《巴克禮普世版聖經(試讀本)》

| | | 轉寄

巴克禮普世版(試讀本) 哥林多後書第二章

1 Só͘-í guá kuat-tīng bô koh khì lín hia, tsiah bián koh hō͘ lín kan-khó͘-sim. 2 Guá nā hō͘ lín kan-khó͘-sim, án-ne lín tsiah-ê kan-khó͘-sim í-guā, iáu-ū siáⁿ-lâng ē-tàng hō͘ guá huaⁿ-hí? 3 Tsîng guá siá hit-tiuⁿ phue hō͘ lín, sī uī-tio̍h bián-tit guá khì lín hia ê sî, pún-lâi ing-kai hō͘ guá huaⁿ-hí ê lâng tian-tò hō͘ guá kan-khó͘-sim. Guá khak-sìn guá ê huaⁿ-hí tsiū-sī lín tāi-ke ê huaⁿ-hí. 4 Guá tī iu-siong thòng-khó͘ tiong lâu tsin-tsē ba̍k-sái lâi siá hit-tiuⁿ phue hō͘ lín, m̄-sī beh hō͘ lín kan-khó͘-sim, sī beh hō͘ lín tsai-iáⁿ guá juā-ni̍h-á thiàⁿ lín.

Sià-bián Ū Kuè-sit ê Lâng
5 Nā ū hō͘ lâng kan-khó͘-sim, m̄-sī hō͘ guá kan-khó͘-sim niā-niā, mā tsì-tsió hō͘ lín tiong-kan tsi̍t-kuá lâng kan-khó͘-sim. Guá án-ne kóng sī uī-tio̍h bián-tit hō͘ hiah-ê lâng kám-kak guá ê tsik-pī siuⁿ tāng. 6 Hit-khuán lâng í-king hō͘ lín tuā-to-sò͘ ê lâng tsik-hua̍t kah ū kàu-gia̍h ā. 7 Lín tian-tò tio̍h kā i sià-bián, kā i an-uì, tsiah bián hō͘ hit-khuán lâng kuè-thâu kan-khó͘-sim suah tsua̍t-bāng. 8 Só͘-í, guá khó͘-khǹg lín tio̍h hō͘ i tsai-iáⁿ lín khak-si̍t ū teh thiàⁿ i. 9 Tsîng guá siá hit-tiuⁿ phue ài beh tsai-iáⁿ lín jím-siū khó-giām kàu sím-mi̍h thîng-tō͘, khuàⁿ lín ū sūn-ho̍k guá ê tsí-sī á-bô. 10 Lín sià-bián sím-mi̍h lâng, guá mā beh kā i sià-bián. Guá sī tī Ki-tok ê bīn-tsîng uī-tio̍h lín ê iân-kò͘ lâi kā i sià-bián. 11 Án-ne tsiah bián hō͘ Sat-tàn phiⁿ khì, in-uī lán tsin tshing-tshó Sat-tàn ê kuí-kè.

Pó-lô Tī Ti̍k-lô-a ê Tshau-huân
12 Tsîng guá khì Ti̍k-lô-a thuân Ki-tok ê hok-im ê sî, Tsú í-king kā guá ê kang-tsok khui-lō͘. 13 M̄-koh bô tú-tio̍h guá ê hiaⁿ-tī Thê-to, só͘-í guá ê sim-lîng bô pîng-an, tsiū kah in sio-sî, khì Má-kî-tùn.

Uá-khò Ki-tok ê Tik-sìng
14 Kám-siā Siōng-Tsú, sî-siông ū Ki-tok tsò-thâu tshuā guán lâi tik-sìng, koh īng guán tī ta̍k só͘-tsāi hián-bîng hit-ê jīn-bat Ki-tok tsiah ū ê phang-bī. 15 Tī tit-kiù á-sī tîm-lûn ê lâng tiong-kan, guán tsiâⁿ-tsò Ki-tok ê phang-bī hiàn hō͘ Siōng-Tsú. 16 Tuì teh-beh tîm-lûn ê lâng lâi kóng sī tshàu-bī, tuì tit-kiù ê lâng lâi kóng sī ua̍h ê phang-bī. Nā án-ne, siáⁿ-lâng ē-kham-tit tam-tng tsit-khuán tāi-tsì? 17 Guán bô tshin-tshiūⁿ tsin-tsē lâng kā Siōng-Tsú ê tō-lí tòng-tsò siong-phín lâi phah-bē, tian-tò sī tsò tsi̍t-ê sîng-si̍t ê lâng, siū Siōng-Tsú ê tshe-phài, uá-khò Ki-tok lâi suan-káng tō-lí.