《寧毀不銹─馬偕e5故事》

| | | 轉寄

杏林春常暖

馬偕tī 1872年3月9日來到淡水,根據伊日記ê記載,當時台灣麻lá-lí-á 當流行,居民bē少因染tio̍h tsit款病來死..去。

Tsi̍t百jī-tsa̍p guā年前,台灣各地ê衛生環境普遍lóng iáu真差。it般民眾khiā家ê周圍lóng發真tsē草,水溝á無通,sì界lóng làm土,báng-á真厚,所以傳染病sì界傳播。

伊免費用金雞納霜特效藥替患者治病,tsit種藥á hō͘人叫做「馬偕ê白藥水」(氣味真苦,了後改做藥片)。Iáu有染tio̍h「腿膿瘡」(俗名臭腳黏)ê患者mā真tsē。

馬偕由英國買牛奶色ê膏藥,kô͘ tī患者膿爛ê所在,效果真好。Hiah-ê khè藥膏ê甕á,直徑12吋,甕á口直徑5吋,甕á高1呎2吋。Hi̍t種藥á uì倫敦Darin Brotters製藥公司買..e,部分ê藥甕á iáu保存tī今á日「偕醫館」內。

來台初期,伊用可能uì多倫多kap紐約時代學ê醫療技術,tī台灣佈教ê仝年開始為患者治病。有ê病患甚至行5、6哩來滬尾就診,為tio̍h jú來jú tsē ê病患,5月5日另guā租tsi̍t間厝當做醫館,叫「滬尾醫館」,地點tī今á日淡水三民街口。馬偕siōng早期tī厝內看病ê時tsūn lóng是親自診斷,學生(包括信徒5人kap第it代門生)做助手。淡水英商5行ê Frmkyn醫生mā來鬥saⁿ-kāng。

租厝成做「滬尾醫館」了後,另外tsi̍t位5洋行醫生林格(Dr. S. Ringer)mā來鬥saⁿ-kāng。
馬偕擔任伊診病時ê翻譯,mā hō͘學生有機會見習。林格醫生前來幫忙有7年hiah久。當時基隆mā有幾位guā國醫生參與醫療工作。
無久馬偕向母會申請tsi̍t位專職醫生。1875年1月29日加拿大派來第jī位宣教師,華雅各醫生(Rev. J. B. Fraser, M. D.)到淡水來協助。可惜2年後,華雅醫師ê bó͘來過身,華雅醫師只好tshuā 2個tsa-bó͘-kiáⁿ tiām-tiām-á離開台灣tńg去加拿大。

1878年有1個葡萄牙人,因為破病來「醫館」求治,kuí工了後不幸死亡。林格醫生為tio̍h查出原因,就kā病人ê屍體剖開化驗,結果tī肺部發現指甲hiah大ê蟲,這是全世界第i̍t pái uì人體內發現「肺姪蟲」,tī-tsia tsìn前,醫學界bat uì動物體內發現「肺姪蟲」,m̄-koh人體內發現是頭一pái。因此tī醫學病例史頂頭mā是值得寫記錄ê代誌。

1879年3月馬偕買「滬尾醫館」東pîng ê土地,策劃起新醫館,tī林格醫生kap Maun醫生ê協助下tī 5月18日完工開業,koh tī 9月14日舉行新醫館開幕禮拜,由馬偕證道,眾朋友kap醫館內底ê助手lóng到場參加。

馬偕結婚了後ê第jī年(1879年12月26日),伊tshuā bó͘第it pái tǹg加拿大。長女偕媽連6個月大,第jī tsa-bó-kiáⁿ、孤kiáⁿ tsit時iáu未出世,算算leh這是伊tī台灣宣教7年了後難得回鄉的旅行。

離開台灣tsìng前,伊kā當時北部22所教會,大概3百名信徒交代第3位宣教師閏虔益牧師kap 21位本地傳道師。

Tsit段期間伊tī加拿大各地演講證道,mā bat去美國幾pái,伊去演講募款是為了ài tī台灣展開第2期ê宣教工作。

加拿大皇后大學趁伊tsit-pái回國時,頒hō͘馬偕「神學博士」學位,藉tioh8an2-ne表揚伊teh海外宣教ê成就,了後世人lóng尊稱伊「馬偕博士」。

1880年底,美國底特律有tsi̍t個婦人,為tio̍h紀念馬偕船長(Captain Mackay)捐出3千美金,協助馬偕tī台灣ê宣教工作。馬偕運用其中ê 2千5百kho͘美金,tī 1883年起「滬尾偕醫館」,簡稱「偕醫館」(Mackay Hospital)。

1884年8月6日,清廷為tio̍h越南問題kap法國開戰,俗稱「西á反」,本來tī安南局部性ê戰爭,演變為兩國全面性戰爭,交戰竟波kap台灣。

法國派出了兩支艦隊,分別由海軍少將李士卑斯kap中將孤拔領軍,停tī基隆、滬尾guā海。法軍ê戰略,原本beh奪下台灣當做進攻福州ê跳板,進tsi̍t步koh消滅清國海軍,nā是攻打台灣就選擇產煤豐富ê基隆做目標,台灣巡撫劉銘傳親身去前線督戰,法軍第it波攻擊buē-tàng成功。

8月底法國海軍koh強烈攻打基隆,tsit時滬尾戰況mā真危急,劉銘傳決定去援助滬尾。Tsit時出現tī滬尾ê法國艦隊向岸頂開砲,民眾kap士兵傷亡bē少。



10月8日法軍登陸,雙方teh沙崙展開tsi̍t場血戰,交戰ê結果,偕醫館真自然tio̍h成做清軍ê野戰病院。

為tio̍h搶救傷兵,馬偕動員學生kap街á頂ê市民,用門板當作擔架,扛來ê傷兵放滿醫館ê門口,路邊kap橋ê sì周。當時guā國醫師約翰生kap戰時駐tī淡水港ê英艦「柯克哈特號」軍醫布羅恩等,mā熱心參與救治工作。

中法戰爭結束了後,治台七年,對台灣近代化貢獻突出 ê劉銘傳,10月19日派淡水防衛司令孫開華提督,親自到偕醫館向馬偕致謝,並以墨西哥銀萬jī賠償遭暴徒拆毀ê教堂,koh感謝in救治傷兵正義ê行為。

「偕醫館」親向tsìng前講..e,是馬偕博士tī 1883年起好..e。建築費ê來源是美國底特律ê tsi̍t名婦女,beh紀念死去ê翁婿馬偕船長捐獻..e。目前伊iáu koh tī淡水街á頂kap淡水禮拜堂離無juā hn̄g。內面保存真tsē馬偕當年使用過ê用品、醫療器材、相片kap其它珍貴資料hō͘人參觀。

講到目前tī台北市中山北路2段92號ê病院大樓,1956年4月18日,根據長老教會第9屆北大第123條款,議決確認做「馬偕紀念病院(Mackay Memorial Hospital),這tsiah是紀念馬偕博士創建ê病院。伊經過拆掉kap重起ê蛻變,tsiah有了今á日雄偉ê規模kap設備。
M̄-na án-ne,台北iáu有淡水竹圍分院kap台東馬偕紀念分院,馬偕遺澤台灣後代子民m̄是3、2句話ē-tàng講完..e。