《巴克禮普世版聖經(試讀本)》

| | | 轉寄

巴克禮普世版(試讀本) 腓立比書第二章

Ki-tok Tsò Lán ê Bô͘-huān
1 Lín kah Ki-tok kiat-liân ū tit-tio̍h sím-mi̍h kik-lē? Kám ū tuì I ê thiàⁿ-sim tit-tio̍h an-uì? Kah Sìng-Sîn kám ū sím-mi̍h kau-thong? Kám ū thé-giām-tio̍h Siōng-Tsú ê tsû-pi kah liân-bín? 2 Lín tio̍h ū kāng-khuán ê sim-tsì, kāng-khuán ê thiàⁿ-sim, sim-lîng hô-ha̍p, siūⁿ-huat it-tì, thang hō͘ guá tshiong-muá huaⁿ-hí. 3 M̄-thang tsū-su tsū-lī, tui-kiû hi-îng, tian-tò tio̍h īng khiam-sùn ê sim khuàⁿ pa̍t-lâng pí ka-kī khah gâu. 4 M̄-thang kan-taⁿ kò͘ ka-kī ê tāi-tsì, mā tio̍h kò͘ pa̍t-lâng ê tāi-tsì. 5 Lín tio̍h ū Ki-tok Iâ-so͘ ê sim-tsì: 6 Ki-tok guân-pún ū Siōng-Tsú ê sin-hūn, khiok bô siūⁿ-kóng tio̍h-ài kian-tshî kah Siōng-Tsú pîng-tíng ê tē-uī. 7 I tian-tò piàⁿ-khang ka-kī, tshú lô͘-po̍k ê sin-hūn tshut-sì tsò lâng, tsiâⁿ-tsò lâng ê hîng-thé tshut-hiān. 8 I tsū-guān khiam-pi, sūn-ho̍k kàu sí, sīm-tsì sí tī si̍p-jī-kè-tíng. 9 Só͘-í Siōng-Tsú kā I thê-sing kàu siōng kuân ê tē-uī, siúⁿ-sù I tshiau-ua̍t bān-miâ ê miâ. 10 In-uī án-ne, uī-tio̍h kìng-tiōng Iâ-so͘ ê miâ, thiⁿ-tíng, tē-tsiūⁿ kah tē-hā só͘-ū ê kha-thâu-u lóng tio̍h kā I kuī-pài. 11 Só͘-ū ê tshuì lóng ē suan-pò͘ sîng-jīn "Iâ-so͘ Ki-tok sī Tsú", lâi kui îng-kng hō͘ Thiⁿ-Pē Siōng-Tsú.

Tshin-tshiūⁿ Kng Teh Tsiò Sè-kan
12 Só͘-í, tshin-ài ê hiaⁿ-tī tsí-muē ah, guá tī lín hia ê sî lín lóng ū sūn-ho̍k guá, tsit-má guá bô kah lín tsò-hué, koh-khah tio̍h sūn-ho̍k. Lín tio̍h kè-sio̍k kiaⁿ-hiâⁿ phi̍h-phi̍h-tshuah, phah-piàⁿ lâi uân-sîng lín ka-kī ê tit-kiù. 13 In-uī Siōng-Tsú put-sî to tī lín tiong-kan teh tsò-kang, hō͘ lín ū ì-guān koh ū khuì-la̍t lâi si̍t-hiān I ê hó tsí-ì. 14 Bô-lūn sím-mi̍h tāi-tsì lóng m̄-thang bâi-uàn, m̄-thang tsing-lūn. 15 Án-ne lín tsiū ē tshing-pi̍k sûn-kiat, tī tsit-ê siâ-ok koh hú-pāi ê sè-tāi, tsò tsi̍t-ê bô khuat-tiám koh tsin-si̍t bô ké ê lâng, tsiâⁿ-tsò Siōng-Tsú ê kiáⁿ-jî. Tio̍h tī lín tiong-kan huat-kng, tshin-tshiūⁿ kng teh tsiò sè-kan, lâi kian-siú sù ua̍h-miā ê sìn-sit. 16 Án-ne tsiah ē-tàng hō͘ guá tī Ki-tok tsài-lîm ê ji̍t ū thang khua-kháu, in-uī guá m̄-sī khang-khang pháu-tsáu, guá só͘-ū ê lô-khó͘ lóng bô óng-huì. 17 Ká-sú guá tio̍h-ài lâu-hueh lâi phuah tuà lín īng sìn-sim só͘ hiàn ê tsè-mi̍h tíng-bīn, guá mā huaⁿ-hí, mā beh kah lín tāi-ke tsò-hué huaⁿ-hí. 18 Lín mā tio̍h án-ne lâi huaⁿ-hí, kah guá tsò-hué huaⁿ-hí.

Thê-mô͘-thài Kah Í-pa-hut-thê
19 Guá ǹg-bāng Tsú Iâ-so͘ ē-tàng hō͘ guá kuáⁿ-kín tshe-phài Thê-mô͘-thài khì lín hia, thang hō͘ guá thiaⁿ-tio̍h lín ê siau-sit lâi an guá ê sim. 20 Tsí-ū i tsi̍t lâng ū kah guá tâng-sim, koh tsin-tsiàⁿ kuan-sim lín ê tāi-tsì. 21 Tsìng-lâng lóng sī kuan-sim ka-kī ê tāi-tsì, m̄-sī kuan-sim Iâ-so͘ Ki-tok ê tāi-tsì. 22 M̄-koh Thê-mô͘-thài ê tsò-lâng lín lóng tsai, i tshin-tshiūⁿ kiáⁿ tuì lāu-pē kah guá tsò-hué lô-khó͘ lâi hing-khí hok-im. 23 Só͘-í guá khuàⁿ guá ê to͘-ha̍p án-tsuáⁿ, ǹg-bāng ē-tàng kuáⁿ-kín tshe i khì lín hia. 24 Guá khak-sìn Tsú ē hō͘ guá pún-sin mā tsin-kín ē-tàng khì kìⁿ lín. 25 M̄-koh guá siūⁿ-kóng iàu-kín tio̍h tshe Í-pa-hut-thê tńg-khì lín hia, i sī guá ê hiaⁿ-tī, tâng-kang kah tsiàn-iú. Tī guá su-iàu ê sî lâi tsi-uân pang-tsō͘ guá. 26 I tsin siàu-liām lín tāi-ke, mā ū thiaⁿ-tio̍h lín tsai i phuà-pēⁿ ê tāi-tsì sim tsin kan-khó͘. 27 I khak-si̍t ū phuà-pēⁿ kah hiám-hiám sí-khì, m̄-koh Siōng-Tsú liân-bín i, mā ū liân-bín guá, hō͘ guá m̄-bián koh ke-thiⁿ iu-siong. 28 Só͘-í guá koh-khah tì-ì beh tshe i tńg-khì lín hia, hō͘ lín koh khuàⁿ-tio̍h i lâi huaⁿ-hí, mā thang kiám-tsió guá ê iu-siong. 29 Só͘-í lín tio̍h huaⁿ-huaⁿ hí-hí lâi tsiap-la̍p tsit-uī Tsú lāi ê hiaⁿ-tī, mā tio̍h tsun-tiōng tsit-khuán ê lâng. 30 In-uī i uī-tio̍h tsò Ki-tok ê kang hiám-hiám sí-khì, ka-kī piàⁿ-miā tsò-kang siūⁿ beh pó͘ lín ho̍k-sāi guá bô kàu-gia̍h ê só͘-tsāi.