《巴克禮普世版聖經(試讀本)》

| | | 轉寄

巴克禮普世版(試讀本) 使徒行傳第五章

A-ná-nî-a kah Sat-hui-lat
1 Ū tsi̍t-ê lâng miâ-kiò A-ná-nî-a, kah i ê bó͘ Sat-hui-lat bē in ê sán-gia̍p. 2 In ang-á-bó͘ tsham-siông liáu-āu kuat-tīng tsiong só͘ tit-tio̍h ê tsîⁿ lâu tsi̍t-kuá khí-lâi, tshun-ê tsiah tuà lâi kau hō͘ sù-tô͘. 3 Pí-tik kóng, "A-ná-nî-a, lí án-tsuáⁿ hō͘ Sat-tàn tshiong-muá lí ê sim lâi khi-phiàn Sìng-Sîn, tsiong bē hn̂g ê tsîⁿ thau-thau-á lâu tsi̍t-pō͘-hūn khí-lâi? 4 Tshân-hn̂g iáu-buē bē sī lí-.ê? bē liáu só͘ tit-tio̍h ê tsîⁿ lí ū kuân thang tshú-lí. Lí ná-ē tsò tsit-khuán tāi-tsì ? Lí m̄-sī khi-phiàn lâng, sī khi-phiàn Siōng-Tsú!" 5 A-ná-nî-a thiaⁿ-tio̍h tsiah-ê uē, tsiū lik lo̍h-khì suah tn̄g-khuì. Thiaⁿ-tio̍h ê lâng lóng tuā tio̍h-kiaⁿ. 6 Ū-kuá siàu-liân-lâng lâi kā i ê sin-si pau khí-lâi, kng tshut-khì bâi-tsòng. 7 Tsha-put-to kuè saⁿ-tiám-tsing kú, i ê bó͘ mā ji̍p-lâi, iáu m̄-tsai só͘ huat-sing ê tāi-tsì. 8 Pí-tik mn̄g i kóng, "Lí kā guá kóng, lín bē tshân-hn̂g só͘ tit-tio̍h ê tsîⁿ kan-taⁿ tsiah-ê sī-bô?" I ìn-kóng, "Tio̍h, sī tsiah-ê niā-niā." 9 Pí-tik tuì i kóng, "Lín ná-ē tâng-sim lâi tshì-thàm Tsú ê Sìng-Sîn? Lí khuàⁿ, bâi-tsòng lín tiōng-hu ê lâng í-king tńg-lâi-kàu mn̂g-kháu, mā beh kā lí kng tshut-khì." 10 Sat-hui-lat suî-sî lik lo̍h-khì tī Pí-tik ê kha-tsîng tsiū tn̄g khuì. Hiah-ê siàu-liân-lâng ji̍p-lâi, khuàⁿ-tio̍h i í-king sí, tsiū kā i kng tshut-khì, bâi-tsòng tī in tiōng-hu ê sin-piⁿ. 11 Tsuân kàu-huē kah thiaⁿ-tio̍h tsiah-ê tāi-tsì ê lâng lóng tuā tio̍h-kiaⁿ.

Sîn-jiah Kî-sū
12 Sù-tô͘ tī bîn-kan ū kiâⁿ tsin-tsē sîn-jiah kah kî-sū, sìn-tô͘ lóng tâng-sim ha̍p-ì tī Só͘-lô-bûn ê tsáu-lông tsū-huē. 13 Tsìng-lâng lóng tsin tsun-tiōng tsiah-ê sù-tô͘, m̄-koh bô-lâng káⁿ kah in tsiap-kīn. 14 Sìn Tsú ê lâng ná lâi ná ke-thiⁿ, lâm-ê lí-ê lóng tsin-tsē. 15 Sīm-tsì ū-lâng kā pēⁿ-lâng khǹg tī tshn̂g-pho͘, kng lâi hē tī ke-lō͘ piⁿ, ǹg-bāng Pí-tik king-kuè ê sî, ū kuí-ê-á lâng thang hō͘ i ê iáⁿ ìm-tio̍h. 16 Koh ū tsin-tsē lâng tuì Iâ-lō͘-sat-líng sì-uî ê siâⁿ tshuā pēⁿ-lâng kah hō͘ siâ-sîn khó͘-tshó͘ ê lâng lâi Pí-tik hia.In lóng ū tit-tio̍h i-hó.

Sù-tô͘ Siū Pik-hāi
17 Tsè-si-tiúⁿ í-ki̍p kah in kāng-tóng ê lâng, tsiū-sī Sat-thó͘-kai-tóng, lóng hui-siông uàn-tò͘ tsiah-ê sù-tô͘, 18 In tsiū hē-tshiú lia̍h sù-tô͘, kā in kuaiⁿ lo̍h-kaⁿ. 19 M̄-koh hit àm Tsú ê thiⁿ-sài phah-khui kaⁿ-mn̂g, kā in tshuā tshut-lâi, tuì in kóng, 20 "Lín tio̍h khì khiā tī sìng-tiān, tsiong tsit-ê sù Ua̍h-miā ê sìn-sit lóng tuì jîn-bîn suan-kóng." 21 Sù-tô͘ thiaⁿ thiⁿ-sài ê uē, thiⁿ phú-kng tsiū ji̍p-khì sìng-tiān kà-sī lâng. Tsè-si-tiúⁿ kah kâng-tóng ê lâng lâi kàu-uī, tsio-tsi̍p gī-huē kah Í-sik-lia̍t jîn-bîn ê thâu-lâng, tshe lâng khì kaⁿ-ni̍h tuà sù-tô͘ lâi. 22 Kíng-uē kàu-uī, tī kaⁿ-ni̍h tshuē bô sù-tô͘, tsiū tńg-lâi pò-kò, kóng, 23 "Guán khuàⁿ-tio̍h kaⁿ-mn̂g kuaiⁿ kah tsin tiâu, kò͘-siú ê lâng khiā tī mn̂g-kháu. Kaⁿ-mn̂g khui ê sî, lāi-bīn tshuē bô-lâng." 24 Sìng-tiān ê siú-uē-tiúⁿ kah tsè-si-tiúⁿ thiaⁿ-tio̍h tsiah-ê uē, m̄-tsai tsit-ê tāi-tsì ē án-tsuáⁿ ián-piàn tsiū tsin tio̍h-kip. 25 Hit sî, ū tsi̍t-ê lâng lâi pò-kò kóng, "Lín kā in kuaiⁿ tī kaⁿ-ni̍h ê lâng tsit-má khiā tī sìng-tiān teh kà-sī lâng." 26 Hit-ê siú-uē-tiúⁿ kah kíng-uē tsiū khì kā sù-tô͘ tshuā lâi, m̄-káⁿ īng kiông-li̍k, in-uī kiaⁿ jîn-bîn īng tsio̍h-thâu kā in tìm. 27 Tshuā sù-tô͘ ji̍p-lâi tsiū hō͘ in khiā tī gī-huē ê bīn-tsîng. Tsè-si-tiúⁿ mn̄g in, kóng, 28 " Guán bat giâm-giâm kìm-tsí lín m̄-thang hōng tsit-ê miâ kà-sī lâng, lín huán-tńg tsiong lín ê kà-sī thuân-kàu Iâ-lō͘-sat-líng ê ta̍k só͘-tsāi, siūⁿ-beh tsiong lâu tsit-ê lâng ê hueh ê tsik-jīm kui hō͘ guán." 29 Pí-tik kah kî-tha ê sù-tô͘ ìn-kóng, "Guán tio̍h sūn-ho̍k Siōng-Tsú, m̄-sī sūn-ho̍k lâng. 30 Lín kā I tìng tī si̍p-jī-kè-tíng ê Iâ-so͘, lán tsó͘-sian ê Siōng-Tsú í-king hō͘ I koh-ua̍h. 31 Tsit-ê Iâ-so͘, Siōng-Tsú kā I thê-sing tuà ka-kī ê tsiàⁿ-pîng, hō͘ I tsò Kun-ông, tsò Kiù-Tsú, thang hō͘ Í-sik-lia̍t-lâng hué-kái, tsuē tit-tio̍h sià-bián. 32 Guán sī tsiah-ê tāi-tsì ê kiàn-tsìng-jîn. Siōng-Tsú siúⁿ-sù hō͘ sūn-ho̍k I ê lâng ê Sìng-Sîn mā uī-tio̍h tsit-ê tāi-tsì tsò tsìng-jîn." 33 Gī-huē ê lâng thiaⁿ-liáu hui-siông siū-khì, ài beh kā in hāi-sí. 34 M̄-koh in tiong-kan ū tsi̍t-ê Huat-lī-sài-phài ê lâng, miâ-kiò Ka-má-lia̍t, sī tsìng-lâng tsun-kìng ê lu̍t-huat kàu-su. I tī gī-huē tiong khiā khí-lâi, huan-hù hō͘ sù-tô͘ tsiām-sî tshut-khì. 35 Tsiū tuì tāi-tsiòng kóng, "Í-sik-lia̍t-lâng ah, lín beh pān tsiah-ê lâng tio̍h tsin kín-sīn! 36 Í-tsîng ū tsi̍t-ê kiò-tsò Tiu-tāi ê lâng tshut-thâu, ka-kī khua-kháu tsin uí-tāi, tsha-put-to ū sì-pah lâng kin-tuè i. Āu-lâi i hō͘ lâng thâi-sí, kin-tuè ê lâng sì-suàⁿ, i ê kè-bô͘ tsiū-án-ne lóng lo̍k-khong. 37 Āu-lâi tī ting-kì hō͘-kháu ê sî koh ū Ka-lī-lī-síng ê Iû-tāi tshut-thâu, ín-iú jîn-bîn kin-tuè i, i mā hō͘ lâng thâi-sí, kin-tuè ê lâng lóng sì-suàⁿ. 38 Taⁿ guá kā lín kóng, m̄-thang tshap tsiah-ê lâng, tshut-tsāi in khì, in-uī in só͘ kè-bô͘ kah só͘ tsò nā tshut-tī lâng, it-tīng ē sit-pāi. 39 Nā tshut-tī Siōng-Tsú, lín tsiū bē-tàng kā in siau-bia̍t, koh khióng-kiaⁿ lín suah kah Siōng-Tsú tsò tuì-thâu." Gī-huē tsiap-la̍p i ê ì-kiàn. 40 In tiàu sù-tô͘ lâi, kā in piⁿ-phah, bīng-līng in m̄-thang koh hōng Iâ-so͘ ê miâ lâi kóng tō-lí. Jiân-āu pàng in tshut-khì. 41 Sù-tô͘ lī-khui gī-huē, muá-sim huaⁿ-hí, sī in-uī in hō͘ lâng khuàⁿ-tsò ē-kham-tit uī-tio̍h Tsú ê Miâ siū lîng-jio̍k. 42 In tsiū ta̍k-ji̍t tī sìng-tiān, tī jîn-ke, kà-sī lâng, thuân Iâ-so͘ Ki-tok ê hok-im.