《受恩蒙福的一生》

| | | 轉寄

現代化kap理想ê老境

箴言16:31;提多書2:1-3

老化是近代世界中有備受注意ê一個人生問題,因為追求長歲壽ê人ē-tàng講是人ê本性,通常人lóng ǹg望伊ê人生有美好koh久長ê日子。古代社會提起三多:多財、多子、多壽。可見自有人生以來,人一直ǹg望長歲壽,因此mā有bē少祈求長歲壽或者不死丹ê事例。有一則故事:荷蘭有一位名醫哈佛博士,m̄-nā醫術好,救人無數,而且歲壽真長。Teh-beh過往tsìn前留落-無beh外傳ê長歲壽秘方,藏tī封起來ê鐵箱中。有一位英國好額人開掉伊ê家產,向tsit位名醫ê後代kā tsit份長歲壽秘方買落來,帶tńg來家鄉kā厝內ê人lóng叫--來,用tsiok期待ê心情phah開tsit-kha鐵箱,發現伊用大筆ê金錢買tio̍h ê只是一張紙,頂面寫tio̍h兩tsuā字:「人若beh長歲壽,頭ài冷,腳ài燒;食飯只食八分飽。」tsit位大好額人用大筆金錢買來ê只是生活中ê智識而已,這兩tsuā字「頭冷腳燒」,確實是一位健康ê人ê形象,尤其是食飯八分飽,koh-khah是歷代名人所主張ê長歲壽秘訣。

雖然老化kap長歲壽是人生所關心ê問題,講tio̍h人類性命ê年限,相信咱lóng了解古早時,人類平均歲壽是30左右,古羅馬時代是30出,亞歷山大大帝32歲死,凱撒大帝活到45歲;中古世紀烏死病kap ma-lá-lí-á hō͘人e̍歲壽mā tī 30出頭左右,一直到工業革命了後,tsiah突破40歲。美國自1900年間開始統計是49.2歲,1950年是70.2歲,2000年suah超過78歲。台灣ê情況mā相仝;根據今年9月份ê統計,65歲以上ê人有213萬人,百歲以上ê人瑞有713人。主因是生活環境ê改善kap現代醫療ê進步,對歲壽ê延長有正面ê作用。

唐朝詩人韓愈(西元768-824)tī伊ê〈祭十二郎文〉中寫tio̍h「我iáu有三ê阿兄lóng不幸早早來過身去,我歲數iáu末四十tio̍h看茫茫、髮蒼蒼、齒牙搖動」,文中提起三位阿兄歲壽lóng無長,家己mā呈現老化ê現象,頭毛白、嘴齒動搖,視力茫茫可能是白內障或者老花,雖然韓愈本身活到56歲,tī當時無算是早死,但是tsiah-ê老化ê現象是人生ê過程,雖然因為個人遺傳kap體質有一kuá無仝,但是面對老化tsit-ê問題,hiah-ê人tiāⁿ-tiāⁿ想出所有ê辦法想beh去解決或者延遲老化ê現象,老人本身確實必須ài認真去面對老化ê事實。美國南加州有一個特別ê國際組織,叫做「長青社(Hemlock Society)」,Hemlock是北美洲ê松科ê長青樹,tsit-ê團體是tuì多位諾貝爾獎得主發起--ê,主旨是推sak hō͘老化變慢ê活動,其中提出「疾病壓縮論」,盡力hō͘人年老ê病ê痛苦愈短愈好,siōng好是the beh過身前一個禮拜,或者tī前一兩工tsiah破病,koh-khah好是無病痛ê自然變老過身,mā to̍h是咱社會所提起ê人生五福「考命終」。所以,如何實現人生teh老化ê過程有理想kap完美,確實是今á日老人生活ê一件大事。

雖然每一個有歲ê人,tī伊老年ê生活中,的確真期待理想ê老年期生活。但是實際生活上,人進入老化ê過程往往有各種無仝ê影響,比如細胞組織ê退化,mā to̍h是生理ê退化。因為老化所形成ê生理狀況,致使老年人食ê方面無理想,koh-khah影響老年人ê身軀狀況,是造成老年體弱多病ê主因為之一,疾病mā影響胃口,形成惡性循環。因此tuì頭頂到腳底,差不多所有器官lóng會發生狀況,視力、聽力、嘴齒,慢性病比如高血壓、糖尿病、心臟病、腰子病,甚至是帕金森氏症或者退化成植物人,必須完全依賴別人或者醫療設備維生。除了生理ê退化問題之外,老年ài面對ê iáu有家庭問題、經濟問題、文化問題等,tsiah-ê問題lóng會影響老年生活。相信tsiah-ê每一個人lóng必須去面對ê人生現實,因為老年mā是人生ê一個ê時期,ná親像少年、壯年仝款是人生ê一個過程。既然是人生過程,必須用平常心態去面對伊,同時ài準備迎接老化ê過程。因為明知老化ê必然,若有先準備就khah ē-tàng適應,生活適應好就ē-tàng khah順利,mā to̍h是teh老化ê過程中有khah美好ê理想狀況,體驗人生比如倒食甘蔗,愈食愈甜。

Tuì心理上,咱mài kā老化看做是一種老,伊是成熟。古早詩人杜甫ê詩句「人生七十古來稀」,tsit句詩tī現代人需要重新評估,目前台灣70歲以上ê人身心狀況lóng iáu相當理想,真tsē lóng ē-tàng完全自理生活,這是可喜ê現象。因為現代ê老人buē-sái有古早時ê老人觀念,古早老人一切生活lóng tuì序細服侍,現在tsit種生活方式已經無可能,確實有mài-koh tī以前ê時代。所以今á日ê主題咱beh來思考(一)現代化kap人生(二)現代化對老年kap人生ê影響(三)理想ê老境。

(一) 現代化kap人生
現代化是英國伊麗莎白時代所產生ê語詞,表示當時ê生活比過去ê生活好真tsē,各方面lóng真進步。台灣社會tī 50年前kap tsit-má,mā是完全無仝ê社會狀況。因為人生kap時間kap空間有密切ê關係,ē-tàng講人是活tī時間kap空間ê中間,tsit種ê時空ê變遷tī近年代是非常快速--ê,相信40、50 guā歲ê人lóng ē-tàng tuì觀察中感受tio̍h,若用回顧過去kap現在ê社會動態,會發覺tio̍h時間kap空間ê變遷,其實非常激烈,因此有人稱做「急變ê現代」。但是現代化有toh一kuá特性neh?

(1)Speed速度:速度是現代化ê特徵,生活上ê實例,ē-tàng講50、60歲ê人lóng經驗過gín-á時社會動態ê清幽,kap現在社會ê緊張是非常明顯ê區別。我回憶兒童時代庄內面腳踏車iáu m̄是真普遍,歸庄mā只有一位姓許ê先生有一台50cc ê o-to-bái,當時有o-to-bái是真轟動ê tāi-tsì。Hit時公車ê速度mā buē緊,我bat jiok tī公車後面走了兩三百米,車到站,我mā到阿。Hit時kap現代ê分秒必爭完全無仝,過去社會是安然、和氣kap真慢ê步調。現在大都市內,無論是tī街路行ê人、病院ê醫生,四界lóng像用走--ê仝款,快步行,因為hiah-ê人lóng感覺時間無夠用!以前有一部片叫做環遊世界80工,是想beh顯示現代交通ê速度,tsit-má無需要80工阿。Tsit-má飛龍機比汽車火車koh-khah緊,hiah-ê人甚至ē-tàng坐火箭起lih月球,速度是現代化ê重要特色。

(2)Tsange變化:mā是現代化ê特徵。若詳細觀察現在ê人生社會、文化背景、價值心態,咱lóng ē-tàng體會tio̍h近年社會型態、都市發展、庄腳ê變遷lóng真快速。有一kuá人因為都市計劃,一下á變成大富戶,街路四通八達,交通利便,家家戶戶lóng有自用車,少年人教育經濟水準提kuân,家庭結構mā改變,大家庭變成以夫妻kap kiáⁿ兒兩代為主ê小家庭,以往用老人做家庭ê中心,現在變成用孩童做家庭ê中心。Iáu有價值觀ê改變,古早時男女授受不親、飼囝防老、查某囝仔無才to̍h是德,tsiah-ê觀念lóng已經無合時代,因為價值心態完全無仝,思考模式或者是行事規則無仝,以前ê人安份守己、m̄敢為非sám做。現代有一kuá青少年為tio̍h beh達到目的不擇手段,欠錢用竟然用搶劫、綁票來解決!強調「只要我歡喜,有甚麼bē-tàng」,自我放縱ê表現,是現代化ê不良ê改變。

(3)Confusion混亂:mā是現代化ê產物。以往大路或者交通ê情形iáu buē hō͘人感覺混亂kap繁雜;現代社會ê步調快速加上hiah-ê人自私無守法ê結果,就變kah混亂。Phah開社會版ê新聞,搶劫、兇殺、綁票、強姦:政治上ê混亂像911事件、暴動;國際之間民主kap共產ê對立、回教國家敵視西方英美;宗教ê亂象以及現代性方面ê亂象等等。雖然現代化提昇真tsē人類生活ê方便kap舒適,但是mā造成了真tsē人生ê混亂,tsit種負面混亂ê現象,是以往單純ê社會裡m̄-bat發生ê tāi-tsì。

(二) 現代化對老年kap人生ê影響
有歲數ê老人因為過去所受ê教育kap社會經歷,kap現在tsit-ê時陣相比,有siuⁿ大ê變遷,因此有真tsē觀點、價值觀kap心態,以及對事物ê觀察角度,lóng kap現代青年無仝,tsit種時代ê差異是難免--ê,需要雙方面ê互相調適,tsiah ē-tàng hō͘家長生活koh-khah美滿。To̍h是因為án-ne tsiah出現老人獨居ê情況,老人獨居mā是現代化ê產物,過去三、四代同堂真普遍,現在是真少看tio̍h ê,主因to̍h是兩代之間受tio̍h現代化ê影響,產生觀念kap價值觀上ê差異,tuì此thang知現代化對老年有絕對ê影響。問題是beh如何減輕tsit種現代化對老人造成ê負擔?這就ài看人看款阿,主要就是ài調整到ē-tàng承受ê範圍內。有人講人生ná親像是坐火車,坐過車站一站koh一站,無注意tio̍h到了終點,千萬mài坐特快車,甘願坐慢車ta̍uh-ta̍uh-á欣賞沿路風景。

當然,現代化對老人ê影響siōng大ê to̍h是身心ê變遷。因為人生若tī時空中過tio̍h相當ê一段時間,必然經歷人tī時空中產生ê真tsē問題,若用以往to̍h有ê觀念kap價值心態,看待現代完全無仝ê價值觀kap思考模式,當然會產生無適應。這是目前真tsē老人對青年人ê生活方式無法度接納、甚至討厭ê原因。現代老人看kiáⁿ孫輩對待父母、ta-ke-kuaⁿ ê行為kap態度,會認為是真無合理ê人生態度,以前我tī Digest雜誌上看tio̍h一篇khau洗ê文章,寫tio̍h「人生70 ê五子登科」:(1)厝內ê人上班或者外出,我顧厝;(2)厝內是非m̄聽,做一個臭耳聾。(3)後生新婦上班,我看孫。(4)無順眼ê時,就當tsheⁿ-mê。(5)厝內ê tāi-tsì mài講,就做啞口。文中mā提起老人生理上必須準備面臨ê人生狀況:(1)身軀ê肉鬆鬆(2)白頭毛kap落頭毛(3)血管硬化(4)體能落降(5)器官退化(6)性退化(7)新陳代謝bái;吸收力、胃口無好,無法度維持水準ê體能。若生理ê問題之外koh加上其他ê負擔,ná親像是經濟壓力、kiáⁿ孫無關心ê時,lóng會形成無理想、負面ê老境,to̍h算長歲壽,mā會出現真tsē問題。

(三) 理想ê老境
基督徒對老境ê人生價值觀,應該tio̍h有比一般人koh-khah高層次ê人生體會。Uì咱ê人生發出ê有基督,主耶穌bat應允信祂ê人有豐盛ê性命(約10;10)tī-tsia所講ê豐盛,當然包括每一個人老化ê人生,因此有信仰ê人生,tī人生ê過程中,必定有比別人koh-khah豐盛ê性命表現。當然tī-tsia所必備ê條件,先是對家己ê身軀ài有相當程度ê了解,然後配合智識kap意志力去好好á照顧。Teh老化ê過程中,有完美理想ê表現是上帝交hō͘咱ê責任,健康ê身軀確實ē-tàng延遲老化,這是咱必須了解ê事實。但是健康是需要tī平時ê生活,去建立ê性命內容,絕對m̄是只靠健康食品而已。因為健康ê身軀是指整體性ê,食物雖然重要,但是其他ê身心靈各方面ê配合mā是要素,保持運動kap好ê生活習慣,mā必須吸收保健ê智識,tsiah ē-tàng幫助咱建立美好ê人生內容。對咱身軀ê狀況ài了解,我本身自1980年開始記錄健康狀況近60 pái。通常咱lóng知影ài保持健康ê生活、飲食、生活環境、禁薰酒、多多運動、保持心情愉快,但是實行上真有問題,所以理想ê老境是ài建立:(1)老人本身ê認知kap意志力:認知指ê是ài建立老人生活ê正常ê價值觀,用此價值觀做基準,去經營符合老境ê生活方式,應該是buē差siuⁿ遠。講到意志力,koh-khah重要,伊是推動咱生活去達成目標ê動力,一般來講,老人ē-tàng家己正確ê食藥仔、照顧三頓食穿,to̍h是理想ê老境,可惜人因為老化,漸漸因為真tsē症狀,加減lóng會影響tio̍h意志力,這可能是老人必須去克服ê問題之一。(2)家庭kap kiáⁿ孫(親人)ê關懷:理想ê老境是需要家庭親情,這是絕對ê事實。21世紀初人類ê兩大危機:愛滋病kap癌症,現在koh增加了憂鬱症,尤其是老年憂鬱症。因為理想ê完全是在teh老化ê過程中,生活tī完美理想ê過程來ê,老化ê現實若kap理想相差siuⁿ過tsē,老年ê生活ē-sái講是無幸福thang講。Tsit種理想kap現實差siuⁿ大ê老化ê過程,會成做老人ê負擔,但是老人無負擔ê本錢;理想ê老境是老人生活無負擔kap壓力,無論現代化變遷ê衝擊如何,厝內ê人親情ê潤澤,siōng ē-tàng hō͘老人生活感覺溫暖。(3)信仰ê完成kap上帝ê賜福:箴言16:31「白髮是榮耀ê冠冕,tī公義ê道上必定ē-tàng得tio̍h。」非常清楚說明了人生得勝ê目標,基督教ê價值tī-tsia,咱人生ê一切,有上帝豐富ê預備,只要你具備信心,伸出信心ê手路接受豐盛ê神恩!