《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十二章

作者 巴克禮普世版小組 2014.07.27

1 Pó-lô kóng, "Kok-uī hū-ló hiaⁿ-tī ah, tshiáⁿ thiaⁿ guá tsit-tsūn beh uī ka-kī piān-kái ê uē." 2 In thiaⁿ-tio̍h Pó-lô īng Hi-pik-lâi-uē tuì in kóng, tsiū koh-khah an-tsīng lo̍h-lâi. Pó-lô kóng, 3 "Guá tsiū-sī Iû-thài-lâng, tshut-sì tī Ki-lī-ka ê Tāi-sò͘, tī tsit-ê siâⁿ tsò Ka-má-lia̍t ê bûn-tô͘ tióng-tuā, kah kin-á-ji̍t tī tsia ê kok-uī kāng-khuán, ū siū lán tsó͘-sian giâm-keh lu̍t-huat ê kà-sī, jia̍t-sim ho̍k-sāi Siōng-Tsú. 4 Guá bat pik-hāi tsun-siú tsit-ê tō-lí ê lâng hō͘ i sí, bô-lūn lâm-lí lóng lia̍h khí-lâi, kā in kuaiⁿ lo̍h-kaⁿ. 5 Tsè-si-tiúⁿ kah tsuân tiúⁿ-ló ê gī-huē ê lâng lóng ē-tàng uī guá tsò-tsìng. Guá mā tuì in the̍h-tio̍h kià hō͘ Tāi-má-sik sìn-tô͘ ê phue. Guá ū khì hia beh lia̍h tī hia ê sìn-tô͘, kā in tuà lâi Iâ-lō͘-sat-líng siū hîng-hua̍t."

Pó-lô Kui-Tsú ê King-kuè (St 9:1-19;26:12-18)
6 Guá kiâⁿ beh kàu Tāi-má-sik ê sî, hit sî tsha-put-to sī tiong-tàu, hut-jiân ū tsin-kiông ê kng tuì thiⁿ tsiò-siā tī guá sì-tsiu-uî. 7 Guá pua̍h lo̍h-khì thô͘-kha, thiaⁿ-tio̍h ū siaⁿ tuì guá kóng, 'Sò-lô, Sò-lô, lí ná-ē pik-hāi guá?' 8 Guá ìn kóng, 'Tsú ah, Lí sī siáⁿ-lâng?' I ìn guá kóng, 'Guá tsiū-sī lí teh pik-hāi ê Ná-sat-li̍k-lâng Iâ-so͘.' 9 Kah guá tsò-hué ê lâng ū khuàⁿ-tio̍h hit-ê kng, bô thiaⁿ-tio̍h tuì guá kóng-uē Hit-uī ê siaⁿ. 10 Guá koh mn̄g kóng, 'Tsú ah, guá tio̍h án-tsuáⁿ tsò?' Tsú kā guá kóng, 'Khí-lâi, ji̍p-khì Tāi-má-sik. Tī hia ū-lâng ē kā lí kóng guá beh tsí-phài lí khì tsò ê tāi-tsì.' 11 In-uī hit-ê kng tsin kiông, guá suah piàn tsheⁿ-mê, guá ê tâng-phuāⁿ kā guá khan ji̍p-khì Tāi-má-sik." 12 Tī hia ū tsi̍t-ê miâ-kiò A-ná-nî-a ê lâng, sī tsi̍t-ê tsun-siú Mô͘-se lu̍t-huat koh kìng-khiân ê lâng, tsin siū tuà tī hia ê Iû-thài-lâng tsun-kìng. 13 I lâi tshuē guá, khiā tī guá ê sin-piⁿ, kā guá kóng, 'Sò-lô hiaⁿ-tī, hō͘ lí koh ē khuàⁿ-kìⁿ.' Guá suî-sî gia̍h thâu tsiū ū khuàⁿ-kìⁿ i. 14 I kóng, "Lán tsó͘-sian ê Siōng-Tsú í-king kíng-suán lí lâi tsai I ê tsí-ì, hō͘ lí khuàⁿ-kìⁿ Hit-uī kong-gī ê lô͘-po̍k, koh thiaⁿ I ê tshuì só͘ kóng ê uē, 15 In-uī lí ē tsiong lí só͘ khuàⁿ-tio̍h kah só͘ thiaⁿ-tio̍h-.ê, tuì bān-bîn tsò kiàn-tsìng. 16 Taⁿ kuáⁿ-kín khí-lâi niá-siū sé-lé, kiû-kiò I ê miâ, lâi sé-tshing lí ê tsuē.'"

Pó-lô Khì Tuì Guā-pang-lâng Thuân-tō
17 Āu-lâi guá tńg-lâi Iâ-lō͘-sat-líng, tī sìng-tiān kî-tó ê sî khuàⁿ-kìⁿ īⁿ-siōng. 18 Guá khuàⁿ-tio̍h Tsú tuì guá kóng, "Lí tio̍h kuáⁿ-kín lī-khui Iâ-lō͘-sat-líng, in-uī tsit só͘-tsāi ê lâng bô beh tsiap-la̍p lí uī-tio̍h Guá só͘ tsò ê kiàn-tsìng.' 19 Guá ìn kóng, 'Tsú ah, in lóng tsai guá í-tsîng tī ta̍k-ê huē-tn̂g, tsiong sìn Lí ê lâng kuaiⁿ lo̍h-kaⁿ koh kā in phah. 20 Lí ê kiàn-tsìng-jîn Su-thê-huán hō͘ lâng sat-hāi ê sî, guá mā khiā tī piⁿ-á kā in tsàn-tông, koh uī hāi-sí i ê lâng kò͘ guā-saⁿ.' 21 Tsú tuì guá kóng, 'Lí khì, guá beh tshe lí khì hn̄g-hn̄g ê Guā-pang-lâng hia.'" 22 Tsìng-lâng tsi̍t-ē thiaⁿ-tio̍h Pó-lô kóng tsit-kù uē, tsiū tuā-siaⁿ kóng, "Tsit khuán lâng tio̍h tuì tē-tsiūⁿ siau-bia̍t, m̄-thang hō͘ i ua̍h lo̍h-khì." 23 Kûn-tsiòng tuā-siaⁿ jióng, thǹg guā-saⁿ, ǹg khong-tiong puāⁿ thô͘-hún ê sî, 24 kun-kuaⁿ tsiū bīng-līng kā Pó-lô tuà ji̍p-khì iâⁿ-pâng, īng piⁿ kā i phah lâi sím-mn̄g, ài beh tsai-iáⁿ uī-sím-mi̍h Iû-thài-lâng án-ne kā i jióng. 25 In tú beh īng phuê-tuà kā i pa̍k ê sî, Pó-lô tuì piⁿ-á teh khiā ê kun-kuaⁿ kóng, "Tuì tsi̍t-ê iáu-buē siū phuàⁿ-tsuē ê Lô-má-lâng, lín īng piⁿ kā i phah, kám thang?" 26 Hit-ê kun-kuaⁿ tsi̍t-ē thiaⁿ-tio̍h tsiū khì kìⁿ iâⁿ-tiúⁿ kóng, "Taⁿ beh án-tsuáⁿ tsiah hó? Tsit-ê lâng sī Lô-má kong-bîn!" 27 Iâⁿ-tiúⁿ lâi kìⁿ Pó-lô, mn̄g i kóng, "Kā guá kóng, lí kám sī Lô-má kong-bîn?" Pó-lô kóng, "Sī." 28 Iâⁿ-tiúⁿ ìn kóng, "Guá īng tsin-tsē gîn tsiah bé-tio̍h tsit-ê kong-bîn-kuân." Pó-lô kóng, "Guá tshut-sì tsiū-sī Lô-má kong-bîn." 29 Hiah-ê beh sím-mn̄g Pó-lô ê lâng tsiū suî-sî lī-khui. Iâⁿ-tiúⁿ tsi̍t-ē tsai-iáⁿ Pó-lô sī Lô-má kong-bîn, koh in-uī kā i pa̍k teh, tsiū tsin kiaⁿ.

Pó-lô Tī Gī-huē Hông Sím-mn̄g
30 Keh-tńg-ji̍t, iâⁿ-tiúⁿ ài beh tsai Pó-lô hō͘ Iû-thài-lâng kò ê si̍t-tsîng, tsiū kā i tháu khui, bīng-līng tsiah-ê tsè-si-tiúⁿ kah tsuân gī-huē tsū-tsi̍p, tshuā Pó-lô lo̍h-lâi, hō͘ i khiā tī in ê bīn-tsîng.