《巴克禮普世版聖經(試讀本)》

| | | 轉寄

巴克禮普世版(試讀本) 哥林多後書第四章

Huî-àng-á Lāi-bīn ê Pó-puè
1 Kì-jiân Siōng-Tsú liân-bín guán, tsiong tsit-ê jīm-bū kau-thok guán, guán tsiū bô koh lué-tsì. 2 Guán khì-sak ún-muâ koh kiàn-siàu ê hîng-uî, bô tsò khi-phiàn lâng ê tāi-tsì, bô uai-khiok Siōng-Tsú ê tō-lí, tsiū-sī tī Siōng-Tsú ê bīn-tsîng hián-bîng tsin-lí, lâi khé-huat ta̍k-lâng ê liông-sim. 3 Guán só͘ thuân ê hok-im nā ū jia-khàm bô tshing-tshó, tsí-ū teh-beh tîm-lûn ê lâng tsiah bô tshing-tshó. 4 Tsit sè-kan ê sîn-bîng hō͘ hiah-ê m̄-sìn ê lâng ê sim-lîng tsheⁿ-mê, bē-tàng khuàⁿ-kìⁿ hok-im ê kng. Tsit-ê hok-im teh kiàn-tsìng îng-kng ê Ki-tok. Ki-tok sī Siōng-Tsú ê hîng-siōng. 5 Guán m̄-sī teh thuân ka-kī, sī teh thuân Ki-tok Iâ-so͘ sī Tsú. Guán ka-kī mā uī-tio̍h Iâ-so͘ ê iân-kò͘ tsò lín ê lô͘-po̍k. 6 Hit-ê bīng-līng kng tio̍h tuì o͘-àm tsiò tshut-lâi ê Siōng-Tsú, tsiū-sī īng kng tsiò tī lán ê sim-lāi, hō͘ lán jīn-bat Siōng-Tsú tsiò tī Iâ-so͘ Ki-tok ê bīn hit-ê îng-kng. 7 M̄-koh guán tsiah-ê ū tsit-tsióng sio̍k-lîng pó-puè ê lâng, tú tshin-tshiūⁿ thô͘ tsō ê khì-kū, sī beh piáu-sī hit-ê ki̍k-tuā ê kuân-lîng sio̍k Siōng-Tsú, m̄-sī sio̍k guán. 8 Guán sî-siông tú-tio̍h huān-lān, m̄-koh bô khut-ho̍k; tú-tio̍h uî-lân, m̄-koh bô sit-bāng; 9 tú-tio̍h pik-hāi, m̄-koh bô hō͘ Siōng-Tsú pàng-sak; siū phah-tó, m̄-koh bô sí-bông; 10 Guán ē-sí ê sing-khu siông-siông tuà Iâ-so͘ ê sí, hō͘ Iâ-so͘ ê ua̍h-miā mā thang tī guán ê sing-khu hián-bîng. 11 Guán ua̍h tī sè-kan, uī-tio̍h Iâ-so͘ siông-siông tú-tio̍h sí ê guî-hiám, thang hō͘ Iâ-so͘ ê ua̍h-miā tī guán ē-sí ê sing-khu hián-bîng tshut-lâi. 12 Án-ne, guán tio̍h tiāⁿ-tiāⁿ bīn-tuì sí-bông, lín khiok in-uī án-ne tit-tio̍h ua̍h-miā. 13 Sìng-king kóng, "Guá ū sìn, só͘-í guá tsiah kóng."( tsù: SPh 116:10[115:1 LXX]) Kin-kì tsit-khuán sìn-gióng, guán mā sìn, só͘-í tsiah án-ne kóng tshut-lâi. 14 Guán tsai, hō͘ Tsú Iâ-so͘ koh-ua̍h ê Siōng-Tsú mā ē hō͘ guán kah Iâ-so͘ tâng-tsê koh-ua̍h, koh ē ín-tshuā guán kah lín tsò-hué khiā tī I ê bīn-tsîng. 15 Tse it-tshè lóng sī uī-tio̍h lín, beh hō͘ koh-khah tsē lâng tit-tio̍h Siōng-Tsú ê un-tián, thang hiàn koh-khah tsē ê kám-siā lâi îng-kng Siōng-Tsú.

Sìn-gióng ê Sing-ua̍h
16 Só͘-í guán bô lué-tsì, sui-jiân guán ê jio̍k-thé tsiām-tsiām teh sue-jio̍k, m̄-koh guán ê lāi-sim ji̍t-ji̍t teh uāⁿ-sin. 17 Guán só͘ siū tsiām-sî sió-khuá ê kan-khó͘, sī beh hō͘ guán tit-tio̍h bô-thang pí íng-uán ê tuā îng-kng. 18 Guán só͘ tiōng-sī ê m̄-sī khuàⁿ-ē-tio̍h-.ê, sī khuàⁿ bē-tio̍h-.ê, in-uī khuàⁿ-ē-tio̍h ê sī tsiām-sî, khuàⁿ bē-tio̍h ê sī íng-uán.