《胡文池牧師kap布農族》

| | | 轉寄

進化論ê鼻祖

英國科學家達爾文(Tsarles Darwin 1809-1882)bat發表進化論講人類是tuì低等ê猿猴類進化á來,á猿猴又koh是tuì koh-khah低等ê動物進化而成‥‥。Án-ne講落去,所有生命是tuì siōng下等ê變形蟲(Ameba)進化á來,tsit種學說,雖然以後受tio̍h bē少學者反對,但是當時確實bat驚動了學術界kap宗教家。

對tī tuà-tī高山一帶ê布農族來講,tsit種「蟲變成人」ê論講並無希罕.因為比達爾文koh-khah早數百年、或數千年前,布農族ê遠祖已經有tsit種ê想法了。M̄-nā進化論,iáu有「退化論」ê奇異怪講neh!

每一個民族lóng有in獨有特殊ê傳說。傳說表達了in民族固有ê思想kap文化,甚至宗教。

布農族ê傳說真tsē,tsiah-ê傳說到底是誰創始,koh tī什麼時代發生,誰mā m̄知影,不過來路一定真tsē。因為in無家己ê文字,是由口傳,tuì tsit代傳到下一代。因此,傳說juā-tsē會跟tuè時間kap地點á產生變化。我現在bueh講ê是五十年前所得tio̍h ê資料。

一、蟲變為人ê故事
太古時代,有一種名叫「古拉特Clat」ê蟲。伊是面朝地慢慢爬行ê。伊家己感覺án-ne太無方便,心想,若ē-tàng khiā起來行路有juā好ah!ē-sái講是如何tsiah ē-tàng khiā立neh?想mā想bē出有什麼好辦法。

Tú好,當時有一隻蚊á飛來,用力叮伊ê腹部,致使伊因痛á跳起來khiā立。Tuì tsit時tsūn開始,伊真歡喜ē-tàng用兩腳khiā起來行路。

了後伊生二個gín-á。長子長大了,行tī沙連堡kap社寮村一帶,最後來到巒大山,伊看看tsit所在真好,就定居落來。這就是布農族巒支派(Takebanuad)ê始祖。(根據竹內友治大正二年調查述者為Tamaduan社ê Ulavtasikapan。

二、人變為猿ê故事
太古時代,有一陣年青人tī山畑耕作。In因腹肚餓,其中有一個人提議講:「大家來煑蕃薯食pah!」伊就叫一個人去煮。

受託ê人在地上立起三個石頭做窯,頂面放一個大鍋。收集樹枝起火,就開始煮地瓜。其中有一個忍不住饑餓,看tio̍h水一開,不管地瓜熟不熟,就用手the̍h一個、koh再一個食了。煮ê人看bē順眼,大怒如火,the̍h起鋤頭柄bueh phah hit-ê貪食ê人。

被phah ê人搶去鋤頭柄,用力折斷。Koh再the̍h折斷ê一半,真得意假裝phah家己ê腳tshng並哈哈大笑,不料tsit-ê半ê鋤頭柄誤插入肛門,伊koh痛koh驚,但是拔mā拔bē出來。而且奇怪地,鋤頭柄竟忽然變成尾溜。眾青年行uá來,ài-beh看發生了什麼tāi-tsì。Tsit-ê有尾ê怪人,因感覺見笑,就逃到山中變成猿了。

三、兄妹變為犬ê故事
Tī太古時代並無犬。

一個家庭,有一工全部動員到耕地工作。其中有兄妹二人對其他ê家人講beh先tńg去煮飯,就急速走tńg去。

日頭落山,大家快步tńg去厝裡bueh食飯。一入門,煞看無爐上有飯thang食,甚至連兄妹兩人ê人影mā看bē-tio̍h。

當in koh再推開睡房查看時,誰mā料想未到,竟然看tio̍h那兄妹兩人正相攬teh做床中戲。大家憤怒如燄火,the̍h起木棍phah tsit兩個可惡ê男女,結果這二人突然變成二隻犬了。(Takebaka支派傳說)

四、女人變為老鼠ê故事
太古時tsūn,有一個查某gín-á名叫打卡砂卡爾。有一工,全家人動員出去工作,只留落來一個查某gín-á tī厝做家事。日頭beh落山時,大家做完了一工ê工作,同齊tńg去厝裡來。

Ē-sái講是留tī厝ê查某gín-á是一個pîn-tuāⁿ蟲,tuì早起一直睡到暗時,連早頓用過ê碗盤lóng m̄洗,雜亂一堆。父母看了tsit種景況,雖然心中受氣,卻認為這hit年青人常有ê事,mā不責罵伊,只上前搖搖伊,叫伊起床。

女gín-á起床來感覺pháiⁿ勢,馬上the̍h來未樁ê小米,連tio̍h外殼就放入去鍋á煮了。大家行近鼎á bueh食飯,煞無人食得下。

看此情況,父母禁bē-tiâu大罵了伊一下。女孩自覺無面見人,暗暗á逃入壁孔,家己食所煮帶殼ê小米,就án-ne變成老鼠了。 (達hō͘巴卡社傅講)

五、只有福音ē-tàng hō͘「動物」變成上帝ê兒女
山地民族iáu有真tsē真tsē像tsit種「人變為動物」或「動物變為人」ê傳說。

五十年前,福音iáu未傳入山地時,in lóng相信tsiah-ê傳說。布農ê語言中,無「人」或「人類」tsit句話。一切ê動物,包括人類lóng稱做「活物」(Minihomis)。Tī in看起來,動物kap人ê間,並無本質ê差異,這並無ē-tàng表示in ê腦筋幼稚。自稱做文明ê中國人,mā不是án-ne mah?

原子時代ê現今,iáu有真tsē人相信白蛇傳ê故事,白蛇變為美麗ê女人,kap許先生結婚,甚至生kiáⁿ、做官。Iáu有梁山伯kap祝英台ê故事,in最後iáu雙雙對對變成ia̍h-á neh!

真tsē人講「人是感情ê動物,人kap動物ê差異只tī「感情」方面而已。」這是天大ê tîng-tâⁿ。In m̄知影,動物mā仝款有感情。

飼養犬ê人lóng知影犬是有情感ê動物。有真tsē故事指出犬是會知恩報本ê。人lóng叫這為「義犬」。鴿子絕對是一雄配一雌。螞蟻行路相tú時,mā交頭接耳,你講,in無感情mah?怎樣ē-tàng講只有人才是感情ê動物?

若有人罵你「衣冠禽獸」時,你會欣然接受,á不怒髮三尺mah? 不管古代原住民或現代進化論者怎樣講,咱基督徒相信tī本質上,人kap動物是完全ê無仝。聖經mā指示了tsit項事。

Tī創世記一章26節,上帝講「阮來創造人類,in tio̍h kap阮類似、kap阮相像。Hō͘ in管理魚類、鳥類kap一切牲畜、野獸、爬蟲等各種動物。」

原住民信主了後,就無koh相信古時ê傳說,á相信,in是上帝寶貴ê兒女。