《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十三章

作者 巴克禮普世版小組 2015.07.19

Tsuè-āu ê Kíng-kò kah Tshíng-an
1 Tse sī guá tē-saⁿ pái beh khì lín hia. Sìng-king kóng, "Bô-lūn sím-mi̍h khòng-kò tio̍h ū nn̄g-ê á-sī saⁿ-ê tsìng-jîn." 2 Tuì hiah-ê í-tsîng huān-tsuē kah kî-tha lóng-tsóng ê lâng, guá tī tē-jī pái khì lín hia ê sî ū kā lín kíng-kò. Tsit-má guá bô tī lín hia, beh koh tsi̍t-pái kā lín kíng-kò, āu-pái guá koh khì lín hia ê sî, to̍h bô beh kā lín khuan-iông. 3 Lín ē tit-tio̍h lín só͘ su-iàu ê tsìng-kì lâi tsìng-bîng Ki-tok thong-kuè guá lâi teh kóng-uē. Ki-tok tuì-thāi lín pīng bē nńg-tsiáⁿ, tian-tò tī lín tiong-kan hián-tshut tuā kuân-lîng. 4 Ki-tok sui-jiân in-uī luán-jio̍k lâi siū tìng si̍p-jī-kè, m̄-koh I uá-khò Siōng-Tsú ê kuân-lîng lâi teh ua̍h; tshin-tshiūⁿ án-ne guán kah I kiat-liân piàn-tsò luán-jio̍k, m̄-koh uī-tio̍h lín, guán uá-khò Siōng-Tsú ê kuân-lîng ē kah Ki-tok tsò-hué ua̍h. 5 Lín tio̍h síng-tshat ka-kī, khuàⁿ ū tsiàu sìn-gióng teh sing-ua̍h á bô? Lín tio̍h khó-giām ka-kī. Lín it-tīng tsai ū Iâ-so͘ Ki-tok tiàm-tī lín lāi-bīn. Nā bô king-kuè khó-giām tsiū bián-kóng. 6 Guá siong-sìn lín tsai, guán ū thong-kuè khó-giām. 7 Guán kî-kiû Siōng-Tsú hō͘ lín bē tsò m̄-tio̍h. Tse m̄-sī beh piáu-sī guán ū thong-kuè khó-giām, sī beh hō͘ lín ū tsìng-ti̍t ê hîng-uî. Guán sui-jiân hō͘ lâng khuàⁿ-tsò bô thong-kuè khó-giām ê, án-ne mā bô iàu-kín. 8 In-uī guán bē-tàng tsò uî-puē tsin-lí ê tāi-tsì, tsí-ū ióng-hō͘ tsin-lí. 9 Guán luán-jio̍k, lín ióng-tsòng, guán tsiū huaⁿ-hí. Guán só͘ kî-kiû ê tsiū-sī hō͘ lín ē-tàng tsiâⁿ-tsò uân-tsuân. 10 In-uī án-ne, thàn guá bô tī lín hia ê sî siá tsit-tiuⁿ phue, tsiah bián guá khì kàu lín hia ê sî īng Tsú só͘ hō͘ guá ê kuân-pìng lâi giâm-hat tuì-thāi lín. Tsit-ê kuân-pìng sī beh khí-tsō, m̄-sī beh phò-huāi. 11 Hiaⁿ-tī tsí-muē ah, taⁿ siá kàu tsia uî-tsí lán tio̍h huaⁿ-hí. Tio̍h tui-kiû uân-tsuân, tio̍h hō͘-siōng bián-lē, tio̍h tâng-sim, tio̍h hô-bo̍k tsò-hué. Guān siúⁿ-sù thiàⁿ-sim kah pîng-an ê Siōng-Tsú kah lín tông-tsāi. 12 Tio̍h īng sîn-sìng ê sio-tsim lâi hō͘-siōng tshíng-an. 13 Só͘-ū ê sìn-tô͘ lóng beh kā lín tshíng-an. 14 Guān Tsú Iâ-so͘ Ki-tok ê un-tián, Siōng-Tsú ê thiàⁿ-thàng, Sìng-Sîn ê siong-thong, kah lín tāi-ke tông-tsāi.