《巴克禮普世版聖經(試讀本)》

| | | 轉寄

巴克禮普世版(試讀本) 羅馬書第五章

Tuì Sìn Kah Siōng-Tsú Hô-hó
1 Kì-jiân lán tuì sìn hō͘ Siōng-Tsú kiò-tsò gī-lâng, tsiū thong-kuè Tsú Iâ-so͘ Ki-tok kah Siōng-Tsú ū hô-hó ê kuan-hē. 2 Thong-kuè lán ê sìn, Ki-tok ín-tshuā lán tsìn-ji̍p hiān-tsāi teh hióng-siū ê un-tián, huaⁿ-huaⁿ hí-hí ǹg-bāng thang hun-hióng Siōng-Tsú ê îng-kng. 3 M̄-nā án-ne, lán tī khó͘-lān tiong, iû-guân tio̍h muá-sim hí-lo̍k, in-uī lán tsai, khó͘-lān seⁿ-tshut jím-nāi, 4 jím-nāi seⁿ-tshut láu-liān, láu-liān seⁿ-tshut ǹg-bāng, 5 Tsit-ê ǹg-bāng bē hō͘ lán sit-bāng, in-uī Siōng-Tsú í-king thong-kuè I siúⁿ-sù lán ê Sìng-Sîn tsiong thiàⁿ kuàn-ak lán ê sim. 6 In-uī lán iáu luán-jio̍k ê sî, Ki-tok tī Siōng-Tsú tiaⁿ-tio̍h ê ji̍t-tsí, uī-tio̍h ū tsuē ê lâng sí. 7 Tsin hán-tit ū-lâng ē thè gī-lâng sí, kiám-tshái ū-lâng káⁿ thè hó-lâng sí. 8 M̄-koh Siōng-Tsú ū hián-bîng I tuì lán ê thiàⁿ, lán iáu sī tsuē-jîn ê sî, ū Ki-tok thè lán sí. 9 Ki-tok ê lâu-hueh hi-sing m̄-nā hō͘ lán tsit-má kah Siōng-Tsú ū hô-ha̍p ê kuan-hē, koh-khah ē kiù lán thuat-lī Siōng-Tsú ê siū-khì. 10 In-uī lán iáu teh puē-gi̍k Siōng-Tsú ê sî, I hō͘ ka-kī ê Kiáⁿ thè lán sí, hō͘ lán kah I koh-tsài hô-hó. Kì-jiân lán tsit-má í-king tit-tio̍h kah I hô-hó, lán ē koh-khah in-uī Ki-tok ê ua̍h lâi tit-tio̍h tsín-kiù. 11 M̄-nā án-ne, lán tsit-má í-king thong-kuè Tsú Iâ-so͘ Ki-tok kah Siōng-Tsú hô-hó, mā beh thong-kuè Iâ-so͘ Ki-tok īng Siōng-Tsú lâi khua-kháu.

A-tong kah Ki-tok
12 Tsuē tuì tsi̍t-ê lâng tsìn-ji̍p sè-kan, sí mā tuè teh ji̍p-lâi. Kiat-kó só͘-ū ê lâng lóng ē sí, in-uī só͘-ū ê lâng lóng ū huān-tsuē. 13 Iáu-buē ū lu̍t-huat í-tsîng, tsuē to̍h í-king tī sè-kan, m̄-koh in-uī bô lu̍t-huat, tsuē tsiū bô sǹg-tsò sī tsuē. 14 M̄-koh tuì A-tong kàu Mô͘-se hit-tuāⁿ kî-kan, sí teh tsi-phuè jîn-luī, liân bô huān-tio̍h A-tong só͘ huān ê tsuē ê lâng mā lóng tio̍h sí. A-tong sī tuè-āu beh lâi Hit-uī ê tuì-pí. 15 M̄-koh A-tong ê tsuē-kuà kah Siōng-Tsú pe̍h-pe̍h ê un-sù sī bē pí-tit, in-uī nā tuì tsi̍t-ê lâng ê tsuē-kuà tsìng-lâng lóng tio̍h sí, thong-kuè Iâ-so͘ Ki-tok tsi̍t-ê lâng pe̍h-pe̍h siúⁿ-sù tsìng-lâng ê un-tián it-tīng koh-khah hong-hù! 16 Siōng-Tsú ê un-sù kah tsi̍t-ê lâng huān-tsuē ê kiat-kó bē pí-tit. Tsiàu sím-phuàⁿ, kan-taⁿ tsi̍t-piàn ê kuè-sit to̍h phuàⁿ-kuat ū tsuē; m̄-koh tsiàu pe̍h-pe̍h ê un-sù, tsin-tsē-piàn ê kuè-sit mā suan-phuàⁿ bô-tsuē. 17 Nā in-uī tsi̍t-ê lâng ê huān-tsuē, tsuân jîn-luī suah tio̍h siū sí ê tsi-phuè, án-ne Iâ-so͘ Ki-tok só͘ sîng-tsiū ê koh-khah tuā. Hiah-ê niá-siū Siōng-Tsú hong-hù ê un-tián, tsiū-sī pe̍h-pe̍h hō͘ Siōng-Tsú suan-phuàⁿ bô-tsuē ê lâng koh-khah ē-tàng thong-kuè Ki-tok lâi tsi-phuè ka-kī ê sèⁿ-miā. 18 In-uī tsi̍t-ê lâng huān-tsuē, tsìng-lâng lóng siū tīng-tsuē. Kāng-khuán, in-uī tsi̍t-ê lâng gī ê hîng-uî, tsìng-lâng lóng tit-tio̍h sià-tsuē kah ua̍h-miā. 19 In-uī tsi̍t-ê lâng ê puē-gi̍k, tsìng-lâng lóng tsiâⁿ-tsò tsuē-jîn. Kāng-khuán, tsi̍t-ê lâng sūn-ho̍k, tsìng-lâng lóng tsiâⁿ-tsò gī-lâng. 20 Lu̍t-huat ê tsè-tīng, hō͘ tsuē-kuà ke-thiⁿ, m̄-koh tsuē-kuà ke-thiⁿ, Siōng-Tsú ê un-tián koh-khah ke-thiⁿ. 21 Án-ne, tsuē thong-kuè sí lâi tsi-phuè, Siōng-Tsú ê un-tián thong-kuè gī lâi tsi-phuè, hō͘ lán tuì Tsú Iâ-so͘ Ki-tok lâi tit-tio̍h íng-uán ê ua̍h-miā.