《白話字文獻e5文明觀》

| | | 轉寄

第三章 《台灣府城教會報中ê現代醫療衛生書寫》(六)

早期,tī南部馬雅各醫生ê台南醫館、新樓病院,中部盧嘉敏醫生ê大社醫館、蘭大衛醫生ê彰化病院,北部ê痲瘋病院,lóng有招收見習生作為培育本地醫生ê記錄。總是,siōng早ê台灣西式醫學教育是tī旗後ê慕德醫院,當初時tō已經bat附設醫學課程,亦有學生「林晟」得著文憑。 一般來講,早期醫院內面主要ê事務kap流程包括:制定醫期看病、患者照醫期來醫院,先做禮拜了後,tō照順序領籤—á,然後按號頭看病。病院主要分作內科、外科、眼科kap普通科,醫生除了看病症、發藥,亦會照醫期ê手術日來替患者進行手術。除了病人到醫館來就醫之外,醫生亦會出外行醫。Tī病院lāi-té早暗lóng有禮拜,醫生ài主持、講道,講解基督教義hō͘患者聽。 而且,當時病院內面已經有白話字ê教學,醫生tī患者tuà院期間,ài教in o̍h白話字,包括基本ê bat字,以及讀kap寫ê訓練,hō͘ in m̄-nā得著醫治,mā得著文字ê教育。所以,醫生所負責ê工作ē-sái講真tsē真無îng。另外,醫生tī診療ê過程中,亦發覺著kap患者談論宗教問題ê效果真好,所以開始招收學生,一方面tàu分擔醫生ê事務,一方面亦訓練本地人ê醫生成做本地ê醫療宣教士。