《巴克禮普世版聖經(試讀本)》

| | | 轉寄

巴克禮普世版(試讀本) 羅馬書第四章

Īng A-pik-la̍h-hán Tsò Bô͘-huān
1 Án-ne kah lán ū hiat-thóng kuan-hē ê tsó͘-sian A-pik-la̍h-hán, i ū tit-tio̍h sím-mi̍h? Lán beh án-tsuáⁿ kóng? 2 A-pik-la̍h-hán nā tuì hîng-uî lâi hō͘ Siōng-Tsú khuàⁿ-tsò gī-lâng, i tsiū ū lí-iû thang khua-kháu. M-koh tī Siōng-Tsú bīn-tsîng, i bô sím-mih thang khua-kháu. 3 In-uī Sìng-king ū án-ne kóng:“ A-pik-la̍h-hán sìn Siōng-Tsú, só͘-í Siōng-Tsú tsiū kā i khuàⁿ-tsò gī-lâng."( tsù: CSK 15:6) 4 Kang-lâng tit-tio̍h kang-tsîⁿ bô sǹg-tsò sī un-tián, he sī i ing-kai tit-.ê. 5 M̄-koh bô khò hîng-uî, kan-taⁿ sìn Hit-uī ē kā tsuē-jîn suan-phuàⁿ bô tsuē ê Siōng-Tsú, in-uī ū tsit-ê sìn, Siōng-Tsú tsiū kā i kiò-tsò gī-lâng. 6 Tāi-pi̍t mā ū kóng-khí tsi̍t-ê bô tsò sím-mi̍h tsiū hō͘ Siōng-Tsú khuàⁿ-tsò gī-lâng hit-ê lâng ū hok-khì. I án-ne kóng, 7 “Kuè-sit tit-tio̍h sià-bián, tsuē-kuà tit-tio̍h siau-tû ê lâng, si̍t-tsāi ū hok-khì! 8 Tsú bô kā i tīng-tsuē ê lâng si̍t-tsāi ū hok-khì!”(SPh 32:1-2) 9 Taⁿ, tsit-ê hok-khì sī tsí-ū beh hō͘ ū siū kat-lé ê lâng sī-bô? Á-sī mā beh hō͘ bô siū kat-lé ê lâng? Lán ū kóng,“A-pik-la̍h-hán in-uī ū sìn Siōng-Tsú, Siōng-Tsú tsiū kā i khuàⁿ-tsò gī-lâng.” 10 A-pik-la̍h-hán sī sím-mi̍h sî-tsūn hō͘ Siōng-Tsú khuàⁿ-tsò gī-lâng? Sī siū kat-lé í-tsîng á-sī í-āu? Sī siū kat-lé í-tsîng, m̄-sī í-āu. 11 Āu-lâi i ū siū kat-lé, tsit-ê kat-lé sī tsi̍t-tsióng kì-hō, tsìng-si̍t i iáu-buē siū kat-lé í-tsîng tsiū in-uī ū sìn Siōng-Tsú, hō͘ Siōng-Tsú kā i jīn-tīng tsò gī-lâng. só͘-í, tuì hiah-ê bô siū kat-lé, in-uī ū sìn suah hō͘ Siōng-Tsú jīn-tīng tsò gī-lâng ê lâng lâi kóng, A-pik-la̍h-hán tsiâⁿ-tsò hiah-ê bô siū kat-lé ê sìn-tô͘ ê tsó͘-sian. 12 I mā-sī siū kat-lé ê lâng ê tsó͘-sian, in m̄-nā ū siū kat-lé, mā-ū tsun-tsiàu lán ê tsó͘-sian A-pik-la̍h-hán iáu-buē siū kat-lé í-tsîng to̍h ū ê sìn-sim, tsò bô͘-huān teh sing-ua̍h.

Niá-siū Siōng-Tsú ê Ìng-ún
13 Siōng-Tsú ìng-ín A-pik-la̍h-hán, beh hō͘ i kah i ê kiáⁿ-sun sîng-tsiap tsit-ê sè-kài. Tsit-ê ìng-ín, m̄-sī thong-kuè lu̍t-huat, sī thong-kuè sìn lâi tit-tio̍h Siōng-Tsú tshing i tsò gī-lâng. 14 Nā tsun-hîng lu̍t-huat ê lâng tsiah ē-tàng sîng-tsiap Siōng-Tsú ê ìng-ín, hit-khuán ê sìn-gióng sī ū-ná-bô, hit-ê ìng-ín mā bô lō͘-īng. 15 Lu̍t-huat ē ín-khí Siōng-Tsú ê siū-khì. Nā bô lu̍t-huat tsiū bô uî-huān lu̍t-huat ê tāi-tsì. 16 Só͘-í ìng-ín sī īng sìn tsò kin-kì. Tse-sī beh pó-tsìng ìng-ín sī tshut-tī Siōng-Tsú pe̍h-pe̍h ê un-tián, beh hō͘ A-pik-la̍h-hán só͘-ū ê kiáⁿ-sun, m̄-nā sī ū siū kat-lé ê, mā beh hō͘ hiah-ê kah A-pik-la̍h-hán kāng-khuán ū sìn-khò Siōng-Tsú ê lâng. I sī lán tsìng-lâng ê tsó͘-sian. 17 Tsiàu Sìng-king só͘ kì-tsài:“uá siat-li̍p lí tsò bān-bîn ê tsó͘-sian.( tsù: CSK 17:5) A-pik-la̍h-hán siong-sìn ē hō͘ sí-lâng koh-ua̍h, ē tuì bô tshòng-tsō ū ê Siōng-Tsú, tsiū tuì I niá-siū ìng-ín. 18 I tī bô ǹg-bāng ê sî, iáu-koh phō-tio̍h ǹg-bāng, siong-sìn i ē tsiâⁿ-tsò bān-bîn ê tsó͘-sian, tsiàu só͘ ìng-ín ê uē kóng, “Lí ē ū tsin-tsē kiáⁿ-sun.” ( tsù: CSK 15:5) 19 Hit-sî i í-king tsiâⁿ-pah huè. I tsai-iáⁿ ka-kī ê sing-khu sue-jio̍k kah teh-beh sí-khì, Sat-la̍h mā í-king bē seⁿ-kiáⁿ, m̄-koh A-pik-la̍h-hán bô in-uī án-ne sit-khì sìn-sim. 20 I tuì Siōng-Tsú ê ìng-ín bô giâu-gî, sìn-sim huán-tńg ná kian-tīng, tsiong îng-kng kui-hō͘ Siōng-Tsú 21 I khak-sìn Siōng-Tsú it-tīng ē si̍t-hiān I ka-kī ê ìng-ín. 22 In-uī ū tsit-khuán ê sìn-sim, Siōng-Tsú tsiah kā i khuàⁿ-tsò gī-lâng. 23 M̄-koh "Kā i khuàⁿ-tsò gī-lâng”( tsù: CSK 15:6) tsit-kù uē, m̄-sī kan-taⁿ uī-tio̍h A-pik-la̍h-hán lâi siá. 24 Mā sī uī-tio̍h lán tsiah-ê lâng siá ê, in-uī lán ū siong-sìn Siōng-Tsú hō͘ lán ê Tsú Iâ-so͘ tuì sí-lâng tiong koh-ua̍h, mā mā ē hō͘ Siōng-Tsú khuàⁿ-tsò gī-lâng. 25 Uī-tio̍h lán ê tsuē-kuà, Siōng-Tsú tsiong Iâ-so͘ kau hō͘ lâng hāi sí, koh uī-tio̍h beh hō͘ lán kah Siōng-Tsú ū hô-ha̍p ê kuan-hē, Siōng-Tsú ū hō͘ Iâ-so͘ koh-ua̍h.