《台灣人e5先覺─黃彰輝傳》

| | | 轉寄

懷念恩師黃彰輝牧師

1948年1月6日第九屆南部大會tī斗六召開,會議當中通過台南神學院重新開辦ê議案。仝年4月1日tsái-khí 11點tī神學院ê禮堂舉行隆重ê復校典禮。新學期訂tī 9月開學,tī 2月中辦理招生,我真慶幸我hō͘錄取,三月提前進入學校,所以tio̍h參加復校典禮。

黃彰輝牧師tī 1947年9月uì英國tńg來國內,1948年開始tī長榮中學擔任聖經kap英語教師,明年九月按立牧師又koh就任台南神學院第三任院長。伊是頭一位擔任台南神學院院長ê台灣本土人。

神學院頭一年,彰輝牧師教阮哲學史,tī我印象中,伊開ê另外一門課是創世記釋義;第二年教宗教哲學;第三年開ê課是教理史kap系統神學;第四年繼續上伊ê系統神學。神學院四年期間(當時ê神學院是四年制),逐年lóng有伊ê課,接受彰輝牧師ê指導。

上彰輝牧師ê課是一大享受,thang講ē-sái學tio̍h tsiok tsē ê物件,伊使用啟發式ê教學法,有系統、有條理清楚ê講解,教阮beh án-tsuáⁿ思考,這對阮以後研經、準備講章、宣講信息,幫贊非常ê大。伊是一位出色ê神學教育家,伊m̄-nā教人beh án-tsuáⁿ做學問,又koh結合學問、生活、kap工作,去從事牧會ê工作、教導信徒。

除了教學以外,彰輝牧師又koh真熱心投入普世教會ê事工,不時參加各項國際會議kap活動。伊每一pái開完會ia̍h-sī參加國際活動tńg來,一定kā伊所聽tio̍h、所看tio̍h、kap所接觸tio̍h ê事項lóng一一kā阮講,hō͘阮ia̍h-koh tī學習階段ê學生知影普世教會ê動向,又koh分享伊所得tio̍h ê經驗kap感受。伊拍開阮ê眼界,除了 koh-khah 了解普世教會ê情況、mā來kap外界koh-khah接近。這是別ê神學院學生得bē tio̍h ê福氣。後來台灣基督長老教會總是會參加普世基督教協會(World Cooncil of Tsurtses)成做會員教會,是透過伊ê鼓勵kap拍拼奔走促成..ê。伊是普世教會運動一位真受敬重ê導師。

我個人得tio̍h彰輝牧師真大ê關愛kap真tsē ê照顧。1952年神學院畢業了後,為tio̍h促我出國進修,透過當時ê總會傳道處特別安排我tī台南附近tsi̍t-ê農村小教會服務,一面牧會、一面tńg去學校接受語文訓練kap作出國進修前ê預備。m̄-koh tī畢業後ê kè-tńg-nî,身軀小khuá感tio̍h無爽快,hō͘強迫暫時請假療養,所以出國進修ê計畫tio̍h延落來。 台灣教會tī 1965年舉行福音tī台灣宣教一百年慶典kap活動結束了後,彰輝牧師辭掉台南神學院院長ê職務,去英國倫敦就任普世教會神學教育基金會總幹事(Theological Education Fund. WCC)比彰輝牧師khah早離開台南神學院ê前副院長安慕理牧師(Rev. Boris Anderson)mā是我ê新約學教授,tńg來參加福音tī台灣宣教一百年慶典ê時鼓勵我出國進修,我用年紀大koh可能身體檢查無法度通過當做理由來拒絕,伊suah講留學英國無要求身體檢查,除了 koh ktsiann5我,koh主動kā英國長老教會為我申請全額獎學金,因為伊真熱心只好接受伊ê好意。tī 1966年8月去英國劍橋衛斯敏士德(Westminster)神學院進修兩年了後,koh再透過彰輝牧師申請得tio̍h美國紐約協kap神學院(Union Theological Seminary)ê獎學金留學一年,tī 1969年tńg來國內服務。

Tī英國ê期間幾pái到彰輝牧師倫敦ê事務所kap英國長老教會總會拜訪kah-tsá兩位老師。安慕理牧師當時擔任英國長老教會總會海外宣道會幹事。有一pái受邀請去Seaford彰輝牧師寓所,當時kan-tāⁿ有伊kap師母tuà tī-hia,gín-á lóng已經成年各自成家,無kap父母tuà作伙。我tī-hia得tio̍h真好ê接待。師母kā我講,彰輝牧師愛食豬頭皮,伊kā kui-ê頭ê肉lóng買tńg來,加香料滷過了後,彰輝牧師lóng 食buē-siān。因為師母m̄食tsit-ê物件,所以每一pái lóng是伊一ê人享用。這是彰輝牧師日常生活ê小故事,uì這 ē-sái知影伊生活簡單樸實,無過份ê要求,滿足tī伊khîn-khiām ê生活。

我tī紐約期間,彰輝牧師經過hia一定會來看我。有一pái伊ài我負責聯絡,邀請tī紐約地區留學ia̍h-sī工作ê同學ta̍k-ke來tàu陣作伙。無想tio̍h ta̍k-ke接tio̍h通知lóng推東阻西,結果連tsi̍t-ê mā無露面,hō͘伊非常失望。後來伊the̍h出十元美鈔hō͘我(35年前十元美鈔是大錢)交代我去買食材,食材買tńg來了後,伊親自落灶腳,同時iáu hō͘我機會教育,指導我安怎做菜,hit工阮兩個人食了真phong-phài。

彰輝牧師真會照顧學生,mā真會提拔後輩。透過伊申請tio̍h獎學金安排到國外留學ia̍h-sī進修ê人bē少。In tńg來國內了後ē-tàng貢獻in所學tio̍h ê物件,這是彰輝牧師ê期望,suah有一部分人去了就無ńg來,出了國門就一直留連tī國外,小khuá hō͘彰輝牧師感覺傷心失望。

1987年伊最後一pái tńg來,當時已經知影家己得tio̍h癌症,嗽bē停。伊交代我安排kap李登輝總統見面,陪同伊晉見總統ê有安慕理牧師夫婦、高俊明牧師kap我。出來了後,伊交代阮beh hō͘ 李登輝先生critical support(批判性ê支持),意思是:khiā-tī基督徒信仰ê立場去支持伊,m̄-koh必要ê時mā應該提出建言、批評、甚至糾正。彰輝牧師1988年10月27日安息tī英國Sussex ê Seaford。