「化世俗」,但是現實ê生活hō͘伊成做「世俗化」,假使伊ē-tàng有草刺內ê鼓子花tsit種心態去經營伊ê信仰ê時,伊就buē kap惡魔妥協。

這to̍h是基督徒社會生活ê寫照,有ê時有可能會hō͘人認為阿西,但是suah表現出草刺中ê鼓子花純潔ê本質!

(三) 草刺中ê鼓子花ê香氣

咱已經思考草刺中ê鼓子花ê特質,1)完美ê本質 2)純潔純正本性,雖然伊ê生存ê環境相當ê惡劣,但是伊suah無因為伊ê境況來影響tio̍h伊本質ê實在,顛倒tī tsit種境況中koh-khahe7-tàng發揮伊獨有ê特殊純潔ê內在價值。

最後咱koh思考草刺中鼓子花ê另外一種氣質,to̍h是伊ê清芳,咱lóng知影,花會hō͘人欣賞是因為伊外表美麗ê色彩,同時花本身,會發出香味mā是hō͘人欣賞ê主因,咱tiāⁿ-tiāⁿ會tī生活中看tio̍h hiah-ê人提花蕊,khǹg tī鼻孔邊聞伊ê香味,假使有一kuá花有艷麗可愛ê外觀但是有臭味,相信無人會欣賞伊!因此美麗ê花ê要件,一方面是外觀ê美麗,另一方面是有清芳ê氣味,tsiah-ê事實是花是án-án 會hō͘人喜愛ê主因。

雖然玫瑰花有刺,但是hiah-ê人lóng buē因為伊ê刺來棄嫌伊,人猶原佮意玫瑰花。

咱看草刺中ê鼓子花ê特質,雖然生tī草刺中(相當惡劣ê環境),iáu ē-tàng放出清芳ê香氣。Tsit件事實是teh向基督徒提出一個問題,基督徒ê存在,有ê時mā有可能好親像刺中花,但是咱必須ài明白,無論著抑m̄著時,無論任何場合,基督徒ê特質就是beh不斷來發出ē-tàng榮耀上帝、見證耶穌基督福音清芳ê氣味。

基督徒見證上帝ê榮耀是無受時間kap空間ê限制,無論你活ê環境如何,基督徒ê特質to̍h是不斷來發出基督徒所講--ê:「因為咱tī上帝面前,無論tī得救ê人身上,或者滅亡ê人身上,lóng有基督清芳ê氣」(哥林多後書二:15),tī-tsia咱ē-tàng體會信仰ê實在內容,to̍h是要求信仰ê人不斷來散播出有耶穌基督ê香味!To̍h親像刺中ê鼓子花,雖然tī hit種境況中,猶原有獨有特殊可貴ê香氣。

基督徒ài明白伊ê存在本身to̍h是價值!雖然咱存在ê環境m̄是lóng仝款,但是咱必須明白,咱ê存tī本身to̍h是價值ê事實。形成價值,是在teh發揮伊ê作用,m̄管你ê人生內容如何,溫室中美麗ê花蕊,受tio̍h特別ê照顧,khǹg tī花矸內成做人欣賞ê題材,或者是刺中花,活tī hit種惡劣ê境況中,你lóng必須ài會記,你ê存在本身to̍h是價值!因為咱每一個人lóng hō͘上帝安置tī各種無仝ê環境中,境況雖然無仝,每一個lóng有一個仝款ê價值,to̍h是發出清芳ê香氣tī你生活ê 四周!這to̍h是刺中花ê特質。

「刺中花」,提醒基督徒對信仰生活ê問題ê koh在認bat、自覺、憂患意識ê建立,kap揹十架ê生活心態,lóng應該去思考--ê。尤其tī現實ê生活中,如何去表現信仰生活,tio̍h-ài有信仰ê智慧kap判斷ê能力!