《受恩蒙福的一生》

| | | 轉寄

為tio̍h你ê緣故

約拿書一:1-15

Tī人生中咱有時會看tio̍h一kuá咱所buē-sái了解ê情形,tī社會現象中,有一kuá人做了天大地大ê tāi-tsì suah kap其他ê人無啥關係,顛倒是有一kuá人做真細項ê tāi-tsì,suah hō͘人間發生了真驚人ê後果。

有辦法ê人thang tuì法律縫來閃避伊ê所犯--ê真大ê罪惡,另外有一kuá老實忠厚ê人suah因為伊ê老實忠厚去犯tio̍h法律hông判重罪。無guā久以前tī苑裡有一位艱苦人因為tī保安林中a̍t幾支枯乾ê木麻黃hō͘保警看tioh8ka7伊送到法院hông判七年有期徒刑,像tsit款tāi-tsì,tī現實ê人生中,咱時常ē-tàng看tio̍h。

有時tī人生社會中會為tio̍h某某人ê緣故tsiah影響tio̍h人生狀況,tsit種為tio̍h人ê緣故所牽連出真tsē ê人生問題tī咱ê人生生活中是tiāⁿ-tiāⁿ有ê現象,像父母對kiáⁿ兒無意識中ê感化,真tsē kiáⁿ兒ê生活或者人生觀lóng會受tio̍h父母ê緣故ê影響,相信tsit種tī厝內所形成無意識中ê影響對kiáⁿ兒ê人格ê造成有決定性ê關係,因為tī kiáⁿ兒ê心中,tiāⁿ-tiāⁿ用父母ê生活方式成做一種定型ê模樣,tsit種自然無形中ê影響,m̄-nā tī父母kap kiáⁿ兒中ē-tàng看tio̍h,有時tī教會中,牧師kap會友之間mā會有tsit種情形產生,牧師駐tī固定ê教會一段時間了後,會將伊定型ê模樣,teh有意,無意識中造成符合伊型態ê信者ê狀況。

Tsit種影響kap感化,tī咱ê生活中tiāⁿ-tiāⁿ ē-tàng看見,tī咱ê生活中咱tiāⁿ-tiāⁿ聽見一句.「啥物父母生出啥物kiáⁿ兒」是teh說明人tī境況中受tio̍h影響ê事實。為何teh提親ê時hiah-ê人會真注重探聽對方ê家庭狀況?這確實m̄是beh了解財富或者社會地位ê問題,主要tī家庭成員對當事人ê影響,tsiah看會出對方人格ê狀況。

因為人生ê生存是處tī ē-tàng塑做性ê過程中,尤其是gín-á以前ê時期,雖然人ê意志對人格ê影響mā是主要因素,但是生存ê環境可能比人ê意志所佔ê成份khah kuân一--kuá,因為咱各人lóng真了解咱人ê人性ê軟弱,所以伊ê意志tiāⁿ-tiāⁿ會受tio̍h環境影響,當然mā有一kuá例外,有人tī非常惡劣ê環境中iáu ē-tàng離開環境來成功,有人tī美好ê環境中墮落ê人mā是有。

M̄-koh人若ē-tàng有khah適中ê環境,生活可能khah安定幸福,這是事實,這是現代父母一直teh phah拼替後一代ê緣故開創koh-khah完美ê家庭環境,hō͘咱ê kiáⁿ孫ē-tàng生活tī khah完美ê境況中!

同時咱mā必須了解一ê事實,to̍h是你ê kiáⁿ孫因為你ê緣故來成功,有成就,對教會、社會有美好ê表現,同時,你ê kiáⁿ孫mā會因為你ê緣故成做匪類,m̄敢正正當當ê行路,tī教會、社會環境中無面見人!相信咱會了解tsit種嚴肅ê人生現象。

每一個人lóng期待人生會有成就,tsit種成就確實m̄是kan-ta tī個人,必須ài有傳承,若無是無價值ê,為何tī台灣有一句話講「好buē過三代人」To̍h是承傳斷絕,tsit種情形tiāⁿ-tiāⁿ lóng確立tī個人ê影響力,mā to̍h是咱所beh強調ê緣故,因為tsit種由私己ê緣故tiāⁿ-tiāⁿ lóng會關連到其他ê人際關係上,基督徒必須ài體認tio̍h tsit種因為咱ê緣故tsiah影響tio̍h kiáⁿ兒、家庭、教會kap社會khang-khè等等ê問題,tsit種認同to̍h是信仰生活有價值ê內容,因為經過你美好ê信仰ê緣故,ē-tàng tī你所有有關ê生活境況中有正面積極ê信仰表現,tsit種信仰是主所喜樂ê信仰。

因為án-ne,基督徒必須ài tiāⁿ-tiāⁿ用嚴肅、謹慎ê心態來反省檢討咱ê信仰kap生活中所帶來ê影響力,hō͘伊ē-tàng成做有價值,ē-tàng建立德性,造就人生ê信仰內容,tsiah-ê lóng是因為你ê緣故。

(一) 問題ê開始
宇宙ê主宰耶和華kap偏狹猶太思想ê對比to̍h是約拿書ê主題。列王紀下十四章廿五節:「……好親像耶和華以色列ê神藉tio̍h伊僕人迦特希弗亞米太ê kiáⁿ兒先知約拿所講--ê……」。這位先知是西元前八世紀時代ê人,到底是m̄是tsit位先知或者是別人,tī神學界mā有爭論,不過大部份ê人是認為藉tio̍h先知約拿ê名,向當時ê猶太人提出一個問題。咱若看約拿書ê前一本俄巴底亞冊,咱就會知he是充滿tio̍h排斥異邦民族,尤其是以東人,因為以東人對猶太人ê耶路撒冷ê陷落m̄-nā無同情,顛倒用應該死好ê心態去對待伊,所以咱tsit本冊to̍h是針對以東人ê排斥、詛咒tsiah寫--ê,但是約拿書ê主題khah m̄是限定tī偏狹ê猶太人思想,伊是teh強調猶太人所敬奉ê主耶和華,伊是萬民之主,mā是尼尼微人ê上帝。

雖然當時尼尼微城ê人民犯罪反背耶和華上帝,但是上帝iáu期待tio̍h tsiah-ê迷失ê人民會悔改歸正,hō͘ in有koh再接受上帝恩典ê機會,所以命令先知約拿去傳播上帝ê憐憫kap疼,這是上帝ê旨意,但具有偏狹猶太主義思想ê先知約拿,伊suah認為主耶和華是屬於猶太民族所有,其他外邦人無資格thang接受上帝ê恩疼,因此當上帝下命令叫伊去尼尼微傳上帝ê憐憫kap公義ê時,伊suah逃往他施,因為伊認為tsiah-ê無受割禮ê外邦人實在無資格thang接受上帝ê恩典kap祝福。

約拿書ê主題就是beh hō͘當時ê人民了解,上帝m̄-nā是以色列人ê上帝,同時mā是尼尼微人ê上帝,為tio̍h tsiah-ê迷失、反背ê人民,上帝必須命令先知去傳達伊ê救恩。

Tsit-ê思想若用今á日教會ê立場來講,「上帝是基督徒ê上帝,同時mā是非基督徒ê上帝」所以上帝ài咱tsiah-ê已經認bat神恩典ê基督徒,向hiah-ê非基督徒傳達上帝ê憐憫kap公義,這to̍h是咱ê教會存在ê使命。

假使咱若buē-tàng認真建立tsit種觀念,咱就會疏忽上帝託付hō͘咱ê使命,失去傳福音ê教會,to̍h是kap當時ê先知仝款。

因為tī伊ê心中,伊所理解--ê,是神恩無應該tī尼尼微城中,hit種驕傲 ê心態咱mā thang tuì約拿向hit時ê人所講ê話來體會伊,「Mài家己心內teh講,有亞伯拉罕做咱ê祖先,我kā lín講,神ē-tàng tuì tsiah-ê石頭中hō͘亞伯拉罕興起kiáⁿ孫來。」(馬太三:九)。確實tsit種思想tī當時ê猶太人中真普遍,可能tī基督徒中mā有tsit種心態,咱自認為是上帝特選之民,但是其他ê世俗人是化外之人,但是約拿書kā咱講,tsit種偏狹ê心思是m̄-tio̍h ê,因為上帝是全人類ê主!

(二) 約拿逃避上帝
約拿是先知,應該是siōng ē-tàng體會上帝心意ê人,這是先知ê特質,但是約拿tī-tsia所表現ê是buē-tàng了解上帝ê旨意,這是矛盾ê角色!各位啊!咱kap上帝ê關係應該比別人koh-khah清楚上帝ê心意,這是基督徒ê特質,但是有ê時咱suah生活tī kap上帝心意相伴ê生活狀況。上帝ê命令是ài先知約拿去尼尼微傳達上帝ê恩典kap救恩,去尼尼微是上帝hō͘約拿ê使命,但是伊suah選擇倒反ê方向他施。雖然尼尼微ê道路或者彎彎曲曲,但伊suah是上帝ê意思ê路。

他施ê路mā可能是通順舒適,但是伊suah m̄是上帝所指示ê道路。

Tsit-ê事實the kā基督徒講生活ê原則,同時咱mā會想tio̍h主基督tī馬太七章:十三~十四:兩條無仝ê路有無仝ê路況,但是mā有無仝ê結局。

人ê個性,歡喜承受美好舒適ê生活kap khang-khuè,這是事實,但是tī舒適ê人生中若無上帝ê旨意ê時,hit種舒適ê人生實在buē-sái榮耀上帝,tī人世間,人時常逃避人應該ài有ê責任,因為tī-tsia人必須付出真tsē(加倍)ê能力面對伊ê人生,但是對基督徒來講,無上帝旨意ê人生狀況雖然舒適安逸,但是suah m̄是基督徒生存ê實在,基督徒tī人生生活中必須ài確立聽候上帝ê聲音ê生活方式。

Tsit種會阻礙基督徒去完成上帝ê託付ê生活,通常是tī基督徒buē-tàng體會合神ê旨意所致使ê,咱人ê價值觀若bē合上帝ê價值觀ê時,to̍h是人逃往他施ê主因,親像約拿認為尼尼微配buē起神ê救恩,所以雖然有上帝ê聲音,但是因為kap伊ê理念無仝,(自然會發生矛盾、衝突ê現象)為tio̍h beh解決伊kap上帝之間ê無仝認同,伊用遠走高飛替伊進一步ê路-到他施去。

他施tī toh位?雖然無真明顯,但是真tsē人認為是tsit-má西班牙南邊,tī當時是不lí-á發達ê所在(Mā to̍h是文明ê所在),為何約拿無選別ê所在suah選他施?

可能to̍h是tsit種人ê算盤,一方面是空間ê遠離,另外一方面koh有kuân度文明ê所在,因為tsit種進步發達ê所在mā是吸引人ê生活ê一種方式,你看今á日真tsē移民,in ê心思to̍h是希望ē-tàng生活tī khah好ê人生環境中。「Tú-tio̍h一隻船、beh uì他施去」,人ê如意計劃,配合無tú好tú-tio̍h,tiāⁿ-tiāⁿ會hō͘人認為he是天賜良機,因為心所想ê kap現實ê狀況非常巧合!

咱mā想tio̍h使徒行傳廿七章,保羅beh往羅馬ê時ê巧合,有一隻船beh去羅馬,koh有一陣微微á ê南風吹來,眾人lóng真得意,就出帆,結果是tú-tio̍h極大ê危機,船kap所有ê貨物lóng失去!
Tī人生ê過程中,tsit種意念kap現實ê機會真巧合ê相tú ê時,人往往會真得意,才bē記得(却)了交託hō͘主ê人生生活。

(三) 為tio̍h你ê緣故
Tsit種人ê如意算盤(本來是充滿幸福kap光明ê未來),啥知影約拿tī船頂suah tú-tio̍h非常驚人ê危機,「狂風大作、甚至船破壞了差不多」(約拿一:4)。本來約拿ê如意計劃是逃離去他施,坐船了後伊就tī船底睏,認為siōng妥當(Ē-tàng 無煩無惱ê生活)!但是耶和華阻擋,破壞伊ê計劃,用船siōng驚ê風湧來抵擋伊,雖然船內有真有經驗ê內行人,tú-tio̍h真正危機ê時是無辦法ê,kā人ê能力用盡啊kap作為失敗了後,人開始tshuē全能者ê庇護,用siōng原始ê見解,to̍h是咱中間某一人有得失tio̍h上帝!所以什麼人ê緣故hō͘船遇難?結果約拿中籤。

約拿本身向船內ê人訴明伊ê狀況kap伊所信ê主上帝,伊mā深深了解今á日ê問題lóng是因為伊tsiah引起,「我知影lin2tu2-tio̍h大風、是因為我ê緣故。」(一:12)

為tio̍h約拿ê緣故,tsit隻船tú-tio̍h m̄ bat有ê危機,in用盡一切(1)人為ê方法,船內ê工作人員ê經驗,但是無辦法thang好化解in ê危機。(2)各人哀求家己ê神明mā lóng無幫助。(3)Kā船來ê貨物擲掉(是財產、是行船ê主要目的),mā無法度解決問題。

「耶和華ê憤怒」m̄是用tsiah-ê方法thang好化解--ê,是teh tshuē出元兇ê主因,mā to̍h是緣故ê消滅,tsit-ê問題,是基督教信仰ê中心問題,耶穌基督ê救贖ê意義ê原因,只有上帝本身ê作為,tsiah ē-tàng解消人ê罪債。

好親像約拿當時,hiah-ê人ê作為,kap in ê神明或者是船內ê貨物lóng m̄是緣故者,無緣故者自然無法度解決因為緣故tsiah引起ê危機。

約拿mā有先見之明,伊了解船ê危機是伊ê緣故,所以要求in消滅緣故者-伊本人,除了消滅緣故者以外是無辦法hō͘ tsit隻船ē-tàng平順到目的地。

列為,今á日咱來反省,因為你ê緣故所帶來影響:因為你ê緣故(積極正面ê作為),你ê家庭、kiáⁿ兒、親人、教會、社會lóng有美好ê人生清芳ê氣味!若是(消極負面ê人生作為)會因為你ê緣故tsiah hō͘你ê厝、kiáⁿ兒、教會、社會有負面ê評判,尤其基督徒ài反省,有時因為你ê緣故tsiah傷害tio̍h教會,hō͘基督耶穌ê名受侮辱!

咱必須三思你ê緣故ê事實,因為咱ê存在是連帶關係ê,無論tī厝內或者教會內kap社會生活中,確實beh將你ê緣故指向tī有榮光、有見証ê境界中,bē-tàng因為你ê存在,成做天國ê阻礙,這是今á日咱ê信仰生活必須tiāⁿ-tiāⁿ kā伊省思ê所在。

耶穌基督ê福音ê成敗關鍵,lóng確立tī每一個基督徒ê存在中,因為hiah-ê人ài因為基督徒ê緣故才對上帝ê福音有所取捨!

結論:用約拿ê思想來反省咱ê信仰,你ê人生ê動機beh如何去建立?人kám m̄是指向安穩平順ê目的地mah?是m̄是為tio̍h你ê緣故tsiah發生危機或者問題?Bē-tàng因為你ê緣故tsiah致使上帝ê名受辱Ài謹慎。約拿ê緣故Hō͘大船發生危機。