《巴克禮普世版聖經(試讀本)》

| | | 轉寄

巴克禮普世版(試讀本) 使徒行傳第十一章

Pí-tik Tuì Iâ-lō͘-sat-líng ê Kàu-huē Pò-kò Sù-tô͘ kah tuà tī Iû-thài ê sìn-tô͘ lóng ū thiaⁿ-tio̍h Guā-pang-lâng mā tsiap-siū Siōng-Tsú ê tō-lí. 2 Kàu Pí-tik tsiūⁿ Iâ-lō͘-sat-líng ê sî, hiah-ê siū kat-lé ê Iû-thài-lâng kā i phue-phîng, kóng, 3 "Lí bat ji̍p-khì bô siū kat-lé ê lâng ê tshù, kah in tsò-hué tsia̍h-pn̄g." 4 Pí-tik tsiong só͘ huat-sing ê tāi-tsì tsi̍t-hāng tsi̍t-hāng tuì in suat-bîng kóng, 5 "Guá tī Iok-phàⁿ siâⁿ kî-tó kah sit-sîn ê sî, khuàⁿ-tio̍h īⁿ-siōng, ū tsi̍t-ê tshin-tshiūⁿ sì-kak-thâu pa̍k teh ê tuā-pak pò͘ tuī lo̍h-lâi, lak tī guá ê kha-tsîng. 6 Guá siông-sè khuàⁿ, khuàⁿ-tio̍h lāi-bīn ū tē-tsiūⁿ ê tsing-seⁿ, iá-siù, thâng-thuā, kah khong-tiong ê pue-tsiáu. 7 Koh thiaⁿ-tio̍h ū siaⁿ kā guá kóng, "Pí-tik, khí-lâi, thâi lâi tsia̍h." 8 Guá kóng, "Tsú ah, tshian-bān m̄-thang; in-uī guá m̄-bat tsia̍h tsho͘-sio̍k bô tshing-khì ê mi̍h." 9 M̄-koh siaⁿ tē-jī pái tuì thiⁿ ìn kóng, "Siōng-Tsú só͘ hō͘ i tshing-khì ê, lí m̄-thang lia̍h tsò tsho͘-sio̍k." 10 Tsit-ê tāi-tsì liân-suà saⁿ pái liáu-āu, hiah-ê mi̍h tsiū koh siu tò-tńg-khì thiⁿ-tíng. 11 Tú hit sî, tuì Kai-sat-lī-a tshe-phài lâi tshuē guá hit saⁿ-ê lâng lâi-kàu guán tuà ê hit-king tshù. 12 Sìng-Sîn kā guá kóng tio̍h kah in khì, tuì lâng m̄-thang tsha-pia̍t khàn-thāi, koh ū la̍k-ê sìn-tô͘ kah guá khì. Guán lóng ji̍p-khì Ko-nî-liû ê tshù. 13 Ko-nî-liû kā guán kóng i ū khuàⁿ-tio̍h tsi̍t-ê thiⁿ-sài khiā tī i ê tshù, tuì i kóng, 'Tio̍h tshe lâng khì Iok-phàⁿ, tshiáⁿ hit-ê kiò-tsò Pí-tik ê Se-bûn lâi. 14 I ū uē beh kā lí kóng, thang hō͘ lí kah lí tsuân-ke lóng tit-tio̍h kiù.' 15 Guá tú teh kóng ê sî, Sìng-Sîn kàng-lîm tī in, tshin-tshiūⁿ tong-tsho͘ kàn-lîm tī lán sin-tsiūⁿ kāng-khuán. 16 Guá tsiū siūⁿ-khí Tsú só͘ kóng ê uē:'Iok-hān īng tsuí kā lín sé-lé, m̄-koh lín ē niá-siū Sìng-Sîn ê sé-lé.' 17 Kì-jiân Siōng-Tsú ū tsiong lán sìn Tsú só͘ niá-siū kāng-khuán ê un-sù sù hō͘ in, guá sī siáⁿ-lâng, ná ē-tàng tsó͘-tòng Siōng-Tsú ê tsok-uî?" 18 Hiah-ê lâng thiaⁿ tsiah-ê uē, tsiū tiām lo̍h-khì, kui îng-kng Siōng-Tsú, kóng, "Án-ne kóng khí-lâi, Siōng-Tsú mā ū hō͘ Guā-pang-lâng hué-kái lâi tit-tio̍h ua̍h-miā."

An-thê-o ê Kàu-huē
19 Uī-tio̍h Su-thê-huán ê tāi-tsì siū pik-hāi sì-suàⁿ ê sìn-tô͘, ū-ê khì kàu Hui-nî-ki, Ku-pí-lō͘(hiān-kim ê Sài-phó͘-lō͘-su), An-thê-o. In bô tuì pa̍t-lâng kóng tō-lí, tsí ū tuì Iû-thài-lâng kóng niā-niā. 20 M̄-koh kî-tiong ū-kuá Ku-pí-lō͘ kah Kó͘-lī-nāi ê sìn-tô͘ lâi-kàu An-thê-o, mā tuì Hi-lia̍p-lâng thuân Tsú Iâ-so͘ ê hok-im. 21 Tsú kah in tông-tsāi ke-thiⁿ in ê khuì-la̍t, tsin-tsē lâng lâi sìn kui Tsú. 22 Tsit-ê siau-sit thuân kàu Iâ-lō͘-sat-líng ê kàu-huē, in tsiū tshe-phài Pa-ná-pa khì An-thê-o. 23 Pa-ná-pa tsi̍t-ē kàu-uī, khuàⁿ-tio̍h Siōng-Tsú ê un-tián tsiū huaⁿ-hí, i kó͘-lē tāi-ke tio̍h tsuân-sim sìn-khò Tsú. 24 In-uī Pa-ná-pa sī hó lâng, koh ū Sìng-Sîn tshiong-muá, ke-thiⁿ tsin-tsē lâng lâi sìn Tsú. 25 Āu-lâi Pa-ná-pa khì Tāi-sò͘ tshuē Sò-lô. 26 Tshuē-tio̍h liáu-āu, Sò-lô tshuā i kàu An-thê-o. Tsiok-tsiok tsi̍t nî kú, in kah kàu-huē ê huē-iú tsū-huē, kà-sī tsin-tsē lâng. bûn-tô͘ kiò-tsò "Ki-tok-tô͘" sī tuì An-thê-o khai-sí. 27 Hit sî, ū kuí-nā-ê sian-ti tuì Iâ-lō͘-sat-líng lo̍h-khì An-thê-o. 28 Kî-tiong tsi̍t-ê miâ-kiò A-ka-pò͘ ê lâng khiā khí-lâi, khò Sìng-Sîn lâi ī-giân kóng: phó͘ thiⁿ-ē teh-beh ū tuā ki-hng. Tng Kik-ló-tiu thóng-tī ê nî-kan, kó-jiân huat-sing tsit-ê tāi-tsì. 29 Bûn-tô͘ tsiū kuat-tīng, ta̍k-lâng tsiàu ka-kī ê li̍k-liōng hōng-hiàn, thang lâi tsín-tsè tuà tī Iû-thài ê sìn-tô͘. 30 In tsiū tsiàu án-ne tsò, tuì Pa-ná-pa kah Sò-lô king-tshiú, kià khì hō͘ hia ê tiúⁿ-ló.