《巴克禮普世版聖經(試讀本)》

| | | 轉寄

巴克禮普世版(試讀本) 使徒行傳第七章

Su-thê-huán ê Tap-piān
1 Tsè-si-tiúⁿ tsiū kóng, "Tsiah-ê tāi-tsì kám sī án-ne?" 2 Su-thê-huán kóng, "Kok-uī hū-ló hiaⁿ-tī, tshiáⁿ thiaⁿ, Lán ê tsó͘-sian A-pik-la̍h-hán, iáu-buē suá-khì Hap-lân í-tsîng, iáu tuà tī Bí-só͘-pho-tāi-bí ê sî, îng-kng ê Siōng-Tsú tuì i hián-hiān, 3 kā i kóng, "Lī-khui lí ê kò͘-hiong kah tshin-tso̍k, khì Guá beh kā lí tsí-sī ê só͘-tsāi.( tsù: CSK 12:1) 4 A-pik-la̍h-hán tsiū lī-khui Ka-li̍k-tí-lâng ê tē-hng, khì tuà tī Hap-lân. I ê lāu-pē sí liáu-āu, Siōng-Tsú hō͘ i tuì hia suá kàu lín tsit-má teh tuà ê só͘-tsāi. 5 Tī tsia Siōng-Tsú pīng-bô hō͘ i sán-gia̍p, liân khiā-kha ê só͘-tsāi to bô. Sui-jiân hit sî i iáu-buē ū kiáⁿ, m̄-koh Siōng-Tsú ìng-ín beh sù hō͘ i tsit-ê thó͘-tē thang tsò i kah kiáⁿ-sun ê sán-gia̍p. 6 Siōng-Tsú ū án-ne kā i kóng, 'Lí ê kiáⁿ-sun ē tshut-guā khì tī guā-kok, tsò lâng ê lô͘-lē siū pháiⁿ khuán-thāi sì-pah nî kú.'( tsù: CSK 15:13) 7 Siōng-Tsú koh kóng, 'M̄-koh Guá beh sím-phuàⁿ hit-ê hō͘ in tsò lô͘-lē ê kok-ka. Āu-lâi Guá ē hō͘ in tshut-lâi, tī tsit-ê só͘-tsāi kìng-pài Guá.'( tsù: CSK 15:14) 8 Jiân-āu Siōng-Tsú kah i li̍p-iok, īng kat-lé tsò kì-hō, in-uī án-ne i seⁿ Í-sat liáu-āu tē-peh ji̍t kā i kiâⁿ kat-lé. Āu-lâi Í-sat seⁿ Ngá-kok, Ngá-kok seⁿ lán tsa̍p-jī-ê tso̍k-tiúⁿ. 9 " Tsiah-ê tso̍k-tiúⁿ uàn-tò͘ Iok-sik, kā i bē khì Ai-ki̍p, m̄-koh Siōng-Tsú kah i tông-tsāi. 10 kiù i thuat-lī it-tshè ê khó͘-lān, hō͘ i tī Ai-ki̍p-ông Huat-ló ê bīn-tsîng tit-tio̍h un-tián kah tì-huī, hō͘ Huat-ló kā i siat-li̍p tsò Ai-ki̍p ê tsáiⁿ-siòng kah ông-kiong ê tsóng-kuán. 11 Āu-lâi Ai-ki̍p kah Ka-lâm tsuân-tē huat-sing ki-hng, ín-khí tuā tsai-lān. Lán ê tsó͘-sian bô bí-niû thang tsia̍h. 12 Ngá-kok thiaⁿ-kóng Ai-ki̍p ū niû-si̍t, tsiū tshe lán ê tsó͘-sian khì hia. Tse sī thâu-tsi̍t pái. 13 Tē-jī pái koh khì ê sî, Iok-sik hō͘ hiaⁿ-tī jīn-tshut i ê sin-hūn, in-uī án-ne, Huat-ló bat Iok-sik ê ka-tso̍k. 14 Iok-sik tshe lâng khì tshiáⁿ i ê lāu-pē Ngá-kok kah tsuân ka-tso̍k, tsóng-kiōng tshit-tsa̍p-gō͘ lâng khì Ai-ki̍p. 15 Ngá-kok tsiū lo̍h-khì Ai-ki̍p, āu-lâi i kah lán ê tsó͘-sian lóng sí tī hia. 16 In ê si-thé āu-lâi ūn tńg-lâi Sī-kiàm, bâi-tsòng tī A-pik-la̍h-hán īng tsîⁿ tuì Hap-bua̍t ê kiáⁿ-sun bé-lâi ê hit-tè bōng-tē. 17 Siōng-Tsú tuì A-pik-la̍h-hán ìng-ín ê hit-ê kî ná kīn, Í-sik-lia̍t-lâng tī Ai-ki̍p siⁿ-thuàⁿ hing-ōng. 18 Āu-lâi līng-guā tsi̍t-ê m̄-bat Iok-sik ê ông khí-lâi thóng-tī Ai-ki̍p.( tsù: CAK 1:8) 19 I īng kuí-kè lâi tuì-hù lán ê bîn-tso̍k, gi̍k-thāi lán ê tsó͘-sian, bīng-līng in tio̍h kā in ê eⁿ-á tàn tuà guā-bīn, hō͘ in sí. 20 Hit sî, Mô͘-se tú tshut-sì, hui-siông tshing-siù ê eⁿ-á, tī lāu-pē ê tshù ióng-tshī saⁿ kò-gue̍h kú. 21 I siū khì-sak ê sî, Huat-ló ê tsa-bó͘-kiáⁿ kā i khioh-khì tòng-tsò ka-kī ê kiáⁿ ióng-tshī. 22 Mô͘-se ha̍k-si̍p Ai-ki̍p-lâng só͘-ū ê ha̍k-būn, kóng-uē tsò tāi-tsì lóng ū tsâi-lîng. 23 " Mô͘-se sì-tsa̍p huè ê sî, siūⁿ-beh khì khuàⁿ ka-kī ê hiaⁿ-tī, Í-sik-lia̍t ê tông-pau. 24 I khuàⁿ-tio̍h tsi̍t-ê hiaⁿ-tī hō͘ Ai-ki̍p-lâng khi-hū, tsiū kā i pó-hō͘, phah-sí hit-ê Ai-ki̍p-lâng, thè siū uí-khut ê lâng pò-siû. 25 I siūⁿ-kóng ka-kī ê hiaⁿ-tī ē liáu-kái sī Siōng-Tsú īng i ê tshiú lâi kiù in, m̄-koh in bô liáu-kái. 26 Keh-tńg-ji̍t, i khuàⁿ-tio̍h nn̄g-ê Í-sik-lia̍t-lâng teh sio-phah, siūⁿ-beh kā in tiâu-kái, kóng, "Lín sī hiaⁿ-tī, ná-ē teh hō͘-siōng khi-hū?" 27 Hit-ê teh khi-hū ê lâng kā Mô͘-se sak-khui, kóng, "Siáⁿ-lâng siat-li̍p lí tsò guán ê thâu-lâng, tsò guán ê phuàⁿ-kuaⁿ? 28 Lí ài-beh tshin-tshiūⁿ tsa-hng thâi-sí hit-ê Ai-ki̍p-lâng lâi kā guá thâi-sí sī-bô?"( tsù: CAK 2:14) 29 Mô͘-se tsi̍t-ē thiaⁿ-tio̍h tsit-kù uē tsiū tô-tsáu, khì tuà Bí-tiân-lâng ê tē-hng, tī hia seⁿ nn̄g-ê kiáⁿ. 30 "Sì-tsa̍p nî āu, tī Se-nái-suaⁿ ê khòng-iá, ū thiⁿ-sài tī tshì-phè ê hué-iām tiong, tuì Mô͘-se hián-hiān. 31 Mô͘-se khuàⁿ-tio̍h tsit-ê kíng-siōng, kám-kak tsin hi-kî, kiâⁿ uá-khì siūⁿ-beh khuàⁿ khah siông-sè ê sî, tsiū thiaⁿ-tio̍h Tsú ê siaⁿ, kóng, 32 'Guá sī lín tsó͘-sian ê Siōng-Tsú, tsiū-sī A-pik-la̍h-hán, Í-sat, Ngá-kok ê Siōng-Tsú.( tsù: CAK 3:6) Mô͘-se kiaⁿ kah phi̍h-phi̍h-tshuah, m̄-káⁿ khuàⁿ. 33 Tsú kā i kóng, "Lí ê ê tio̍h thǹg khí-lâi, in-uī lí khiā ê só͘-tsāi sī sìng-tē. 34 Guá khak-si̍t ū khuàⁿ-tio̍h Guá ê tsú-bîn tī Ai-ki̍p teh siū-khó͘, mā ū thiaⁿ-tio̍h in teh kiò-khó͘ ê siaⁿ. Guá kàng-lîm lâi beh kā in tsín-kiù, taⁿ lí lâi, Guá beh tshe lí khì Ai-ki̍p.'( tsù: CAK 3:5, 7) 35 Tsit-ê Mô͘-se tsiū-sī Í-sik-lia̍t-lâng bat kā i kī-tsua̍t, mn̄g i kóng, 'Siáⁿ-lâng siat-li̍p lí tsò guán ê thâu-lâng, tsò guán ê phuàⁿ-kuaⁿ?' Siōng-Tsú khiok thong-kuè tī tshì-phè tiong tuì i hián-hiān ê thiⁿ-sài tshe-phài i tsò líng-siù, tsò tsín-kiù-tsiá. 36 Mô͘-se tshuā in tshut Ai-ki̍p, tī Ai-ki̍p, Âng-hái kah khòng-iá sì-tsa̍p nî kú, kiâⁿ tsin-tsē kî-sū sîn-jiah. 37 Tsit-ê Mô͘-se bat tuì Í-sik-lia̍t ê kiáⁿ-sun kóng, 'Siōng-Tsú beh tuì lín hiaⁿ-tī tiong-kan uī lín hing-khí tsi̍t-ê tshin-tshiūⁿ guá tsit-khuán ê sian-ti.'( tsù: SBK 18:15) 38 Mô͘-se mā bat kah tī Se-nái-suaⁿ tuì i kóng-uē ê thiⁿ-sài í-ki̍p lán ê tsó͘-sian tī khòng-iá tsò-hué kìⁿ-bīn. I mā ū tit-tio̍h ua̍h ê sìn-sit lâi thuân hō͘ lán. 39 Lán ê tsó͘-sian m̄-khíng thiaⁿ i ê uē, tian-tò kā i kī-tsua̍t, siūⁿ-beh tò-tńg-khì Ai-ki̍p. 40 In kā A-lûn kóng, "Lí tio̍h kā guán tsō sîn-bîng lâi tsò-thâu tshuā guán, in-uī tsit-ê tshuā guán tshut Ai-ki̍p ê Mô͘-se m̄-tsai tú-tio̍h sím-mi̍h tāi-tsì.'( tsù: CAK 32:1) 41 Hit sî, in tsiū tsō gû-á-kiáⁿ ê siōng, koh tuì hit-ê ngó͘-siōng hiàn-tsè, huaⁿ-hí in ka-kī ê tshiú só͘ tsò ê ngó͘-siōng. 42 M̄-koh Siōng-Tsú ua̍t-lìn-tńg, tshut-tsāi in khì ho̍k-sāi thian-siōng. Tú tshin-tshiūⁿ sian-ti ê tsheh só͘ kì-tsài, kóng, 'Í-sik-lia̍t ê tsú-bîn ah, lín tī khòng-iá sì-tsa̍p nî kú, kám bat hiàn sing-lé á-sī tsè-mi̍h hiàn hō͘ Guá? 43 Lín kng Mô͘-lo̍k ê pò͘-pêⁿ, Kah Lí-huan-sîn ê tsheⁿ, Tsiū-sī lín tsō lâi pài ê ngó͘-siōng; Guá beh kā lín tshian-suá khì Pa-pí-lûn hit-pîng!'( tsù: AMS 5:25-27) 44 "Lán tsó͘-sian tī khòng-iá ū kiàn-tsìng ê huē-bō͘, tsiū-sī Siōng-Tsú tuì Mô͘-se ê tsí-sī, tsiàu i só͘ khuàⁿ-tio̍h ê khuán-sit lâi khí-tsō-.ê. 45 Āu-lâi lán ê tsó͘-sian kì-jiân sîng-tsiap tsit-ê huē-bō͘, Siōng-Tsú tuì in ê bīn-tsîng kā guā-tso̍k kuáⁿ-tsáu, in tsiàm-niá hit-ê thó͘-tē liáu-āu, tsiū kah Iok-su-a tsiong huē-bō͘ suá khì hia, it-ti̍t kàu Tāi-pi̍t ê sî-tāi. 46 Tāi-pi̍t ū tit-tio̍h Siōng-Tsú ê un-tián, kiû Siōng-Tsú ín-tsún in kā Ngá-kok ê Siōng-Tsú tshuē tsi̍t-ê tuà ê só͘-tsāi. 47 M̄-koh āu-lâi uī Siōng-Tsú khí sìng-tiān ê sī Só͘-lô-bûn. 48 "Kî-si̍t Tsì-kuân Siōng-Tsú pīng bô tuà tī lâng ê tshiú só͘ khí ê tshù, tshin-tshiūⁿ sian-ti só͘ kóng, 49 'Tsú kóng, Thiⁿ sī Guá ê pó-tsō, Tē sī Guá ê kha-tah87. Lín beh kā Guá khí sím-mi̍h khuán ê tshù? Guá an-hioh ê só͘-tsāi tī tó-uī? 50 Tse it-tshè kám m̄-sī Guá tshin-tshiú tshòng-tsō-.ê?"( tsù: ISA 66:1-2) 51 "Lín ná-ē tsiah-ni̍h kò͘-tsi̍p, lín ê sim ngē, hīⁿ-khang m̄-thiaⁿ uē, kah lín ê tsó͘-sian kāng-khuán, siông-siông puē-gi̍k Sìng-Sîn! 52 Tó tsi̍t-ê sian-ti bô siū-tio̍h lín tsó͘-sian ê pik-hāi? Ī-giân hit-ê kong-gī ê Lô͘-po̍k teh-beh lâi-lîm ê lâng, lóng hō͘ lín hāi-sí. Taⁿ lín tsiâⁿ-tsò tshut-bē koh thâi-sí tsit-ê lô͘-po̍k ê lâng. 53 Lín sī tuì thiⁿ-sài niá-siū Siōng-Tsú ê lu̍t-huat, kìng-jiân bô teh tsun-siú!"

Su-thê-huán Hông Tìm-sí
54 In thiaⁿ-tio̍h Su-thê-huán tsiah-ê uē, sim-lāi hui-siông siū-khì, tuì i kā-gê tshiat-khí. 55 M̄-koh Su-thê-huán hō͘ Sìng-Sîn tshiong-muá, gia̍h thâu khuàⁿ thiⁿ, khuàⁿ-tio̍h Siōng-Tsú ê îng-kng, mā khuàⁿ-tio̍h Iâ-so͘ khiā tī Siōng-Tsú ê tsiàⁿ-pîng. 56 I kóng, "Khuàⁿ ah! guá khuàⁿ-tio̍h thiⁿ khui, Jîn-tsú khiā tī Siōng-Tsú ê tsiàⁿ-pîng!" 57 Tsìng-lâng hīⁿ-khang am teh, tuā-siaⁿ huah, tsò tsi̍t-ê tshi̍h uá-khì, 58 kā Su-thê-huán kuáⁿ tshut-khì siâⁿ-guā, īng tsio̍h-thâu kā i tìm. Tsò kiàn-tsìng ê lâng tsiong in ê guā-saⁿ kau hō͘ tsi̍t-ê miâ-kiò Sò-lô ê siàu-liân-lâng khì kò͘. 59 In īng tsio̍h-thâu tìm Su-thê-huán ê sî, Su-thê-huán kiû, kóng, "Tsú Iâ-so͘ ah, kiû Lí tsiap-la̍p guá ê lîng-hûn! " 60 I kuī-lo̍h-khì, tuā-siaⁿ kiò, kóng, "Tsú ah, m̄-thang īng tsit-ê tsuē kui hō͘ in!" I kóng suah tsiū sí-khì. Sò-lô mā tsàn-tông bô͘-sat Su-thê-huán.